Maliko 4 - IBAYIBOLO 2024

Ichili icha mupesambeyu

¹ U Yesu akanda sona pakumanyisya mulubazu ulwa Nyanja iya Galileya. Abantu babo bakamuzyungulila bakaba binji nkani, umwakuti u Yesu akinjila mubwato nukwikala mulamula, bo abantu bimiliye mulubazu ulwa nyanja.

² Akabamanyisya ivintu ivyinji muvyili akati,

³ “Ivwa kuno! Kukabako umuntu yuyo akabuka pakupesa imbeyu mumughunda wache.

⁴ Bo ali pakupesa, imbeyu zimo zikawila muzila, po iviyuni vikiza nukuzizompola.

⁵ Zimo zikawila pilyalabwe pakuti pakaba itope linandi. Umwalubilolubilo imbeyu zila zikamela pakuti patakabapo itope ilyinji.

⁶ Loli bo izuba lyakwela, imbeyu zila zikababuka pakuti amagululuzi ghakaba ghachili ghatayiye nkani pasi, sona imbeyu zila zikuma.

⁷ Imbeyu zimo zikawila pakasi pamivwa, ghagho ghakakula nukufyululusya imbeyu zila, po imbeyu zitakela ivikomwa.

⁸ Loli imbeyu zimo zikawila pitope ilyiza, zikamela nukukula, po nukwela ivikomwa; zimo zikela ivikomwa 30, zimo 60, izinji 100.”

⁹ U Yesu akati, “Yuyo ali na makutu aghakwivwila, ivwe!”

Ifundo iya vyili

¹⁰ Bo u Yesu ali mwene, bamo babo bakamwivwa bakiza poka na bamanyili 12 nukumulalusya ukuti abalingannye ivyili.

¹¹ U Yesu akamula akati, “U Chala abavumbulila vivyo vifisiwe ivya Bumwene bwache. Loli abantu babo bali kuzi bakwivwa vyosi muvyili,

¹² ukuti, ‘Bangennya nukwennya, loli bate bavyennyanje. Bangivwa nukwivwa, loli batangivwisya. Nanti bangamanya, bangapinduka nukuzileka imbibi zyabo, po u Chala angabahobokela imbibi zyabo.’ ”

U Yesu akulingannya ichili icha mupesambeyu

¹³ Po u Yesu akabalalusya akati, “Nkimba mutakwivwisya ichili ichi? Po mukwiza pakwivwisya bulibuli ivyili ivinji?

¹⁴ Umupesambeyu yula akupesa amazyu agha Chala.

¹⁵ Abantu bamo bayanite bulo ni mbeyu zizyo zikuwa muzila. Panapo nanti bivwa amazyu agha Chala, umwalubilolubilo u Satana akwiza nukwefyamo amazyu ghagho ghapesiwa mumwabo.

¹⁶ Abantu bamo bayanite bulo ni mbeyu zizyo zyawa pilyalabwe. Nanti abene bivwa bulo amazyu agha Chala, bakughapokela nu buhobosu.

¹⁷ Loli pakuti amazyu ghatakwinjila mukasi mumoyo ghabo, ghatakwikala akabalilo akatali. Po nanti intamyo pamo ukuvwimiwa kwafika pachifukwa icha mazyu, bakuwa umwalubilolubilo.

¹⁸ Abantu bamo bayanite bulo ni mbeyu zizyo zikuwa pakasi pamivwa. Aba bo bantu babo bakwivwa amazyu agha Chala.

¹⁹ Loli ukwikolezannya nivya muchisu ichapasi pano, ukuchighana ichuma, sona ni vinyonywa vyosi ivyakulekanalekana vikwinjila nukufyululusya amazyu ghala ukuti batakape ivikomwa.

²⁰ Loli abantu bamo bayanite bulo ni mbeyu zizyo zyapesiwa pitope ilyiza. Bakughivwa amazyu nukughitikizya nukupa ivikomwa, bamo 30, abanji 60, sona bamo 100.”

Inyale yiyo bayikupikiye ni sonta

²¹ U Yesu akabalalusya akati, “Nkimba alipo umuntu yuyo akusenda inyale nukuyikupikila ni sonta pamo ukuyibika kusi kuchitala? Nkimba atakuyibika pabuzelu?

²² Ichintu chosi chicho bachifisite chikwiza pakuvumbuliwa, sona ichintu chosi ichakubusyefu chikwiza pakuboneka pabuzelu.

²³ Yuyo ali na makutu aghakwivwila, ivwe!”

²⁴ Akababuzya sona akati, “Muchebaye nkani na zizyo mukwivwa! Ichipimilo chicho mukubombezya pabantu abanji, cho chicho u Chala akwiza pakubombezya papinyu, loli umwakuchilapo.

²⁵ Umuntu wesi yuyo ali nako kale kamo, akwiza pakumonjelezyapo ivyinji ukuchila. Loli umuntu wesi yuyo ate nako kamo, akwiza pakufyuliwa na kanandi bulo kako ali nako kale.”

Ichili icha kamelele na kakulile aka mbeyu

²⁶ U Yesu akababuzya sona akati, “Ubumwene ubwa Chala buyanite bulo nu muntu yuyo akupesa imbeyu mumughunda wache.

²⁷ Akughona pabusiku nukulamusya pandabindabi, pakabalilo kosi kanako izyene imbeyu zikumela nukukula, loli atakumanya namumo zikumelela nukukulila.

²⁸ Itope ilyene likumezya imbeyu nukwelezya, chikwanda tasi ichipembezannya, pisinda pache akamutu, pabumalilo akankoso kako kakwizula ni seke.

²⁹ Bo ivikomwa vyaghoma, umuntu yula akasenda isengo nukwanda pakudumula pakuti akabalilo akakwinulila kakwana.”

Ichili icha kambeyu akanandi aka ikwi

³⁰ U Yesu akalalusya akati, “Nkimba Ubumwene ubwa Chala buyanite ni choni? Fwandi chili choni chicho tungabombezya pakulingannya Ubumwene ubwa Chala?

³¹ Buyanite bulo nu muntu yuyo akusenda akambeyu akanandi aka ikwi, kako kambeyu kanandi nkani pachisu chosi ichapasi nukuyipesa mumughunda.

³² Loli bo ayipesa bulo, yikumela nukukula pakuba chibyalwa ichikulu nkani ukuchila imbeyu zyosi. Yikuba ni samba inkulu izyakuti ni viyuni vikulukamo ivivumbo vyabo.”

³³ U Yesu akalumbililagha amazyu ghache pakasi pabantu pakubombezya ivyili ivyinji nkani.

³⁴ Atakanenaghapo nachimochimo na bantu pakusita ukubombezya ichili. Loli bo ali mwene na bamanyili bache, akabalingannyanga vyosi.

U Yesu akuyipumizya impepo

³⁵ Pachamabwila pisiku lilalila, u Yesu akababuzya abamanyili bache akati, “Twende tulobokele kwisila ilinji ilya nyanja.”

³⁶ Po bakachileka ichilundilo icha bantu; abamanyili bache bakakwela mubwato mumo u Yesu akaba ikaye kale nukunyamuka poka nawe. Amabwato aghanji ghakabakonka.

³⁷ Umwakuchenusya bulo impepo iyakoghofya yikanda pakukuka, po amayigha ghakanda pakunyelela mubwato mula, umwakuti ubwato bukanda pakwizula na mizi.

³⁸ Loli u Yesu akaba kwisinda ku bwato kuko akaghona utulo, bo umutu wache ghuli pachinulilo. Abamanyili bakamunyamusya nukuti, “Wee Mumanyisi, nkimba utakupasya ukuti tuli pakudwiba?”

³⁹ U Yesu akanyamuka nukuyilamula impepo yila ukuti, “Banga myee!” Akaghabuzya amayigha akati, “Ima!” Impepo yikaleka, umwakuti panyanja pakaba myee nkani.

⁴⁰ U Yesu akabalalusya abamanyili bache akati, “Nkimba choni chicho mukunyila? Nkimba mupaka nilelo bulo muchili mute nu lwitiko?”

⁴¹ Loli bakanyila nkani nukulalusannya ukuti, “Nkimba muntu wenu yunuyu, umwakuti impepo na mayigha ghope vikumwivwila?”