Masalimo 102 - IBAYIBOLO 2024

Ulwiputo mukabalilo akantamyo

Ulwiputo ulwamuntu yuyo akuyimba nkani, sona yuyo amupa u Mwene amayimba ghache ghosi.

¹ Wee Mwene, ivwa ulwiputo lwane, sona ivwa ukulila kwane.

² Utakampanje inkonto, bo indi muntamyo. Tegha amakutu ghako, bo nkukwitizya, sona unyamule lubilolubilo.

³ Pakuti amasiku ghane ghakuzyebeluka bulo ngati lyosi, amafupa ghane ghakwaka ngati moto.

⁴ Umoyo wane ghukutunkana sona ghukufoka ngati lisote. Intakuchinyonywa sona ichakulya.

⁵ Pachifukwa icha kukoloma kwane ukukulu, nasyala mafupa ghene.

⁶ Naba ngati po ne chiyuni icha munkolongo, sona ngati po ne mpughulu muvisami.

⁷ Pabusiku nkuchelezya, naba ngati ne chiyuni, chicho chili chene pachisonje.

⁸ Abalwani bane bakuntuka isiku lyosi, abantu babo bakwiminkana nane, bakulitambula itabwa lyane pakughuna.

⁹ Pakuti amatoyi cho chakulya chane, nukongannya ichakung'wela chane na masozi.

¹⁰ Pachifukwa icha bukali bwako ubukukulu, wanyamula nukunsumbila pasi

¹¹ Amasiku ghane ghali ngati muzyezye pachamabwila, sona nkufoka ngati lisote.

¹² Wee Mwene, loli awe ukwikala pachitengo chako icha bumwene bwila na bwila, itabwa lyako libanjeko mupaka inkulilo zyosi.

¹³ Ukwiza pakunyamuka nukukapelela ichisa akaya akakulu nkani aka Ziyoni. Pakuti aka ko kabalilo akakulanjizya ichisa, sona akabalilo akenecho kafika.

¹⁴ Pakuti ababombi bako baghaghanite amabwe agha akaya akakulu nkani kala, bakukapelela ichisa napapo kaba chisami.

¹⁵ Abantu aba inko izinji bakwiza pakulichindika itabwa ilya Mwene, abamwene bosi aba pachisu ichapasi bakwiza pakubunyila ubuchindamu bwako.

¹⁶ Pakuti u Mwene akwiza pakukazenga sona akaya akakulu nkani aka Ziyoni, sona akwiza pakuboneka mubuchindamu bwache.

¹⁷ Akwiza pakwamula inyiputo izya bapotwe, sona atakwiza pakukusulannya ukulaba kwabo.

¹⁸ Izi zisimbiwanje pachifukwa icha nkulilo izya muntazi, umwakuti abantu babo batapapiwe bamupalaye u Mwene.

¹⁹ Po u Mwene akennya pasi bo ali mubuzilo bwache ubuzelu kumwanya, bo ali kumwanya akennya pachisu ichapasi,

²⁰ ukuti ivwe ukukoloma ukwa bakayidi, umwakuti po abasatule babo bali papipi pakufwa.

²¹ Po itabwa ilya Mwene likwiza pakufumusiwa mu Ziyoni, sona akwiza pakupaliwa mu Yelusalemu,

²² bo abantu bosi na mabumwene, babungana poka pakumwiputa u Mwene.

²³ Akamazya amaka ghane, bo inchili ne mwana munandi, sona akefyako amasiku ghane.

²⁴ Po nkati, “Wee Chala wane, utakanyefyanje bo inchili intaghosipite, amaka ghako ghatakwanduka mupaka bwila na bwila.

²⁵ Pakwanda ukala ulwalo lwachisu ichapasi, sona kumwanya yo mbombo izya nyobe zyako.

²⁶ Ivintu vyosi vikwiza pakuzimila, loli ukwiza pakubangako bwila na bwila. Sona vyosi vikwiza pakukulupa ngati menda. Ukwiza pakubandula ngati menda, sona bakwiza pakuchuja.

²⁷ Loli awe ukubanga bulabula, sona amaka ghako ghatakwiza pakumalapo nalumo.

²⁸ Abana aba babombi bako bakwiza pakwikala pamaso papako, sona abaluko lwako bakwiza pakwikalana pamaso papako.”