Masalimo 103 - IBAYIBOLO 2024

Ulughano ulwa Chala

Isalimo ilya Devedi.

¹ Wee moyo wane, umupalaye u Mwene. Sona navyosi vivyo vili mumo vilipalaye itabwa lyache izelu.

² Wee moyo wane, umupalaye u Mwene, utakaluvyanje ivyiza vyache vyosi.

³ U Mwene weyuyo akukuhobokela imbibi zyako zyosi, sona akubupozya ububine bwako bosi.

⁴ Akubupoka ubumi bwako ukuti ghutakinjilaye muchiliba, akukuvwika ulughano lwache sona ni chisa chache.

⁵ Akubwizuzya ubumi bwako ni vyiza vyosi, ubulumendo bwako bukwanda chipyachipya ngati lizwanga.

⁶ U Mwene akulongela mubwanaloli inongwa izya bantu bosi babo bakuyivyiwa.

⁷ Akamuvumbulila u Mozesi izila zyache, sona akabavumbulila aba Izilayeli imbombo zyache.

⁸ U Mwene wachililizi sona wachisa, atakukalala mwalwemwalwe, sona ulughano lwache lutakupotwangapo nalumo.

⁹ Atakwiza pakutuchemela akabalilo kosi, sona ubukali bwache butakwiza pakubangako bwila na bwila.

¹⁰ Atakutufunda ukuyana ni mbibi zyitu, pamo ukututanizya ukuyana nukunanga kwitu.

¹¹ Kumwanya kutali nkani na pachisu ichapasi, umwakuyana bulo ulughano lwache lukulu nkani, ku bantu babo bakumuchindika.

¹² Kubufumilo bwizuba kutali nkani na kubwinjililo bwizuba, umwakuyana bulo efizye imbibi zyitu kubutali nkani naswe.

¹³ Ngati mumo uwise akubela ni chililizi na bana bache, umwakuyana bulo u Mwene akubanga ni chililizi na bantu babo bakumuchindika.

¹⁴ Pakuti amenye mumo akatupelela, sona akukumbuka ukuti twe litope bulo.

¹⁵ Amasiku agha muntu ghali ngati lisote, akukula ngati bwezya.

¹⁶ Nanti impepo yaputa, ghakuzyebeluka bulo, ubuzilo bwache butakubukumbuka sona.

¹⁷ Ukufuma kubwandilo mupaka kubumalilo ulughano ulwa Mwene lwa bwila na bwila ku bantu babo bakumuchindika, ubugholosu bwache ubwa banyenya babo.

¹⁸ Abantu banaba bo babo bakusungilila ulufingo lwache, sona babo bakughambuka nukughivwila amalamulo ghache.

¹⁹ U Mwene achikazizye ichitengo chache icha bumwene kumwanya, sona akuvilaghila ivintu vyosi mubumwene bwache.

²⁰ Mwee bantumi bache, mupalaye u Mwene, kokuti mwe bamaka mwe mukuzikonka indaghilo zyache mupalaye u Mwene.

²¹ Mwee basilikali bache aba kumwanya, mupalaye u Mwene, kokuti mwe babombi bache, mwe mukubomba ubwighane bwache.

²² Mumupalaye u Mwene, imbombo zyache zyosi zimupalaye, kosi na kosi mubumwene bwache. Wee moyo wane, umupalaye u Mwene.