Maliko 3 - IBAYIBOLO 2024

U Yesu akumupozya umuntu uwa nyobe indemazu

¹ U Yesu akinjila sona munyumba iyakwiputilamo. Mulamula mukabamo umuntu uwa nyobe indemazu.

² Abantu bamo palapala bakalondagha pakumwagha u Yesu ni chifukwa ichakumupelela inongwa, po bakamwenelezya nkani ukuti bennye nanti angamupozya umuntu yula Pisiku Ilyakutuzya.

³ U Yesu akamubuzya umuntu uwa nyobe indemazu yula akati, “Imilila, zagha kuntazi kuno.”

⁴ Po akabalalusya abantu bala akati, “Nkimba Indaghilo zyitu zikutwitikizya pakubomba ichoni Pisiku Ilyakutuzya? Nkimba pakubomba ichintu ichiza pamo ichibibi? Nkimba pakubupoka ubumi pamo pakubunangannya?” Loli abantu bala batakanenapo nachimochimo.

⁵ U Yesu akabenelezya abantu nu bukalale, loli akaba ni chitima pakuti bakaba na moyo amapalapala. Panapo akamubuzya umuntu yula akati, “Gholosya inyobe yako!” Akayigholosya, inyobe yache, po yikaba sona akiza.

⁶ Po aba Falisayi bakepamo nukubuka kuzi pakukomana umwalubilolubilo na bantu aba kabukatila aka Helodi pakwivwana namumo bangamughoghela u Yesu.

Ichilundilo chikumukonka u Yesu

⁷ U Yesu na bamanyili bache bakabuka kunyanja iya Galileya, po ichilundilo icha bantu aba mu Galileya, sona naba mu Yudeya chikamukonka.

⁸ Abantu banaba bakaba ba muchigaba icha Galileya, bamo ba muchigaba icha Yudeya, abanji ba mukaya aka Yelusalemu, bamo ba muchigaba icha Idumeya, abanji aba kwisila ukwa Ulusoko ulwa Yolodani, bamo ba muchigaba ichakupalamana nutwaya utwa Tile nu Sidoni. Abantu bosi banaba bakiza kwa Yesu pachifukwa ichakuti bakivwa zizyo akabombagha.

⁹ Ichilundilo chikaba chikulu nkani, umwakuti u Yesu akababuzya abamanyili bache ukuti bize nu bwato papipi ukuti abantu batakamufyenye.

¹⁰ Pakuti akapozya abinji, abantu bosi ababine bakasunkilizannyanga kupipi nawe ukuti bamupalamasye.

¹¹ Posi papo abantu babo bakaba ni mizimu imibibi bamwennya, bakawa pasi papipi nawe nukukolomoka ukuti, “Awe we Mwana uwa Chala!”

¹² Loli u Yesu akayisoka nkani imizimu imibibi yila ukuti yitakamuvumbulaye.

U Yesu akubasala abatumiwa 12

¹³ U Yesu akakwela pighamba nukubitizya abanavuli babo akalondagha. Bakiza kukwache,

¹⁴ nukusalapo 12 nukubita ukuti batumiwa. Akababuzya akati, “Nabasala ukuti mubanje nane. Nkwiza pakubatuma pakulumbilila,

¹⁵ mukwiza pakuba nu bulaghili ubwakwefesezya imizimu imibibi.”

¹⁶ Abanavuli 12 babo akabasala bo aba: U Simoni (yuyo u Yesu akamwita ukuti we Pitala),

¹⁷ nu Yakobo nu wamwabo nu Yohani, abana aba Zebediya (u Yesu akabita ukuti Bowanegesi, chicho chikung'anamula ukuti, “Bakali ngati kupaya ukwa vula”),

¹⁸ nu Andeleya nu Filipu nu Batolomeyo nu Matayi nu Tomasi nu Yakobo umwana uwa Alufeyo nu Tadayi nu Simoni uwa akabukatila, kako kakalondagha ukuti mu Izilayeli mubanje ubusatuke,

¹⁹ nu Yudasi Sikaliyoti, yuyo pisinda pache akamubika u Yesu munyobe izya balwani.

U Yesu nu Belezebuli

²⁰ Po u Yesu akinjila munyumba. Abantu abinji bakabungana sona, umwakuti u Yesu na bamanyili bache batakaba na kabalilo akakulyela.

²¹ Bo abakamu bache bivwa zinizi, bakabuka pakumulema pakuti abantu bakanenagha ukuti, “U Yesu apena.”

²² Abamanyisi bamo aba Ndaghilo babo bakafuma mu Yelusalemu bakati, “Ali nu Belezebuli, usongo uwa mizimu imibibi, yuyo akumupa amaka aghakwefesezya imizimu imibibi.”

²³ Po u Yesu akabitizya abantu bala nukunena nabo muvyili ukuti, “Nkimba u Satana angamwefya bulibuli u Satana?

²⁴ Nanti ubumwene bwasambukilana bwenebwene, ubumwene bula butangendelela,

²⁵ nanti abantu abamunyumba yoka basambukilana, inyumba yila yitangendelela.

²⁶ Po nanti ubumwene ubwa Satana bwasambukilana nukugabinkana, ubumwene bula butangendelela, bunubu bukwiza pakuba bumalilo bwache.

²⁷ “Nayumo umuntu yuyo angapankula inyumba iya muntu uwamaka nukusenda ivintu vyache vyosi, pene papo amupinya tasi umuntu uwamaka yula, po angasenda vyosi vivyo akulonda.

²⁸ “Naloli nkubabuzya ukuti abantu bangahobokeliwa imbibi zyabo zyosi na vyosi vivyo bangamusamula u Chala.

²⁹ Loli umuntu wesi yuyo akumusamula u Muzimu Umuzelu, atakwiza pakuhobokeliwa nalumolumo, pakuti ananga imbibi iya bwila na bwila.”

³⁰ (U Yesu akanena zinizi pakuti abantu bamo bakatinji, “Ali nu muzimu umubibi.”)

Unyina na bawamwabo aba Yesu

³¹ Unyina uwa Yesu na bawamwabo bakafika kunyumba kula nukwimilila kuzi, po akumutuma umuntu pakumwitizya.

³² Ichilundilo chikikala umwakumuzyungulila u Yesu nukumubuzya ukuti, “Unyoko na bawamwinyu bali kuzi, bakukulonda.”

³³ U Yesu akamula akati, “Nkimba umayi wane wewenu? Nkimba abawamwitu bo bawenu?”

³⁴ Akennya abantu babo bakikala umwakumuzyungulila nukuti, “Umayi wane na bawamwitu bo aba!

³⁵ Pakuti umuntu wesi yuyo akubomba zizyo u Chala akulonda, we wamwitu, we muyemba wane, sona we mayi wane.”