Maliko 9 - IBAYIBOLO 2024

¹ U Yesu akendelela pakunena ukuti, “Naloli nkubabuzya ukuti balipo abantu bamo pano, babo bate bakafwe mupaka babwennye Ubumwene ubwa Chala bukwiza na maka.”

U Yesu akwanduka pighamba

² Bo ghachilapo amasiku sikisi u Yesu akasenda u Pitala nu Yakobo nu Yohani nukukwela nabo pighamba itali nkani, kuko bakaba bene. Bo bakumwennya, akabonekele aka Yesu kakanduka,

³ sona amenda ghache ghakanyezimilagha, ghakaswepa nkani ukuchila namumo umuntu wesi muchisu ichapasi angachapila.

⁴ Po abamanyili batatu bala bakamwennya u Eliya nu Mozesi bakunenezannya nu Yesu.

⁵ U Pitala akamubuzya u Yesu akati, “Wee Mumanyisi, chizapo ukuti aswe tuli pano! Tukwiza pakuzenga ivisakasa vitatu, choka chako, ichinji icha Mozesi, sona nicha Eliya.”

⁶ Bakachenuka nkani, umwakuti u Pitala atakamanya izya kunena.

⁷ Ibingu likaboneka nukubakupikila, po izyu likivwika mwibingu likati, “Uyu Mwana wane umughaniwa. Mumwivwilaye!”

⁸ Umwalubilolubilo abamanyili bakatalankannya nukumwennya u Yesu mwene ali nabo, patakabapo nayumo umuntu uyunji.

⁹ Bo bakwika pighamba, u Yesu akabasoka ukuti batakamubuzyepo nayumo umuntu ni vintu vivyo bakavyennya mupaka u Mwana uwa Muntu azyuke kubufwe.

¹⁰ Abamanyili bakivwila vivyo akabasoka, loli benebene bakanda pakulalusannya ukuti, “Nkimba ukuzyuka kubufwe chikung'anamula ichoni?”

¹¹ Bakamulalusya u Yesu bakati, “Nkimba choni chicho abamanyisi aba Ndaghilo bakunena ukuti u Eliya abaghiye ize tasi?”

¹² U Yesu akamula akati, “Naloli u Eliya abaghiye ize tasi ukuti ayanizye zila vyosi. Loli nkimba choni chicho Amasimbo ghakuti u Mwana uwa Muntu akwiza pakuyimba nkani nukukaniwa?

¹³ Loli nkubabuzya ukuti u Eliya izite kale, po abantu bakamubombela namumo bakalondelagha ukuyana na Amasimbo aghakunena nizya yuyo.”

U Yesu akumupozya umulumendo uwa muzimu umubibi

¹⁴ Bo u Yesu na bamanyili batatu bala bongana na bamanyili abamwabo, bakagha ichilundilo ichikulu chibazyunguliye. Abamanyisi bamo aba Ndaghilo bakadalinkana nabo.

¹⁵ Bo abantu bamwennya u Yesu, bakaswigha nkani nukumuchimbilila pakumulamuka.

¹⁶ U Yesu akabalalusya abamanyili bache akati, “Nkimba mukudalinkana nabo choni?”

¹⁷ Umuntu yumo muchilundilo akamula akati, “Wee Mumanyisi, niza nu mwana wane kukwako pakuti ali nu muzimu umubibi sona akupotwa pakunena.

¹⁸ Posi papo umuzimu umubibi wamulema, ghukumusumbila pasi, akafumagha itatafulu ku mulomo. Akusyeketula amino ghache, sona umubili wache ghosi ghukuma. Nkabalaba abamanyili bako ukuti bawefye umuzimu umubibi, loli bakapotwa.”

¹⁹ U Yesu akababuzya akati, “Mwe bantu abankulilo iyi mwe basita lwitiko! Nkimba nikale namwe mupaka liyi? Fwandi nkibe namwe mupaka liyi? Zagha nawe umulumendo kuno.”

²⁰ Bakiza nawe kukwache. Bo umuzimu umubibi wamwennya u Yesu, ghukamuyingannya umulumendo yula. Akawa pasi nukwanda pakukunkuna, po itatafulu likafumagha ku mulomo.

²¹ U Yesu akamulalusya uwise akati, “Umulumendo uyu andite liyi pakuba bunubu?” Uwise akamula akati, “Ukufuma kubwana bwache.

²² Akabalilo akinji umuzimu umubibi wamusumbilagha pamoto na mumizi ukuyezya pakumughogha. Tupelele ichisa, sona utwavwe, nanti ungachibomba!”

²³ U Yesu akati, “Choni chicho mukunena ukuti, ‘Nanti ungachibomba?’ Vyosi vipepe bulo nu muntu yuyo ali nulusubilo.”

²⁴ Panapo na panapo uwise uwa mulumendo akalila akati, “Indi nu lwitiko, loli unyavwe ukuti imbanje nalo lwamaka!”

²⁵ Bo u Yesu ennya ukuti ichilundilo chanda pakupalamila kukwabo, akaghulamula umuzimu umubibi akati, “We muzimu uwamapuli nuwachinunu, nkukulamula epamo mu mulumendo uyu, utakinjile sona!”

²⁶ Umuzimu ghukakolomoka, ghukamuneng'ennya nkani nukwepamo. Umulumendo yula akaboneka ngati po afuye, po abantu bosi bakati, “Mwee! Umulumendo atuleka.”

²⁷ Loli u Yesu akamulema inyobe nukumunyamusya, po umulumendo yula akimilila.

²⁸ Bo u Yesu injila munyumba, abamanyili bache bakamulalusya kulubazu bakati, “Nkimba choni chicho aswe tukapotwa pakwefya umuzimu ghula?”

²⁹ U Yesu akamula akati, “Nachimo chicho chingefya umuzimu ghunughu, loli inyiputo zyene.”

U Yesu akunena sona nizya bufwe nukuzyuka kwache

³⁰ U Yesu na bamanyili bache bakanyamuka nukudumusannya muchigaba icha Galileya. U Yesu atakalonda ukuti nayumo umuntu amanye kuko akaba,

³¹ pakuti akabamanyisya abamanyili bache. Akababuzya akati, “U Mwana uwa Muntu akwiza pakubikiwa munyobe izya balwani, babo bakwiza pakumughogha. Loli bo ghachilapo amasiku matatu akwiza pakuzyuka kubufwe.”

³² Loli abamanyili bala batakivwisya zizyo akanenagha, po bakanyila pakumulalusya.

Wewenu yuyo we songo nkani?

³³ U Yesu na bamanyili bache bakafika mu Kapelinahumu. Bo binjila munyumba u Yesu akabalalusya akati, “Choni chicho mukadalinkanagha muzila?”

³⁴ Loli batakamwamula pakuti muzila bakadalinkanagha benebene ukuti wewenu we songo nkani pakasi papabo.

³⁵ U Yesu akikala pasi, akabitizya abamanyili 12 bala nukubabuzya ukuti, “Umuntu wesi yuyo akulonda pakuba wakwanda, ibike mwene wabumalilo pa bosi nukuba mubombi uwa bosi.”

³⁶ Po akamusenda umwana nukumwimika pakasi papabo. Akamufukatila nukubabuzya ukuti,

³⁷ “Umuntu wesi yuyo akumupokela weka u uwa bana aba pachifukwa icha nene, kokuti akumpokela nene. Umuntu wesi yuyo akumpokela akiza, kokuti atakumpokela nemwene, loli akumupokela na wepe bulo yuyo akantuma.”

Yuyo atakudalinkana naswe, witu

³⁸ U Yohani akamubuzya akati, “Mumanyisi, tukamwennya umuntu yumo akwefya imizimu imibibi mwitabwa lyako, po tukamukanizya pakuti atakaba uwa kabukatila kitu.”

³⁹ U Yesu akababuzya abamanyili bache akati, “Awe mutakamukanizyanje pakuti nayumo umuntu yuyo akubomba ichika mwitabwa lyane, akabalilo kanako nukunsamula.

⁴⁰ Pakuti umuntu wesi yuyo atakudalinkana naswe, witu.

⁴¹ Naloli nkubabuzya ukuti umuntu wesi yuyo akubapa amizi aghakung'wela pachifukwa ichakuti mwe ba Kilisitu, naloli nkubabuzya ukuti akwiza pakupokela umuvwalo wache.”

Injelo izyakubapuvya abantu

⁴² “Nanti umuntu yumo akupuvya weka uwa bana abanandi aba ukuleka pakunsubila, chingaba chizapo ukuti umuntu yula bamupinyilile ulwala ulukulu musingo nukumusumbila munyanja.

⁴³ Po nanti inyobe yako yikukupuvya, yidumule! Pakuti chizapo pakwinjila mubumi ubwa bwila na bwila umusita nyobe ukuchila pakwinjila ni nyobe zyosi zibili nukusumbiwa mu Gehena pamoto ghugho ghutakuzima nalumo.

⁴⁵ Nanti ulwayo lwako lukukupuvya, ludumule! Pakuti chizapo pakwinjila mubumi ubwa bwila na bwila umusita lwayo ukuchila pakwinjila ni nyayo zyosi zibili nukusumbiwa mu Gehena.

⁴⁷ Sona nanti ilyiso lyako likukupuvya, likolompolelyo! Pakuti chizapo pakwinjila mu Bumwene ubwa Chala ni lyiso lyoka ukuchila pakwinjila na maso ghosi mabili nukusumbiwa mu Gehena, pamoto ghugho ghutakuzima nalumo.

⁴⁸ Kuko ‘isomi zizyo zikubalya zitakufwapo nalumolumo numoto ghugho ghukubocha ghutakuzimapo nalumolumo.’

⁴⁹ “Umuntu wesi akwiza pakuswefiwa numoto ukuyana namumo ichakwiyipa chikuswefiwa ni mbeya.

⁵⁰ Imbeya nyiza, loli nanti imbeya yasupa, nkimba mungayipela bulibuli pakuba sona mbeya? Mubanje nacho chimo ngati yo mbeya, chicho chikubasuka mumoyo ghinyu nukwikala mumutende mukasi mumwinyu.”