Maliko 2 - IBAYIBOLO 2024

U Yesu akumupozya umuntu umulemazu

¹ Bo ghachilapo amasiku manandi u Yesu akanyokela ku Kapelinahumu, ipangwi likasata ukuti ali munyumba yiyo akikalaghamo bwila.

² Abantu abinji bakabungana poka mupaka ubuzilo bukamala posi na palubinjilo bulo. Bo u Yesu akulumbilila Amazyu kukwabo,

³ abanavuli folo bakafika kukwache banyamuye umuntu umulemazu, bo alambalaye pachibonde.

⁴ Bakapotwa pakufika nawe papipi nu Yesu pakuti mukaba ichilundilo. Po bakapela ubwazi pachisonje icha nyumba yila, nukumwisizya pabuzilo bubo u Yesu akabapo bo alambalaye pachibonde.

⁵ Bo u Yesu ennya ulwitiko lwabo, akamubuzya umuntu umulemazu yula akati, “Wee mwana wane, imbibi zyako zyahobokeliwa.”

⁶ Abamanyisi bamo aba Ndaghilo babo bakaba palapala bakanda pakwilalusya bene mumoyo ghabo ukuti,

⁷ “Nkimba choni chicho akunena bunubu? Akumusamula u Chala! Nkimba ate we Chala mwene, yuyo angahobokela imbibi?”

⁸ Loli u Yesu akazimanya zizyo bakinong'onagha mumoyo ghabo, po akabalalusya akati, “Nkimba choni chicho mukwinong'ona bunubu mumoyo ghinyu?

⁹ Nkimba chili ko kwiyi chicho chipepe, pakumubuzya umuntu umulemazu uyu ukuti, ‘Imbibi zyako zyahobokeliwa,’ pamo pakumubuzya ukuti, ‘Nyamuka, nyamula ichibonde chako, endagha?’

¹⁰ Loli nkwiza pakubasimikizizya ukuti u Mwana uwa Muntu ali nu bulaghili pachisu ichapasi pano ubwakuhobokela imbibi.” Po akamubuzya umuntu umulemazu yula akati,

¹¹ “Nkukubuzya, nyamuka, nyamula ichibonde chako bwelagha.”

¹² Bo abantu bosi bakumwennya, umuntu yula akanyamuka, akasenda ichibonde chache nukubwela. Abantu bosi bakaswigha nkani nukumuchindika u Chala ukuti, “Tutachenizyepo nalumolumo ichi!”

U Yesu akumwitizya u Levi

¹³ U Yesu akabuka sona mulubazu ulwa Nyanja iya Galileya. Ichilundilo icha bantu chikiza kukwache, po akanda pakubamanyisya.

¹⁴ Bo u Yesu akwenda, akamwennya umusonkezya sonko, u Levi umwana uwa Alufeyo, bo ikaye munyumba iyakusonkelamo umusonko. Akamubuzya akati, “Nkonka.” Po u Levi akanyamuka nukumukonka.

¹⁵ Bo u Yesu akulya munyumba iya Levi, pakaba abasonkezya sonko abinji na bantu abambibi, babo bakalyanga nawe poka na bamanyili bache, pakuti babo bakamukonkagha bakaba binji.

¹⁶ Abamanyisi bamo aba Ndaghilo, babo bakaba ba Falisayi, bakennya ukuti u Yesu ali pakulya na bantu abambibi poka na basonkezya umusonko, po bakabalalusya abamanyili bache bakati, “Nkimba choni chicho akulya na bantu banaba?”

¹⁷ Bo u Yesu ivwa zinizi akabamula akati, “Abantu abapuma batakumulonda umughanga, loli bene babo babine. Ntizite pakwitizya abantu abagholosu ukuti bapinduke, loli nizite pakwitizya abantu abambibi.”

Bakumulalusya u Yesu nizya kutuzya pakulya

¹⁸ Akabalilo kamo abamanyili aba Yohani Uwalozyo naba Falisayi bakatuzya pakulya. Abantu bamo bakiza kwa Yesu nukumulalusya ukuti, “Nkimba choni chicho abamanyili aba Yohani Uwalozyo na bamanyili aba ba Falisayi bakutuzya pakulya, loli abamanyili bako batakutuzyapo pakulya?”

¹⁹ U Yesu akamula akati, “Nkimba chingabombiwa ukuti abayeni aba pasendwa batuzye pakulya bo umwenesendwa ali poka nabo? Awe! Pene papo umwenesendwa ali nabo batangatuzya.

²⁰ Loli isiku likwiza lilyo umwenesendwa bakwiza pakumwefyako kukwabo, po bakwiza ukutuzya pakulya.

²¹ “Nayumo umuntu yuyo angagambika ichigamba ichipya pamwenda uwakale, pakuti ichigamba ichipya chila chingatunkana nukuzepula umwenda uwakale nukupela ubwazi ubukulu.

²² Nayumo umuntu yuyo angapungulila uvinyo umupya mutunyambi utwa makwela utwakale. Nanti angabomba bunubu, uvinyo angazepula utunyambi, po vyosi vibili, uvinyo nu tunyambi vikwiza pakunanganika. Loli uvinyo umupya apunguliliwe mutunyambi utupya.”

Bakumulalusya u Yesu nizya Isiku Ilyakutuzya

²³ Pisiku limo Ilyakutuzya u Yesu akadumusannyanga mumaghunda agha ngano. Bo bakwenda, abamanyili bache bakanda pakupulula imitu iya ngano.

²⁴ Po aba Falisayi bakamulalusya u Yesu bakati, “Nkimba choni chicho abamanyili bako bakubomba zizyo zititikiziwe pakubombiwa Pisiku Ilyakutuzya?”

²⁵ U Yesu akamula akati, “Nkimba mutabelengitepo zizyo u Devedi na bantu bache bakabomba pakabalilo kako bakaba nizala, loli batakaba ni chakulya nachimo?

²⁶ Bo u Abiyatala we muputi usongo, u Devedi akinjila mu Nyumba iya Chala nukulya ichibama chicho chikabikiwa kwa Chala ukuti chibanje chakwiyipa. Ukuyana ni Ndaghilo zyitu, umuputi mwene weyuyo itikiziwe pakulya ichibama chila. Loli u Devedi akalya nukubapako abantu bache.”

²⁷ Pabumalilo u Yesu akati, “Isiku Ilyakutuzya likapeliwa ukuti limwavwe umuntu; umuntu atakapeliwa pakuba muzya uwa Isiku Ilyakutuzya.

²⁸ Polelo u Mwana uwa Muntu we Mwene uwa Isiku Ilyakutuzya.”