Masalimo 10 - IBAYIBOLO 2024

Ulwiputo ulwakulaba ubwanaloli

¹ Wee Mwene nkimba choni chicho wimiliye kubutali nane? Nkimba choni chicho ukundeka ne mwene pakabalilo akantamyo?

² Pachifukwa icha kwituvya, umuntu umubibi, akumuvwima umuntu umudedebazu, abapina bakulemiwa muvipingo vivyo ababibi bateghite.

³ Umubibi akwituvya ni vinyonywa ivya moyo wache, sona akumupala umupafu nukumusamula u Mwene.

⁴ Umuntu uwamituvyo atakumulondelezya u Chala, sona akwinong'ona mumoyo wache ukuti u Chala ataliko.

⁵ Ivintu vyache vikumwendelagha akiza, akwituvya sona indaghilo zyako ate nazyo ni mbombo, po akubobezya abalwani bache bosi.

⁶ Akunena mwene akuti, “Ane intangayingana nukuyingana. Akabalilo kosi nkwiza pakuhobokagha, sona intangakomana nintamyo.”

⁷ Mumulomo wache mwizuye vyo vighune, nu bumyasi, na mazyu amababe. Ululimi lwache lope lukwiza pakubapelela bulo abanji intamyo, sona ni mbibi.

⁸ Akubavwamilila abantu mutwaya, nukubaghogha babo bate ninongwa mubusyefu. Akubatendela mubuchevu abantu abakusobelwa.

⁹ Akumuvwamilila ngati nkalamu ukuti abalemaye abapotwe, akubalema abapotwe nukubawesela muchilepa chache.

¹⁰ Pachifukwa icha maka ghache, abapina bakukanyililiwa nukuwa pasi

¹¹ Akunena mwene akuti, “U Chala aluvizye, avwinkite icheni chache, sona atakwennya nalumo.”

¹² Wee Mwene, vundumuka, lanjizya amaka ghako, wee Chala. Utakabaluvyanje abapotwe.

¹³ Nkimba choni chicho umuntu umubibi akumusamula u Chala? Nkimba choni chicho akunena mwene ukuti, “Atakwiza pakunfunda?”

¹⁴ Wee Chala, loli ukuzyennya intamyo na mayimba, sona wiyanizye pakubombapo zimo. Abapotwe bala bakwibika bene munyobe zyako, we mwavwilizi uwa balanda.

¹⁵ Ughamazyanje amaka agha muntu umubibi, sona nu mubomba mbibi. Umufundaye pachifukwa icha mbibi zyache, ukuti atakazibombaye sona.

¹⁶ U Mwene weyuyo akulaghila bwila na bwila, Inko zikwiza pakuzimila muchisu chache.

¹⁷ Wee Mwene ukwivwa ukulaba ukwa bantu abakwiyisya, ughakazyanje amoyo ghabo nukwivwa inyiputo zyabo.

¹⁸ Ubimilaye abalanda na bakuyiviwa ukuti umuntu wesi, yuyo akwikala pachisu ichapasi, atakaboghofyanje sona.