Maliko 11 - IBAYIBOLO 2024

U Yesu akwinjila mu Yelusalemu nu bupoti

¹ Bo u Yesu na bamanyili bache bapalamila ku Yelusalemu, papipi nutwaya utwa Betifage nu Betaniya, bakafika Pighamba ilya Misyunguti. U Yesu akabatuma abamanyili bache babili.

² Akababuzya akati, “Bukagha mukaya kako kali kuntazi kwinyu. Bo mwinjila bulo, mukwiza pakumwagha umwana uwa mpunda bamupinyiliye, yuyo batakwelitepo nalumo. Mumusatule nukwiza nawe kuno.

³ Nanti umuntu yumo akubalalusya ukuti, ‘Nkimba choni chicho mukubomba bunubu?’ Mumubuzye ukuti, ‘U Mwene akumulonda, loli akwiza pakumunyosya lunulu.’ ”

⁴ Po bakabuka nukwagha umwana uwa mpunda yula bamupinyiliye pamulyango uwa nyumba papipi nu musebo. Bo bali pakumusatula,

⁵ abantu bamo babo bakimilila palapala bakabalalusya bakati, “Nkimba choni chicho muli pakumusatula umwana uwa mpunda?”

⁶ Bakamula ukuyana namumo u Yesu akababuzizya, po abantu bala bakabitikizya ukuti babukaye nawe.

⁷ Bo abamanyili bala biza nawe kwa Yesu, bakatenga amenda ghabo panyuma iya mpunda yila, po u Yesu akakwelapo.

⁸ Abantu abinji bakatenga amenda ghabo mumusebo, sona abanji bakatenga isamba zizyo bakadumula mumaghunda.

⁹ Abantu babo bakaba kuntazi na kwisinda ukwa Yesu bakanda pakukolomoka ukuti, “U Chala apaliwanje! U Chala amusaye yuyo akwiza mwitabwa ilya Mwene!

¹⁰ Busayiwa Ubumwene ubwa tata witu u Mwene u Devedi, bubo bukwiza! U Chala uwakumwanya apaliwanje!”

¹¹ Bo u Yesu afika bulo mu Yelusalemu, akinjila mu Nyumba iya Chala nukutalankannya vyosi vivyo vikaba mulamula. Loli pachifukwa ichakuti kukaba ukuti kwila kale, akabuka mu Betaniya na bamanyili bache 12 bala.

U Yesu akuchighuna ichikuyu

¹² Ilyandabi, bo bakufuma mu Betaniya, u Yesu izala yikamulema.

¹³ Akachennya pabutalipo ichikuyu chivwinkite na mani, po akabuka ukuti ennye nanti angavyaghamo ivikomwa ivya makuyu. Bo afika pachikuyu chila, atakavyaghamo ivikomwa ivya makuyu, loli amani ghene, pakuti katakaba akabalilo kache akakwelela.

¹⁴ U Yesu akachibuzya ichikuyu chila akati, “Wee chikuyu, nayumo umuntu yuyo akwiza pakulyamo nalumolumo ivikomwa ivya makuyu mumwako!” Abamanyili bache bakamwivwa akunena zinizi.

U Yesu mu Nyumba iya Chala

¹⁵ Bo bafika mu Yelusalemu, u Yesu akinjila mu Nyumba iya Chala nukwanda pakubachimbizyamo abantu bosi babo bakaghulagha nukughulizya. Akaghalabulannya ututalati utwa baghulizannya indalama ni vitengo ivya bantu babo bakaghulizyanga inkunda.

¹⁶ Atakitikizyanga yumo ukudumusannya palubinjilo ulwa Nyumba iya Chala bo anyamuye ichintu chimo.

¹⁷ Po akanda pakubamanyisya abantu ukuti, “Amasimbo ghakuti, ‘Inyumba yane yikwiza pakwitiziwanga nyumba iyakwiputilamo abantu aba inko zyosi.’ Loli amwe mwayipela pakuba nyumba iyakuvwamilamo amavyondongo!”

¹⁸ Abaputi abasongo na bamanyisi aba Ndaghilo bakivwa zinizi, po bakanda pakulonda izila iyakumughoghela u Yesu. Bakamunyilagha pakuti ichilundilo chosi chikaswigha nkani nu bumanyisi bwache.

¹⁹ Bo kwanda pakwila, u Yesu na bamanyili bache bakepamo mukaya kala.

Ichimanyisyo icha chikuyu

²⁰ Pisiku ilinji pandabindabi, bo bakwenda mumusebo, bakachennya ichikuyu. Chikuma ukwandila ku mani mupaka na magululuzi.

²¹ U Pitala akakumbuka chicho chikabombiwa nukumubuzya u Yesu ukuti, “Wee Mumanyisi, ennya, ichikuyu chicho ukachighuna chumiye!”

²² U Yesu akabamula akati, “Mubanje nu lwitiko mwa Chala.

²³ Naloli nkubabuzya ukuti umuntu wesi yuyo akulibuzya lighamba ili ukuti, ‘Nyamuka nukwisumbila munyanja,’ nukusita ukwilamwa mumoyo wache, loli akusubila chicho anena ukuti chikwiza pakubombiwa, naloli chikwiza pakubombiwa.

²⁴ Pachifukwa ichi nkubabuzya ukuti bo mukwiputa nukulaba chimo kwa Chala, subila ukuti mwachipokela, po mukwiza pakupokela chosi chicho mwalaba.

²⁵ Bo mukulonda pakwiputa, mubahobokelaye tasi abantu bosi babo babanangiye. Po Ughuso wepe yuyo ali kumwanya akwiza pakubahobokela imbibi zyinyu.”

Ilalusyo nizya bulaghili ubwa Yesu

²⁷ Bakiza sona mu Yelusalemu. Bo u Yesu akwenda bulo mu Nyumba iya Chala, abaputi abasongo, na bamanyisi aba Ndaghilo na balongozi aba Chiyuda bakiza kukwache

²⁸ nukumulalusya ukuti, “Nkimba bulaghili boni bubo uli nabo pakubomba zinizi? Nkimba wewenu akakupa ubulaghili bunubu?”

²⁹ U Yesu akabamula akati, “Leka imbalalusye ilalusyo lyoka bulo, po nanti mwanyamula, nkwiza pakubabuzya ubulaghili bubo indi nabo pakubomba zinizi.

³⁰ Mumbuzye, nkimba ubulaghili bubo u Yohani akozezyanga nabo bukafuma kwiyi: Kwa Chala pamo ku bantu?”

³¹ Bakanda pakudalinkana benebene ukuti, “Nkimba tunganena ichoni? Nanti tukuti bukafuma kwa Chala, akwiza pakunena ukuti, ‘Choni chicho mutakamusubilagha u Yohani?’

³² Loli nanti tukuti, ‘Bukafuma ku bantu’ ” (Bakanyilagha abantu pakuti umuntu wesi akazimanya ukuti u Yohani akaba mulaghuzi wanaloli.)

³³ Po bakamwamula u Yesu bakati, “Awe, tutazimenye.” Po u Yesu akababuzya akati, “Nane bulo ntakwiza pakubabuzya ubulaghili bubo indi nabo ubwakubombela zinizi.”