Masalimo 105 - IBAYIBOLO 2024

U Chala na bantu bache

¹ Mumupalizyanje u Mwene, sona mulichindikaye itabwa lyache. Muzifumusyanje imbombo zyache pakasi pabantu aba inko izinji.

² Mumwimbilaye u Mwene, mumwimbilaye inyimbo izya mapalo, muzifumusyanje imbombo zyache izyakuswighisya.

³ Mumuchindikaye pakuti muzelu, po amoyo agha bantu babo bakumulonda ghasekelaye.

⁴ Mumulondaye u Mwene namaka ghache, sona mubanje pamaso papache akabalilo kosi.

⁵ Kumbuka iviswigho vivyo abomba, ni vyika sona nu bulongi bubo akafumusya,

⁶ mwee baluko ulwa Abulahamu umubombi wache, mwee bana aba Yakobo, abasaliwa bache.

⁷ We Mwene u Chala witu, sona akuchilaghila ichisu chosi ichapasi.

⁸ Akulukumbuka ulufingo lwache bwila na bwila, akughakumbukagha amalamulo ghache ku nkulilo sabuzani weka.

⁹ Ulu lukaba lufingo lulo akafingana nu Abulahamu, sona lulo akalapa kwa Yisaki.

¹⁰ Akulisimikizya ilayizyo kwa Yakobo, kwa Izilayeli ulufingo lwa bwila na bwila.

¹¹ Po akati, “Nkwiza pakukupa ichisu icha Kenani, pakuba mpyana yako.”

¹² Pakabalilo kako bakaba bantu abanandi nkani, sona bayeni muchisu chilachila,

¹³ bakendendekagha bulo, ukufuma ku inko izi ukubuka ku inko izinji. Ukufuma kubumwene ubu ukubuka kubumwene ubunji.

¹⁴ Atakamwitikizyapo nayumoyumo umuntu ukuti abayivyanje, sona akabachemela abamwene bamo, pachifukwa icha bantu bache balabala ukuti:

¹⁵ “Mutakabapalamasyanje abapakiwa bane, sona mutakababombelaye chimo ichibibi abalaghuzi bane.”

¹⁶ Akachiwisizya izala ichisu, nukuvinangannya ivyakulya vyabo vyosi,

¹⁷ Po akamutuma umuntu pantazi papabo, u Yosefu yuyo akaghuliziwa pakuba muzya.

¹⁸ Bakavivulazya ivinama vyache nu bunyololo, sona bakamupinyilila ikoli ilya chela musingo.

¹⁹ Po vivyo akanenela zila vikakwanilisiwa, sona amazyu agha Mwene ghakasimikizya ukuti atakananga.

²⁰ U mwene akalamula ukuti bamufumye, kokuti umulaghila uwa inko akamusatula.

²¹ Akamubika pakuba we songo uwa munyumba yache, sona wakwenelezya ivintu vyache vyosi.

²² Akaba we songo uwa makambala agha mwene, nukubamanyisya amahala abasongo.

²³ Po u Izilayeli akinjila mu Ijiputi, u Yakobo akikala ngati muyeni muchisu icha Hamu.

²⁴ U Mwene akababalizya nkani abantu bache bala, umwakuti bakaba binji nkani ukubachila abalwani babo.

²⁵ U Mwene akaghapela amoyo agha balwani babo ukuti bababenge abantu bache, ukuti bababombele ububibi ababombi bache.

²⁶ Akamutuma umubombi wache u Mozesi, nu Aloni, umuntu yuyo akamusala.

²⁷ Bakapela ivyika vyache pakasi papabo, ni viswigho vyache muchisu icha Hamu.

²⁸ Akawisya ichisi, po muchisu chila mukaba ichisi, pope bulo bakaghasulannya amazyu agha Mwene.

²⁹ Amizi agha musoko zyabo akaghapela pakuba libanda, po iswi zikafwa.

³⁰ Ichisu chabo chikizula naba chula, babo bakakwela na pavitala bulo ivya balaghili babo.

³¹ U Chala akalamula, po imbwele inyinji nkani zikiza, sona tope utusyakuku tukizula muchisu chabo.

³² Akabawisizya amabwe mubuzilo ubwa vula, utumesya tukamesya muchisu chosi chila.

³³ Amampesya na makuyu akaghanangannya, sona akaghapyolannya amakwi muchisu chila.

³⁴ Bo alamula bulo, kukawa umakanta, sona ni mpazi zizyo zitakabelengiwanga.

³⁵ Umakanta yula akalya ivimelwa vyosi muchisu chila, sona akalya ivikomwa vyosi ivya mumaghunda ghabo.

³⁶ Akabaghogha abakatote bosi abalumendo muchisu chabo, babo bakaba seke izyakwanda izyabwanavuli bwabo.

³⁷ Pisinda pache akabefya aba Izilayeli, bo banyamuye usiliva nu golide, bosi bakaba bamaka nkani, sona patakabapo nayumoyumo yuyo akaba mudedebazu.

³⁸ Bo epamo, aba Ijiputi bakahoboka nkani, pakuti bakabanyilagha nkani abantu balabala.

³⁹ U Mwene akabavwinka ni bingu abantu bache, sona numoto pakaba ulukozyo pabusiku.

⁴⁰ Bakamulaba ichakulya, po akabapa abazungwa. Akabikutizya ni vibama ivya kumwanya.

⁴¹ Akighula ilyalabwe, po amizi ghafuluka, sona ghakafulukila munkolongo ngati lusoko.

⁴² Pakuti akalikumbuka ilayizyo lyache izelu, lilyo akamulayizya umubombi wache u Abulahamu.

⁴³ Akabefya abantu bache nulusekelo abasaliwa bache bakwimba nukusekela nkani.

⁴⁴ Akabapa ichisu icha bantu aba inko izinji, po bakachisenda pakuba mpyana yabo, ichisu chicho abantu abanji bakayimbilapo.

⁴⁵ Akabomba bunubu ukuti abantu bache baghakonkaye, amalamulo ghache ni ndaghilo zyache. U Mwene apaliwanje.