Masalimo 107 - IBAYIBOLO 2024

Ibuku Ilyafayivi Masalimo 107-150 Ukubupala ubwiza ubwa Chala

¹ Mumupalaye u Mwene pakuti mwiza, ulughano lwache lwa bwila na bwila.

² Abapokiwa bosi bazifumusyanje zinizi, kokuti abantu babo akabapoka munyobe izya balwani,

³ babo akabasokola kuvyisu ivinji, ukufuma kubufumilo bwizuba na kubwinjililo, mupaka kumitu na kuntende bulo.

⁴ Abantu bamo bakembelagha bulo munkolongo, sona batakayagha izila iyakubukila mukaya akakulu nkani, ukuti bikalayemo.

⁵ Bakaba nizala ni nyota, umwakuti bakadedebala nkani.

⁶ Muntamyo zyabo, bakamulilila u Mwene, akabapoka mumayimba ghabo.

⁷ Akabalongozya muzila iyakugholoka bulo mupaka bakafika mukaya akakulu nkani, ukuti bikalayemo.

⁸ Bamupalaye u Mwene, pachifukwa icha lughano lwache ulwa bwila na bwila, pachifukwa icha mbombo zyache izyakuswighisya pabantu.

⁹ Pakuti babo bali ni nyota akubapanga amizi, sona abazala akubikutizya ni vintu ivyiza.

¹⁰ Abantu bamo bakikalagha muchisi, bakayimba mujele po sona bakapinyiwa nu bunyololo,

¹¹ pachifukwa ichakuti bakaghasambukila amazyu agha Chala, sona bakabukana ubumanyisi ubwa Wakumwanya Nkani.

¹² U Mwene akabayivya ni mbombo, abantu bala bakipunula, po patakabapo nayumoyumo umuntu uwakubavwa.

¹³ Muntamyo zyabo, bakamulilila u Mwene, akabapoka mumayimba ghabo.

¹⁴ Akabefyamo muchisi, nukudumulannya ubunyololo.

¹⁵ Bamupalaye u Mwene, pachifukwa icha lughano lwache ulwa bwila na bwila, sona ni mbombo zyache izyakuswighisya pabantu,

¹⁶ pachifukwa ichakuti akuzipankulannya inyiyi izya mukuba, nukuzidumula impingwi izya chela.

¹⁷ Abantu bamo bakaba bapunganu pachifukwa icha kunanga, po bakayimba nkani nu bubavu, pachifukwa icha mbibi zyabo.

¹⁸ Bakaselukagha ni chakulya, po bakaba papipi nukufwa.

¹⁹ Muntamyo zyabo, bakamulilila u Mwene, akabapoka mumayimba ghabo.

²⁰ Akabatumila amazyu ghache nukubapozya, ukuti ghabapoke abantu bala kwipumpa.

²¹ Bamupalaye u Mwene, pachifukwa icha lughano lwache ulwa bwila na bwila, sona ni mbombo izyakuswighisya pabantu bache.

²² Babikaye ichakwiyipa ichakupalizikizya, nukwimba inyimbo izya lusekelo.

²³ Abantu bamo bakenda panyanja na mabwato ghabo. Bakaghula nukughulizya pa mizi aminji nkani.

²⁴ Bakazyennya imbombo izya Mwene, sona ni mbombo zyache ichakuswighisya pa mizi amibizu ghala.

²⁵ Po akalamula, sona pakaba impepo iya maka panyanja, sona amayigha ghakanyamuka

²⁶ Bakakwela mumwanya nukwika sona pasi, po ubujivu bwabo bukamala, pachifukwa icha ntamyo yabo.

²⁷ Bakatantalilagha ngati po we chakolwa, pisinda pache amahala ghakabamalila.

²⁸ Muntamyo zyabo, bakamulilila u Mwene, akabapoka mumayimba ghabo.

²⁹ U Mwene akayipumizya impepo, ghope amayigha ni nyanja vikaba myee.

³⁰ Abantu bala bakahoboka nkani bo kwaba bulo myee, po u Mwene akabafisya piloboko papo akalondagha.

³¹ Bamupalaye u Mwene, pachifukwa icha lughano lwache ulwa bwila na bwila, sona ni mbombo zyache izyakuswighisya pabantu bache.

³² Bamuchindikaye palukomano ulwa bantu, sona bamupalaye palukomano ulwabasongosongo.

³³ Akuzipela isoko pakuba nkolongo, zyope imbwibwi zizyo zikwenda pakuba chisu ichimizu.

³⁴ Ichisu icha muvundo pakuba chisu icha mbeya, pachifukwa icha bantu ababibi, babo bakwikala mulamula.

³⁵ Akwandula inkolongo pakuba mbwibwi iya mizi, ichisu ichimizu pakuba mbwibwi iya mizi.

³⁶ Akabikazya abantu abazala kulakula, sona bakazenga akaya akakulu nkani akakwikalamo.

³⁷ Bakapesa imbeyu nukubyala amampesya, po bakinula nkani.

³⁸ U Mwene akabasaya, po abantu bala bakabala nkani, U Mwene atakefyako ubwinji ubwa vitekwa vyabo.

³⁹ Po ubwinji bwabo bukefiwako, sona basamuliwa pachifukwa icha kukanyililiwa nukuyimba.

⁴⁰ Loli u Mwene akwiza pakubatanizya abantu abamanyikwe, nukubapela ukuti bendabendaye bulo munkolongo mumo mute umusebo.

⁴¹ Loli akabefya abapotwe muntamyo zyabo, nukubalizya abamunyumba zyabo ngati midimo.

⁴² Abagholosu bakuzyennya zinizi nukusekela, loli abantu ababibi akubasona imilomo yabo.

⁴³ Wesi yuyo ali na mahala achebaye na zinizi, sona inong'onayepo nizya lughano ulukulu nkani ulwa Mwene.