Maliko 15 - IBAYIBOLO 2024

U Yesu pamaso pa Pilati

¹ Pandabindabi nkani abaputi abasongo bosi, na balongozi aba Chiyuda, sona na bamanyisi aba Ndaghilo na balongi bosi bakakomana poka nukunenezannya benebene nizya Yesu. Bakamupinya u Yesu nukubuka nawe kwa Pilati.

² U Pilati akamulalusya akati, “Nkimba awe we Mwene uwa ba Yuda?” U Yesu akamula akati, “Wanena wemwene.”

³ Abaputi abasongo bakamutamantila u Yesu ivintu ivyinji,

⁴ po u Pilati akamulalusya sona akati, “Nkimba utakwamula? Ivwa ivintu vyosi vivyo bakukunenela.”

⁵ U Yesu akasona umulomo wache, chicho chikamuswighisya nkani u Pilati.

Kwadumuliwa ukuti u Yesu aghoghiwe

⁶ Pakabalilo kosi aka Lusekelo ulwa Pasa umulaghili uwa Chiloma akizubila pakumusatula umukayidi weka, yuyo abantu bamusala ukuti asatuliwe.

⁷ Pakabalilo kalakala umuntu yuyo bakatinji u Balabasi akaba mujele poka na babo bakalisambukila iboma nukughogha abantu pavyongo.

⁸ Bo ichilundilo icha bantu chabungana, chikanda pakumulaba u Pilati ukuti ababombele vivyo akizubilila.

⁹ Akabalalusya akati, “Nkimba mukulonda imbabulile u Mwene uwa ba Yuda?”

¹⁰ U Pilati akazimanya akiza nkani ukuti abaputi abasongo bamubikite u Yesu munyobe zyache pachifukwa icha kabini bulo.

¹¹ Loli abaputi abasongo bakasonjelezya abantu pakumulaba u Pilati ukuti amusatule u Balabasi, mubuzilo ubwa Yesu.

¹² U Pilati akachilalusya sona ichilundilo chila akati, “Nkimba po imbombe nawe ichoni yuyo mukuti we Mwene uwa ba Yuda?”

¹³ Abantu bakakolomoka nkani bakati, “Mukomele pachipinjika!”

¹⁴ U Pilati akalalusya akati, “Nkimba ananga ichoni?” Loli abantu bosi bakakolomoka nkani bakati, “Mukomele pachipinjika!”

¹⁵ U Pilati akalondagha pakuhobosya ichilundilo, po akabasatulila u Balabasi nukulamula ukuti u Yesu asyempiwe. Pisinda pache akamubika ukuti bamukomele pachipinjika.

Abasilikali bakumobezya u Yesu

¹⁶ Abasilikali bakamusenda u Yesu nukwinjila nawe mulubinjilo ulwa nyumba iya mulaghili uwa Chiloma nukubungannya poka akabukatila kosi aka basilikali ababwite.

¹⁷ Bakamuvwika u Yesu inkazo inchesamu, bakaluka impumpu iya mivwa nukumuvwika kumutu.

¹⁸ Po bakanda pakumulamuka ukuti, “Mwaghona Mwene uwa ba Yuda!”

¹⁹ Bakamukoma pamutu ni ndisa nukumufwinila amati, bakamufughamilila nukumuchindika.

²⁰ Bo baleka pakumobezya, bakamuvula inkazo inchesamu yila nukumuvwika sona amenda ghache. Po bakabuka nawe pakumukomela pachipinjika.

Bakumukomela u Yesu pachipinjika

²¹ Muzila bakakomana nu Simoni uwamu Kileni uwise uwa Alikizandala nu Lufu, yuyo akadumusannyanga bulo ukufuma mutwaya. Abasilikali ababwite bakamufyenga ukuti anyamule ichipinjika icha Yesu.

²² Bakamusenda u Yesu nukubuka nawe kubuzilo bubo bukwitiziwa ukuti Gologota, chicho chikung'anamula ukuti, “Ubuzilo bubo buyanite bulo ni fupa ilya kumutu.”

²³ Kulakula bakayezya pakumupa uvinyo uwakongannya nu mulembo uwa mila, loli u Yesu akakana pakung'wela.

²⁴ Po bakamukomela pachipinjika nukugabana amenda ghache pakupanga amayele ukuti bennye chicho umuntu wesi asende.

²⁵ Akabalilo kakaba nayini koloko pandabindabi bo bakamukomela u Yesu pachipinjika.

²⁶ Inongwa yiyo bakamughoghela u Yesu yisimbiwe ukuti, “Uyu we Mwene uwa ba Yuda.”

²⁷ Bakamukomela u Yesu pachipinjika palapala poka na mavyondongo mabili, lyoka kunyobe indilo, sona ilinji iya kumongo.

²⁹ Abantu babo bakadumusannyanga palapala bakapukuzya imitu yabo nukumusamula u Yesu ukuti, “Eya! Ute wewe ukatinji, ‘Nkwiza pakumongolannya Inyumba iya Chala nukuyizenga sona mumasiku matatu!’

³⁰ Losi ulu ika pachipinjika nukwipoka wemwene!”

³¹ Abaputi abasongo na bamanyisi aba Ndaghilo bope bakamobezya bakati, “Akabapokagha abantu abanji, loli atangipoka mwene!

³² Nanti naloli we Kilisitu u Mwene uwa ba Izilayeli, muleke ike pachipinjika losi ulu, po twennye nukumusubila!” Abantu babili babo bakakomeliwa poka nawe bope bakanda pakumobezya.

Ubufwe ubwa Yesu

³³ Pakasi pamusanya ichisi chikawa muchisu chosi, mupaka fili koloko pachamabwila.

³⁴ Pachamabwila pakabalilo aka fili koloko, u Yesu akalila nizyu ilya pamwanya nukuti, “Eloyi, Eloyi, lama sabakatani?” Ichi chikung'anamula ukuti, “Chala wane, Chala wane, wandeka?”

³⁵ Abantu bamo babo bakimilila palapala bakamwivwa nukuti, “Teghelezya akumwitizya u Eliya!”

³⁶ Umuntu weka akachimbila nukuyidwibika isipanji muvinyo uwakusapa. Akayisomeka kulutete nukumupa ukuti ang'wele, po akati, “Leka twennye nanti u Eliya angiza pakumwisya pachipinjika!”

³⁷ U Yesu akalila nizyu ilya pamwanya nukufuta akabumalilo.

³⁸ Umwenda uwakuzighila mu Nyumba iya Chala ghukazepuka pakasi ukwandila pamwanya mupaka muntende.

³⁹ Bo usongo uwa basilikali ababwite, yuyo akimilila palapala ennya namumo u Yesu akafwila. Akati, “Naloli uyu akaba Mwana uwa Chala!”

⁴⁰ Abakolo bamo bakenelezyanga pabutalipo. Pakasi pa bakolo balabala pakabapo u Maliya Magadalena nu Maliya unyina uwa Yakobo umunandi, sona nu nyina uwa Yosefu nu Salome.

⁴¹ Bakamukonka u Yesu bo ali mu Galileya nukumwavwa. Abakolo abinji babo bakiza mu Yelusalemu nawe bope bakaba palapala.

U Yesu abikiwa mwipumpa

⁴² Kakaba kabalilo akakuti kwanda pakwila pisiku ilya Chisano, lilyo aba Yuda bakiyannyanga nizya Isiku Ilyakutuzya.

⁴³ U Yosefu uwa mukaya aka Alimatiya, yuyo akaba muntu umumanyikwe uwa balongi, sona akalindililagha u Bumwene ubwa Chala, akabuka kwa Pilati nu bujivu pakumulaba ukuti amupe umuvimba uwa Yesu.

⁴⁴ U Pilati akaswigha bo ivwa ukuti u Yesu afuye kale. Akamwitizya usongo uwa basilikali uwabwite nukumulalusya nanti u Yesu afuye kale.

⁴⁵ Bo ivwa zizyo usongo uwa basilikali anena, u Pilati akamwitikizya u Yosefu ukuti angaghusenda.

⁴⁶ U Yosefu akaghula isanda, akisya umuvimba nukughunnyembetelela ni sanda yila. Akaghubika mwipumpa lilyo likakumbiwa bulo kwibwe. Pisinda pache akabunguluzya ibwe ikulu nukwighalila pamulyango wipumpa.

⁴⁷ U Maliya Magadalena nu Maliya unyina uwa Yosefu bakennya kuko umuvimba uwa Yesu ghukabikiwa.