Malaki 3 - IBAYIBOLO 2024

¹ U Mwene Uwamaka Ghosi akuti, “Ennya, nkwiza pakuyituma intumi yane kuntazi kukwane ukuti yinjanizizye izila. Po umwakuchenusya bulo u Mwene yuyo mukumulonda akwiza mu Nyumba yache. Intumi iya lufingo yiyo muyisambite yikwiza.” U Mwene Uwamaka Ghosi anena.

² Nkimba wewenu yuyo angajimba pisiku ilyakwiza kwache? Nkimba wewenu yuyo angima nanti aboneka? Pakuti akwiza pakuba ngati moto uwa mumuvuno ghugho ghukusunguluzya ichela, sona ngati muntu yuyo akuchapila isopo.

³ Akwiza pakwikala pasi ngati wakusungunula nu wakuswefya u siliva, akwiza pakubaswefya aba Levi pakuba ngati we golide nu siliva. Po bakwiza pakuba bantu babo bakubika ivyabupi mubugholosu kwa Mwene.

⁴ Po u Mwene akwiza pakuhoboka ni vyakwiyipa ivya bantu aba muchisu icha Yuda naba mu Yelusalemu ngati mumo vikabela mumasiku aghakale, sona na mumaka aghakale.

⁵ U Mwene Uwamaka Ghosi akuti, “Nkwiza pakupalamila kukwinyu umwakuti imbalongaye. Ntakwiza pakuzyelazyela pakuba ne kaboni kubamayele na bamalaya na babo bakulapa ichilapo icha bumyasi na babo bakubazimbula abambombo amalipilo ghabo, na babo bakubayivya abakolo abafwilwe na bana abalanda pamo batakubabombela ubwanaloli abayeni, pakuti abantu banaba batakunchindika.

Nizya kubika ichigaba choka pavigaba teni

⁶ “Ane ne Mwene intakwandukakwanduka. Cho chifukwa amwe mwe baluko ulwa Yakobo mutazimiye zila.

⁷ Ukufuma pakabalilo aka banyenya binyu mukepukako ku ndaghilo zyane sona mutakazisunga.” U Mwene Uwamaka Ghosi anena, “Nyokela kukwane po nane nkwiza pakunyokela kukwinyu. “Loli mukulalusya mukuti, ‘Nkimba tunganyokela bulibuli?’

⁸ “Nkimba umuntu angamwibila u Chala? Loli pope bulo mukunyibila. “Mukulalusya mukuti, ‘Nkimba tukukwibila bulibuli?’ “Mukunyibila ichigaba choka pavigaba teni ni ivyakwiyipa.

⁹ Naloliloli webosi mwaghuniwa mweba luko losi, pakuti mukunyibila.

¹⁰ Mwizaye munyumba yane iyakusungulamo ivyabupi vyinyu ivya chigaba choka pavigaba teni ukuti munyumba yane mubanje ivyakulya ivyinji.” U Mwene Uwamaka Ghosi akuti, “Munjele umwakuti mwennye nanti inte nighule imilyango iyakumwanya nukubawisizya ulusayo ulwinji nkani umwakuti mutakwiza pakuba navyo ivyinji nkani.”

¹¹ U Mwene Uwamaka Ghosi akuti, “Nkwiza pakutukanizya utunyamana tuto tukulya imbeyu zyinyu, sona amampesya mumaghunda ghinyu ghatakwiza pakupotwa pakupa ivikomwa.

¹² Po abantu abaluko losi bakwiza pakubitizya ukuti mwe basayiwa, pakuti ichisu chinyu chikwiza pakuba buzilo ubwa buhobosu.” U Mwene Uwamaka Ghosi anena.

U Chala akulayizya pakulanjizya ichisa

¹³ U Mwene akuti, “Mwanena amazyu aghakunsusya. “Loli mukulalusya mukuti, ‘Nkimba twa nena vintu vyoni ivyakukususya?’

¹⁴ “Mukunena ukuti, ‘Vite ni mbombo nayimoyimo pakumubombela u Chala. Nkimba tukakabapo ichoni pakukonka indaghilo zyache pakuba ngati bantu abafwilwe pantazi pa Mwene Uwamaka Ghosi?

¹⁵ Po ilelo tukubapima abamituvyo pakuba basayiwa. Naloli ababomba mbibi ivintu vikubendela akiza, sona nanti bakumuyela u Chala ichintu ichibibi chitakubawila.’ ”

¹⁶ Po abantu babo bakumunyila u Mwene bakanenezannya, u Mwene akabateghelezya nukubivwa. Ibuku ilya chikumbusyo likasimbiwa Pantazi papache ukuyana na babo bakamunyila nukumuchindika.

¹⁷ U Mwene Uwamaka Ghosi akuti, “Bakwiza pakuba bantu abane na bane pisiku lilyo nkubomba imbombo yane. Nkwiza pakuba ni chililizi ngati mumo umupapi akubela kumwana wache, yuyo akumubombela.

¹⁸ Mukwiza pakwennya sona ukulekana pakasi pabagholosu na babibi, na pakasi pababo bakumubombela u Chala na babo batakumbombela.”