Masalimo 106 - IBAYIBOLO 2024

Ubwiza ubwa Mwene pabantu bache

¹ U Mwene apaliwanje. Mumupalizyanje u Mwene pakuti mwiza, ulughano lwache ulwa bwila na bwila.

² Nkimba wewenu yuyo angalingannya imbombo izyamaka izya Mwene? Nkimba wewenu angamupalizya umwakufikapo?

³ Basayiwa babo bakubombela mubwanaloli, babo akabalilo kosi bakubomba ingolosu.

⁴ Wee Mwene, unkumbukaye, bo ukubapelela ichisa abantu bako. Bo ukubavwa abantu bako umpokaye nane bulo,

⁵ umwakuti inhobokaye pakwennya ukuti abantu bako ivintu vikubendela akiza, ukuti igabane ni inko yabo yiyo ukayisala mukuhoboka kwabo, umwakuti nituvikizye mu mpyana yabo.

⁶ Twananga ngati mumo abanyenya bitu banangila, aswe twe babibi sona twananga nkani.

⁷ Bo abanyenya bitu bali mu Ijiputi, batakinong'onelako ku vyika vyako. Batakakumbuka ukuti ukababombela ivintu ivyiza, po bakakusambukila pa Nyanja Inchesamu.

⁸ Loli akabapoka pachifukwa icha itabwa lyache, ukuti amaka ghache amakulu nkani ghamanyikwe.

⁹ Akayichemela Inyanja Inchesamu yila, po inyanja yilayila yikapwa. Akabalongolela panyanja inyibizu, po abantu bala bakenda pachisu ichumizu.

¹⁰ Akabapoka munyobe iya balwani babo, sona akabatabula munyobe izya bantu babo bakababenga.

¹¹ Loli amizi ghala ghakabibizya abalwani babo, umwakuti nayumoyumo yuyo akapona.

¹² Abantu bala bakalisubila ilayizyo lyache, po bakimba inyimbo izya mapalo.

¹³ Loli lubilolubilo bakaluvya vyosi vivyo akababombela, umwakuti bakasulannya amahala ghache.

¹⁴ Bakaba nikwilu nkani munkolongo mula, sona mulamula bakamuyela u Chala.

¹⁵ Po akabapa chicho bakalondagha, loli akabawisizya ububine ubupalapala nkani.

¹⁶ Munkolongo mula bakaba na kabini nu Mozesi, nu Aloni bulo umuzelu uwa Mwene.

¹⁷ Ichisu chikasama po chikamumila u Datani, po chikabasyila bosi abamunyumba iya Abilamu.

¹⁸ Umoto ghukaka pakabukatila kabo, indimi izya moto zikabalungulizya abantu ababibi bosi.

¹⁹ Bakapanga ichifwani icha ngwata pighamba ilya Sinayi, nukuchiputa ichifwani icha chela.

²⁰ Bakatanana u Chala umuchindamu, ni chifwani icha ngwata, yiyo yikulya isote.

²¹ Bakamuluvya u Chala yuyo akabapoka, yuyo akabomba ivintu ivikulu nkani mu Ijiputi,

²² ivyika vivyo akavibomba mu Hamu, sona ni mbombo izyakuswighisya pa Nyanja Inchesamu.

²³ Bo u Chala anena ukuti akwiza pakubanangannya abantu bache, Umubombi wache umusaliwa u Mozesi akimilila pakasi pabantu nu Chala, pakumulaba ukuti abutozole ubukali bwache umwakuti atakabanangannye.

²⁴ Abantu bakachisulannya ichisu ichamboto chilachila, umwakuti batakalisubila ilayizyo lyache.

²⁵ Bakilumbusya muvisakasa vyabo, sona batakamwivwila u Mwene.

²⁶ Cho chifukwa akakwezya inyobe yache, nukulapa ukuti abantu bala bakwiza pakufwila munkolongo,

²⁷ sona nukubanyampannya abaluko lwabo pakasi pabantu aba inko izinji, nukubasasya muvyisu ivyakulekanalekana.

²⁸ Abantu bala bakanda pakumwiputa u Baala pa Pewoli, sona bakalya ivyakwiyipa vivyo bakavibika ku bachala abafwe.

²⁹ Bakamukalalizya u Mwene ni mbombo zyabo imbibi, po akabawisizya ichiwaya.

³⁰ Loli u Finehasi akimilila nukubafunda abantu ababibi, po ichiwaya chila chikamala.

³¹ Zinini zikumunena ukuti akaba muntu umugholosu, mupaka inkulilo zyosi izya muntazi.

³² Bakamukalalizya u Mwene pamizi agha pa Meliba, umwakuti u Mozesi akaba muntamyo nkani, pachifukwa icha bantu bala.

³³ Bakamukalalizya nkani u Mozesi umwakuti akanena amazyu aghamwalwemwalwe.

³⁴ Batakabanangannya abantu aba inko izinji, ukuyana namumo u Mwene akalamulila.

³⁵ Loli bakasendana na bantu aba inko izinji, nukweghelela inyiho zyabo.

³⁶ Bakabiputa abachala babo, vivyo pisinda pache vikaba chipingo kukwabo.

³⁷ Bakiyipa abana babo balumendo na balindu, pakuba chakwiyipa kumizimu imibibi.

³⁸ Bakabaghogha abantu babo bate ninongwa, kokuti ibanda ilya bana babo abalumendo na balindu, Bakiyipa abana banaba pakuba chakwiyipa ku bachala aba mu Kenani, ichisu chila chikanyala ni banda lyabo.

³⁹ Bakinyazya bene pazizyo bakabomba, bakalowa pachifukwa icha mbombo zilazila.

⁴⁰ Polelo u Mwene akabakalalila abantu bache, sona akachisulannya ichilingo chache.

⁴¹ Akababika munyobe izya bantu aba inko izinji, sona abalwani babo bakabalaghilagha

⁴² Abalwani babo bakabayivya nkani, umwakuti bakaba pasi pabulaghili bwabo.

⁴³ Napapo utubalilo utwinji akabapokagha, pope bulo bakamusambukila, umwakuti bakwiza pakuyimba pachifukwa icha mbibi zyabo.

⁴⁴ Loli u Mwene akazyennya intamyo zyabo, sona akivwa ukulila kwabo.

⁴⁵ Pachifukwa icha bantu bache, akalukumbuka ulufingo lwache, umwakuti akisya ubukali bwache pachifukwa icha lughano lwache ulukulu nkani.

⁴⁶ Akaghisya amoyo agha bantu babo bakabalema pakuba bazya ukuti abapelele ichisa abantu bache.

⁴⁷ Wee Mwene Chala witu, tupoke sona tubungannye poka nukutupoka munyobe izya inko izinji, umwakuti tulipalizyanje itabwa lyako izelu, nukukupala.

⁴⁸ U Mwene u Chala uwa Izilayeli apaliwanje bwila na bwila. Po abantu bosi batinji, “Ameni!” U Mwene apaliwanje.