Malaki 2 - IBAYIBOLO 2024

¹ U Mwene Uwamaka Ghosi akuti, “Amwe mwe baputi nkubapa ilamulo ili.

² Nanti mutakunyivwila, sona nanti mutakulichindika itabwa lyane, nkwiza pakubaghuna, nkwiza pakulughuna ulusayo lwinyu. Naloli invighunite kale pachifukwa ichakuti mutaghateghelezya amazyu ghane.

³ “Pachifukwa icha amwe, nkwiza pakubachemela abaluko lwinyu, nukubapaka pavyeni vyinyu isakwi iya mumala iya vyakwiyipa vyapalusekelo lwinyu ulwa pamwaka, po nkwiza pakubasumbila pachibunga icha sakwi yilayila.

⁴ Po mukwiza pakumanya ukuti nkabapa amalamulo ghanagha, umwakuti ulufingo lulo nkafingana nu Levi lutakananganike.” U Mwene Uwamaka Ghosi anena.

⁵ “Nkafingana nawe ulufingo lulo lukupa ubumi nu mutende, sona nkamupa zinizi umwakuti anchindikaye, sona akanchindika pakulinyila itabwa lyane.

⁶ Ichimanyisyo ichanaloli chikaba mumulomo wache, sona mumilomo yache mutakabamo ubumyasi nabumobumo. Akendagha nane mumutende na mubugholosu, nukubavwa abantu abinji ukuti bapinduke kumbibi zyabo.

⁷ “Pakuti imbombo iya muputi yakusungilila ubumanyi ubwa Chala, sona abantu babaghiye bamanyilaye kukwache, pakuti yo ntumi iya Mwene Uwamaka Ghosi.

⁸ Loli mwayileka izila, sona mwabapunuzya abantu abinji nkani ni vimanyisyo vyinyu. Mwalunangannya ulufingo lulo nkafingana nu Levi.” U Mwene Uwamaka Ghosi anena.

⁹ “Polelo nabasamula, sona nabakozya isoni pakasi pabantu bosi, pachifukwa ichakuti mutakivwila ivimanyisyo vyane mukulonga inongwa pakwennya icheni.”

¹⁰ Nkimba aswe tute nu tata weka? Fwandi te we Chala weka yuyo akatupela twebosi? Nkimba choni chicho tutakusubilana pakulunangannya ulufingo lulo u Chala akafingana na banyenya bitu?

¹¹ Abantu aba muchisu icha Yuda bate basubiliwa, ichintu ichamwiko chabombiwa mu Izilayeli na mu Yelusalemu. Abantu aba mu Yuda bayinyaza Inyumba iya Mwene yiyo ayighanite nkani, pakubimala abakolo babo bakwiputa u chala uwa chiyeni.

¹² Nizya muntu wesi yuyo akubomba zinizi, manyi angaba wenu, u Mwene amwefyemo muvisakasa ivya Yakobo, napapo angabika ivyakwiyipa kwa Mwene Uwamaka Ghosi.

¹³ Ichintu ichinji chicho mukuchibomba cho ichi, mukuchizuzya ichighemo icha Mwene na masozi. Mukufwifwitila nukulila pachifukwa ichakuti atakwinong'onelako ku vyakwiyipa vyinyu pamo ukuvipokela munyobe zyinyu umwakuhoboka.

¹⁴ Mukulalusya mukuti, “Nkimba chifukwa choni?” Chifukwa chakuti u Mwene akaba we kaboni uwa pakasi papako nu muchi wako uwakwanda yuyo ukasenda bo wemulumendo, pakuti utakusubiliwa kukwache, napapo umuchi wako uwa kubulumendo yuyo mumanyani wako, yuyo ukafingana nawe ulufingo ulwa sendwa.

¹⁵ Nkimba atakaba we Chala yuyo akabapela amwe pakuba mubili ghoka nu muzimu ghoka? Po nkimba chifukwa choni? Pachifukwa ichakuti akulonda abaluko ulwa Chala. Po ubwenelezyanje ubumi bwako, sona ubanje musubiliwa kumuchi wako uwakwanda yuyo ukasenda bo wemulumendo.

¹⁶ U Mwene u Chala uwa Izilayeli akuti, “Imbenganite nisoka, imubengite nkani nu mwanavuli yuyo mukali kumuchi wache. Polelo muchebaye nkani, sona mubanje mwe basubiliwa.” U Mwene Uwamaka Ghosi anena.

Isiku ilya bulongi lili papipi

¹⁷ Mwamulitizya nkani u Mwene na kanenele kinyu. Mukulalusya mukuti, “Nkimba twamulitizya bulibuli?” Pakunena ukuti, “Umuntu wesi yuyo akubomba imbibi kokuti mwiza pamaso pa Mwene, sona akuhoboka nabo.” Pamo pakulalusya ukuti, “Nkimba ali ko kwiyi u Chala yuyo akubombela mubwanaloli?”