Maliko 7 - IBAYIBOLO 2024

Ichimanyisyo icha banyenya

¹ Aba Falisayi bamo poka na bamanyisi aba Ndaghilo, babo bakiza ukufuma mu Yelusalemu, bakamubunganila u Yesu.

² Bakazyaghannya ukuti abamanyili bamo aba Yesu bakalyanga bo batasukusuye akiza munyobe, ukuyana namumo aba Falisayi bakalondelagha ukuti vibombiwanje.

³ Pakuti aba Falisayi naba Yuda bosi batangalya bo batasukusuye akiza munyobe. Bakubomba zinizi kokuti basungilile inyiho izya banyenya babo.

⁴ Sona batangalya chimo ichakufuma ku munalo pene papo bachisuka tasi. Bakukonka inyiho inyinji izinji izya banyenya babo, ngati kasukile akiza aka mbako, isonta, imbale ni vitala.

⁵ Po aba Falisayi na bamanyisi aba Ndaghilo bala bakamulalusya u Yesu bakati, “Nkimba choni chicho abamanyili bako batakukonka ichimanyisyo chicho bakatulekela abanyenya, loli bakulya bo batasukusuye akiza munyobe?”

⁶ U Yesu akabamula akati, “Mwe bazimbuli mwee! Naloli u Yesaya akanena ubwanaloli ukuyana namumo akasimbila ukuti, ‘Abantu banaba bakunchindika nu mulomo wene, loli amoyo ghabo ghali kubutali nkani nane.

⁷ Naloli bakunyiputa, loli ukwiputa kwabo kwabulo. Pakuti bakumanyisya indaghilo izya bantu ngati po zikufuma kwa Chala!’ ”

⁸ “Mukukana amalamulo agha Chala nukukonka inyiho izya bantu.”

⁹ U Yesu akendelela pakunena ukuti, “Muli ni zila inchevu nkani izyakukanila Indaghilo izya Chala ukuti mwendelele pakusungilila inyiho zyinyu.

¹⁰ Pakuti u Mozesi akalamula akati, ‘Chindika ughuso nu nyoko,’ sona ‘Umuntu wesi yuyo akumughuna uwise nu nyina aghoghiwanje.’

¹¹ Loli mukumanyisya ukuti, ‘Nanti umuntu akumubuzya uwise pamo unyina ukuti, “Uyu we kolobani,” (kokuti ichabupi chicho chapeghiwa kwa Chala),

¹² po umuntu yula mutakumwitikizya ukuti amwavwe uwise pamo unyina.’

¹³ Po mukughakana amazyu agha Chala ni nyiho zizyo mukulekelana nukubomba ivintu ivyinji ivinji ivi.”

Ivintu vivyo vingamunyazya umuntu

¹⁴ Po u Yesu akabitizya sona abantu bala nukubabuzya ukuti, “Ivwa kuno, amwe mwebosi nukwivwisya akiza.

¹⁵ Nachimochimo chicho chikwinjila mumuntu ukufuma kuzi ukwa mubili chicho chikumunyazya, loli chicho chikufuma mumuntu yula cho chicho chikumunyazya.”

¹⁷ Bo u Yesu achileka ichilundilo nukwinjila munyumba, abamanyili bache bakamulaba ukuti abalingannye ichili chila.

¹⁸ U Yesu akanena nabo akati, “Nkimba imitu yinyu yichili mikafu? Nkimba mutakwivwisya? Nachimo chicho chikwinjila mumuntu ukufuma kuzi ukwa mubili chicho chikumunyazya,

¹⁹ pakuti chitakwinjila mumoyo wache, loli mulwanda nukufuma kuzi.” (Pakunena zinizi u Yesu akang'anamula ukuti ivyakulya vyosi vyiza bulo pakulya.)

²⁰ Akendelela pakunena akati, “Chosi chicho chikufuma mumuntu cho chicho chikumunyazya.

²¹ Pakuti mumoyo uwa muntu, momumo mukufuma inyinong'ono imbibi, zizyo zikumulongolezya ukuti abombe ubwamalaya nu bwiba nu bughoghi,

²² nu bulowe nu bupafu nukwinong'onelana ivibibi nu bumyasi, na madinko, ni chinyonywa, ni yebo, na mituvyo nu bupunganu.

²³ Vyosi ivibibi ivi vikufuma mukasi mumuntu nukumunyazya.”

Ulwitiko ulwa mukolo

²⁴ U Yesu akepapo pabuzilo bula nukubuka muchigaba chicho chikaba papipi nakaya akakulu nkani aka Tile. Akinjila munyumba, atakalondagha nayumo umuntu amanye ukuti akaba mulamula, loli atakavwama.

²⁵ Umukolo yumo yuyo akaba nu mwana umulindu uwa muzimu umubibi, akivwa nizya Yesu. Panapo na panapo akiza nukwisumba munyayo izya Yesu.

²⁶ Umukolo yula atakaba mu Yuda, akapapiwa muchigaba icha Silofonike. Akamulaba u Yesu ukuti efyemo umuzimu umubibi mu mwana wache.

²⁷ Loli u Yesu akamula akati, “Leka tubalyesye tasi abana. Chite chiza pakusenda ichakulya icha bana nukuzisumbila imbwa.”

²⁸ Umukolo akamula akati, “Momumo Mwene, loli nimbwa zyope kusi ku tebulo zikulya utubululusya tuto abana bakulaghazya!”

²⁹ Po u Yesu akamula akati, “Chifukwa icha zizyo wamula, nyokela kukaya kako, umuzimu umubibi wepitemo mu mwana wako!”

³⁰ Umukolo yula akabuka nukumwagha umwana wache alambalaye pachitala, sona umuzimu umubibi wepitemo mumwache.

U Yesu akumupozya umuntu uwa mapuli ni chinunu

³¹ Po u Yesu akepamo muchigaba icha Tile nukudumusannya mu Sidoni ukwikila kunyanja iya Galileya nukubuka sona kuchigaba chosi icha Twaya Teni.

³² Abantu bamo bakiza nu muntu uwa mapuli ni chinunu nukumulaba u Yesu ukuti abike inyobe zyache pa muntu yula.

³³ Po u Yesu akamwefyapo pachilundilo pala nukubuka nawe palubazu. Akinjizya utufingwi mumakutu agha umuntu yula. Akafwina amati nukupalamasya ululimi lwache.

³⁴ U Yesu akennya kumwanya, akakoloma nukumubuzya umuntu yula ukuti, “Efata!” Chicho chikung'anamula ukuti, “Ighuka!”

³⁵ Panapo na panapo amakutu agha umuntu yula ghakighuka, ululimi lwache lukasatuka nukwanda pakugholosya pakunena.

³⁶ U Yesu akabalamula abantu bala akati, “Mutakamubuzyepo yumo.” Napapo akabasoka nkani, pope bakendelela pakufumusya nkani.

³⁷ Bosi babo bakivwa bakaswigha nkani nukuti, “Ivintu vyosi abomba akiza nkani! Abamapuli bakwivwa, abachinunu bakunena!”