Maliko 12 - IBAYIBOLO 2024

Ichili icha balimi aba mumughunda uwa mampesya

¹ Po u Yesu akanda pakunena nabo muvyili akati, “Kukabako umuntu yumo yuyo akabyala amampesya mumughunda wache, akaghuzengelela ulupaso umwakughuzyungulila, akakumba ichiliba ichakukanyilamo amampesya nukuzenga ichitembe. Akabazimya abalimi abanji, po umwenecho akanyamuka nukubuka kuchisu ichinji.

² Bo akabalilo kakwana akakuyabila amampesya, umuntu yula akamutuma uwambombo wache ku balimi bala ukuti bamupe amampesya ghache.

³ Abalimi bala bakamulema, bakamukoma uwambombo yula nukumubwezya nyobe zyene.

⁴ Po umwenecho uwa mughunda yula akamutuma sona uwambombo uyunji. Abalimi bala bakamuvulazya mumutu nukumuyivya nkani.

⁵ Umwenecho uwa mughunda yula akamutuma sona uwambombo uyunji, yuyo bakamughogha. Bakabayivya abanji abinji bunubu, bamo bakabakoma nukubaghogha abanji.

⁶ Pabumalilo umwenecho uwa mughunda yula akasyala nawe weka uwakuti amutume, yuyo akaba mwana wache umughaniwa mwene. Po akamutuma nukuti, ‘Inzimenye ukuti bakwiza pakumuchindika umwana wane.’

⁷ Loli abalimi bala bakanda pakunenezannya ukuti, ‘Yunuyu mwana wache, yuyo akwiza pakupyana ichilingo icha wise. Zagha tumughoghe umwakuti ichilingo chibanje chitu!’

⁸ Po bakamulema umwana yula nukumughogha nukughusumba umuvimba wache kuzi ukwa mughunda uwa mampesya.”

⁹ U Yesu akalalusya akati, “Nkimba umwenecho uwa mughunda akwiza pakubomba choni? Akwiza pakubaghogha abalimi bala nukubazimya umughunda abalimi abanji.

¹⁰ Nkimba mutabelengite Amasimbo aghakuti, ‘Ibwe lilyo abazengi bakalikana ukuti lite ni mbombo ilelo lyaba lyakulondiwa nkani ukuchila amabwe ghosi?

¹¹ Ichi chikabombiwa nu Mwene, po chakuswighisya nkani kukwitu!’ ”

¹² Bo abalongozi aba Chiyuda bazyaghannya ukuti u Yesu akanenagha nizya babo muchili chilachila, bakanda pakulonda izila iyakumulemela. Loli bakanyilagha abantu bala, po bakamuleka nukwepapo.

Bakumulalusya u Yesu nizya kusonka umusonko

¹³ Aba Falisayi bamo poka na bantu bamo aba mukabukatila aka Helodi bakatumiwa kwa Yesu ukuti bamuteghe mukanenele kache.

¹⁴ Bo bafika bakati, “Wee Mumanyisi, tuzimenye ukuti ukunena ubwanaloli ukusita pakupasya na zizyo abantu bakwinong'ona. Utakwennya icheni icha muntu, loli ukumanyisya ubwanaloli bubo u Chala akulonda ukuti abantu babombaye. Tubuzye, nkimba Indaghilo zyitu zikutwitikizya pakusonka umusonko kwa Kesale? Nkimba tusonke pamo awe?”

¹⁵ Loli u Yesu akennya ubuzimbuli bwabo nukwamula ukuti, “Nkimba choni chicho mukuyezya pakuntegha? Mpanga yimo isalabazya ukuti injennye.”

¹⁶ Bakamupa yoka, po akabalalusya akati, “Nkimba icheni ni tabwa vivyo vili apa vyawenu?” Bakamula bakati, “Vya Kesale.”

¹⁷ Po u Yesu akati, “Ivya Kesale mumupe u Kesale; ivya Chala mumupe u Chala.” Bo abantu bivwa zinizi, amahala ghakabamalila.

Bakumulalusya u Yesu nizya kuzyuka kubufwe

¹⁸ Pisinda pache aba Sadukayi bamo babo bakatinji abantu bate bakazyuke kubufwe, bakiza kwa Yesu nukuti,

¹⁹ “Wee Mumanyisi, u Mozesi akatusimbila ululaghilo ulwakuti, ‘Nanti umwanavuli afwa nukumuleka umuchi ukusita ukupapa nawe abana, uwamwabo uwa mwanavuli yula amupyane umufwilwe yula umwakuti apape nawe abana, babo bakwiza pakubasenda ngati bana abamuyazi yula.’

²⁰ Kukabako abawamwabo seveni. Usongo akasenda nukufwa umusita bana.

²¹ Uwabubili akapyana umufwilwe yula wepe akafwa umusita bana. Ichi chikabombiwa bunubu ku batatu,

²² mupaka na banji bosi. Bosi seveni bakapyana umukolo yula nukufwa abasita bana. Pabumalilo, umukolo wepe akafwa.

²³ Pisiku ilyakuzyuka kubufwe, nkimba umukolo yula akwiza pakuba muchi wawenu pakuti bosi seveni bala bakamusendapo?”

²⁴ U Yesu akabamula akati, “Mukupuvya nkani, pakuti mutaghamenye Amasimbo pamo amaka agha Chala.

²⁵ Pakuti bo abantu abafwe bazyuka, kute kukabeko isendwa pakuti bosi bakwiza pakuyana bulo na bantumi kumwanya.

²⁶ Loli nizya kuzyuka ukwa bantu abafwe, nkimba mutabelengitepo nalumolumo mwibuku ilya Mozesi pabuzilo bubo bukunena nizya ukwaka ukwa mpanya? Amasimbo ghakuti u Chala akamubuzya u Mozesi akati, ‘Ane ne Chala uwa Abulahamu nu Chala uwa Yisaki sona nu Chala uwa Yakobo.’

²⁷ We Chala uwa bantu abumi, ate uwa bantu abafwe. Mukupuvya nkani!”

Ilamulo ikulu nkani

²⁸ Umumanyisi yumo uwa Ndaghilo akabivwa bakudalinkana. Bo ennya ukuti u Yesu abamuye akiza aba Sadukayi, po akamulalusya u Yesu akati, “Lilamulo lyoni lilyo likulu nkani ukuchila ghosi?”

²⁹ U Yesu akamwamula akati, “Ilamulo ikulu nkani paghosi lyo ili, ‘Teghelezya mwe ba Izilayeli! U Mwene u Chala witu, we Mwene weka mpela.

³⁰ Mumughanaye u Mwene u Chala winyu nu moyo winyu ghosi nu muzimu winyu ghosi ni nyinong'ono zyinyu zyosi na maka ghinyu ghosi.’

³¹ Ilyabubili ikulu lyo ili, ‘Umughanaye umupalamani wako ukuyana namumo wiyighaniye wemwenecho.’ Nalimo ilamulo ilinji ikulu ukuchila mabili agha.”

³² Umumanyisi uwa Ndaghilo yula akati, “Wanena akiza, mumanyisi! Naloli, mumo ukunenela ukuti u Mwene we Chala mwene nukuti atalipo uyunji loli weka mpela.

³³ Umughanaye u Chala nu moyo wako ghosi ni nyinong'ono zyako zyosi na maka ghako ghosi. Umughanaye umupalamani wako ukuyana namumo wiyighaniye wemwenecho. Chapamwanya nkani ukukonka indaghilo zibili izi nukuchila ukubika ivyakwiyipa ivya vinyamana ivyakocha ni vinji ivyabupi kwa Chala.”

³⁴ U Yesu akennya ukuti umuntu yula akamula na mahala, po akamubuzya akati, “Ute kubutali nu Bumwene ubwa Chala.” Bo anena zinizi, nayumo umuntu yuyo akajimbagha umoyo pakumulalusya sona u Yesu.

Nizya Kilisitu u Mwana uwa Devedi

³⁵ Bo u Yesu akumanyisya mu Nyumba iya Chala, akalalusya akati, “Choni chicho abamanyisi aba Ndaghilo bakutinji u Kilisitu akwiza pakuba waluko ulwa Devedi?

³⁶ Na maka agha Muzimu Umuzelu u Devedi akati, ‘U Mwene akamubuzya u Mwene wane akati: Ikala apa kunyobe yane indilo mupaka imbabike abalwani bako kusi kunyayo zyako.’

³⁷ “U Devedi umwenecho akamwitizya ukuti Mwene, po u Kilisitu angaba bulibuli waluko ulwa Devedi?” Abantu abinji nkani bakamuteghelezyanga u Yesu umwakuhoboka nkani.

U Yesu akubasoka abantu nizya bamanyisi aba Ndaghilo

³⁸ Bo abamanyisya akati, “Mubanje maso na bamanyisi aba Ndaghilo, babo bighanite pakwendakwenda bo bavwalite inkazo zyabo intali nukuti abantu babalamukaye nu muchizi muminalo.

³⁹ Bakwighana pakwikala pa vitengo ivya pamwanya munyumba izyakwiputilamo nukwikala pabuzilo ubwa muchizi palusekelo.

⁴⁰ Loli bakubazimbula abakolo abafwilwe nukubafyula inyumba zyabo nukwiputa inyiputo intali ukuti abantu babennye. Abantu aba bakwiza pakufundiwa nkani!”

Ichakusopa icha mukolo umufwilwe

⁴¹ U Yesu akikala mu Nyumba iya Chala kupipi ni chakusopelamo ivyabupi nukwenelezya mumo abantu bakasopelagha indalama zyabo. Abantu abinji abakabi bakasopagha indalama inyinji.

⁴² Loli umukolo umufwilwe umupina akiza nukusopa isalabazya zibili.

⁴³ Akabitizya abamanyili bache poka nukubabuzya ukuti, “Naloli nkubabuzya ukuti umukolo umufwilwe umupina uyu, asopa indalama inyinji muchakusopelamo ukuchila abantu bosi abanji.

⁴⁴ Pakuti abanji bosi basopa zizyo basabulapo bulo pabukabi bwabo; loli umukolo uyu nu bupina bwache, asopa zyosi zizyo akaba nazyo ukuti zingamusunga.”