Masalimo 104 - IBAYIBOLO 2024

Ukumupala umupeli

¹ Wee moyo wane, umupalaye u Mwene. Wee Mwene Chala wane, we mukulu, sona uvwalite ubuchindamu nu bumwene.

² Ukwivwinka wemwene nulukozyo ngati mwenda, sona akuzuye kumwanya ngati mwenda uwa chisakasa.

³ Alambalika imitaliko iya nyumba yache pamizi kumwanya. Akughapela amabingu pakuba ngolo yache iya bwite, sona akwenda pavipapande ivya mpepo.

⁴ Akuyipela impepo pakuba zyo ntumi zyache, sona impesese izya moto pakuba babombi bache.

⁵ Akachikazya ichisu ichapasi palwalo lwache. Po chitangayingana napo panandi.

⁶ Ukachivwinka ni nyanja inyibizu ngati po nkazo, amizi ghakasengama pamwanya pamaghamba.

⁷ Loli bo waghachemela, amizi ghala ghakachimbila. Bo ghivwa ukujilimisya kwako, ghakasata lubilolubilo nkani,

⁸ Ghakenda pamwanya pamaghamba, nukwikila mumakombe kubuzilo bubo ukaghayanizizya.

⁹ Ukaghabikila impaka amizi ghala ukuti ghatakadumusannyanje impaka yilayila, ghatakwiza pakuchizuzya nalumo sona mupaka pamwanya ichisu ichapasi.

¹⁰ Ukuzyighula imbwibwi izya mizi mumakombe, sona isoko zikwendagha pakasi pamaghamba.

¹¹ Zikupa amizi aghakung'wela ivinyamana vyosi ivya munkolongo, mulamula impunda izya munkolongo zikumazya inyota.

¹² Iviyuni vikuzengamo ivivumbo mulubazu musoko, sona vikwimba musamba izya makwi.

¹³ Akughasembelela amaghamba na mizi agha kumwanya, chope ichisu ichapasi chikwikuta ni seke izya mbombo zyache.

¹⁴ Akumezya isote ukuti ing'ombe zilyanje, sona akumupa umuntu imbeyu ukuti abyalaye, umwakuti apanje ichakulya ichinji nkani ukufuma mwitope.

¹⁵ Akumupa umuntu uvinyo yuyo akughuhobosya umoyo wache, na mafuta ghagho ghakuchilamizya icheni chache, sona ni vibama ivyakuti vimupanje amaka.

¹⁶ Amakwi agha Mwene ghakusembeleliwa akiza nkani, kokuti amakwi agha mwale ghagho akabyala mu Lebanoni.

¹⁷ Mulamula iviyuni vikutengamo ivivumbo vyabo, sona inyangenyange zikutengamo ivivumbo mumakwi agha payini.

¹⁸ Mumaghamba amatali momumo mukwikala imbabala izya mumabwe, sona mulyalabwe momumo mukwikala utwapelemende.

¹⁹ Ukaghupela umwezi ukuti ghulesannyanje utubalilo, izuba lyope likamenye akabalilo akakwinjilila.

²⁰ Ukachipela ichisi ukuti chibanje busiku, po ivinyamana vyosi ivya munkolongo vikufuma kuzi.

²¹ Inkalamu zikubuluma bo zikulonda pakulema inyama, nukumulaba ivyakulya u Chala.

²² Nanti izuba lyafuma zikunyokela, pakulambalala mumpako zyabo.

²³ Po umuntu akubuka kumbombo zyache, akubomba imbombo mupaka pachamabwila.

²⁴ Wee Mwene, wabomba ivintu ivyinji nkani. Na mahala ghako ukavipela ivintu vyosi, ichisu ichapasi chizuye ni vipeliwa vyako.

²⁵ Mulamula muli inyanja inkulu, yiyo yisatite nkani, umwakuti yizuye ni vipeliwa vivyo vitangabelengiwa, ivikulu ni vinandi bulo.

²⁶ Palapala amabwato amakulu nkani ghakwendapo, yope inyivwila yiyo ukayipela yikusaba mulamula.

²⁷ Vyosi vinivi vikukusubila wewe, ukuti uvipanje ivyakulya pakabalilo kache.

²⁸ Nanti wavipa ivyakulya, vikupokelagha, sona nanti wavumbatula inyobe yako, vikwikuta.

²⁹ Nanti ukuvipa inkonto, vikuba nubogha, nanti wafyula umuyi, vikufwa nukunyokela kwitope.

³⁰ Nanti wavitumila umuyi wako, vikupeliwa, sona ichisu ichapasi ukuchipela chipyachipya akabonekele kache.

³¹ Ubuchindamu ubwa Mwene bubanjeko bwila na bwila, sona u Mwene ahobokaye ni mbombo zyache.

³² Nanti ennya pachisu ichapasi, ichisu chila chikutetema. Nanti aghapalamasya bulo amaghamba, amaghamba ghala ghakusukagha ilyosi.

³³ Nkwiza pakumwimbila u Mwene mubumi bwane bosi, nkwiza pakumwimbila inyimbo izya amapalo u Chala wane, bo inchili ne mumi.

³⁴ Inyiputo zyane zimuhobosyanje, bo nkusekela mwa Mwene.

³⁵ Loli ababomba mbibi bazimilaye pachisu ichapasi, abantu ababibi batakabanjeko sona. Wee moyo wane, umupalaye u Mwene. U Mwene apaliwanje.