Masalimo 108 - IBAYIBOLO 2024

Ukulaba ubwavwilizi pakulwana na balwani

Ulwimbo Isalimo ilya Devedi.

¹ Wee Chala, umoyo wane wikalanite, nkwiza pakwimba nukwata inyimbo numuzimu wane ghosi.

² Wee chinanda ni pango lyane lilagha, nkwiza pakulinyamusya izuba ni nyimbo zyane.

³ Wee Mwene, nkwiza pakupalizya, pakasi pabantu aba inko izinji, sona nkwiza pakukwimbila inyimbo pakasi pa inko zyosi.

⁴ Ulughano lwako lukulu nkani umwakuti lwafika ukuchila imwanya. Sona ubusubiliwa bwako bufikite kumabingu.

⁵ Wee Chala, lanjizya ubukulu bwako mumwanya nkani, sona ubuchindamu bwako bwizulaye pachisu chosi icha ichapasi.

⁶ Utupokaye nukutwavwa ni nyobe yako indilo, umwakuti abantu babo ubaghanite bapokiwanje.

⁷ U Chala anena bo ali mubuzilo bwache ubuzelu ati, “Pachifukwa icha kupota kwane nkwiza pakugaba ichisu icha Shekemu, sona nabika impaka mwikombe ilya Sukoti.

⁸ U Giliyadi wane, wepe u Manase wane, u Efulayimu cho chisote chane, sona u Yuda yo ndisa yane iya bumwene.

⁹ U Mowabu lyo libeseni lyane ilyakusukusulilamo, u Edomu we chakusumbilapo inkwato zyane. Nkwiza pakukolomoka bo nabapota aba Filisiti.”

¹⁰ Nkimba wewenu akwiza pakunfisya mukaya akakulu nkani aka malinga? Nkimba wewenu akwiza pakundongozya ku Edomu?

¹¹ Wee Chala, nkimba te wewe we ukatupa inkonto, nukukana pakubuka poka na basilikali bitu?

¹² Utwavwe pakulwa na balwani bitu, pakuti ubwavwilizi ubwa muntu bute ni mbombo.

¹³ Nanti u Chala ali naswe, po tukwiza pakupota ubwite, pakuti weyuyo akwiza pakubakanyankila abalwani bitu.