Malaki 1 - IBAYIBOLO 2024

¹ Agha gho mazyu ghagho u Mwene akamubuzya u Malaki ukuti ababuzye aba Izilayeli.

Ulughano ulwa Mwene paba Izilayeli

² U Mwene akubabuzya abantu bache akuti, “Nabaghana nkani.” Loli mukundalusya mukuti, “Nkimba utughanite bulibuli?” U Mwene akwamula akuti, “Nkimba u Esabu nu Yakobo batakaba banamuntu? Imughanite u Yakobo,

³ loli imubengite u Esabu sona nachipela ichisu chache icha mumaghamba pakuba nkolongo, umwakuti bwaba buzilo ubwakwikalamo abakambwe.”

⁴ Aba Edomu bakuti, “Napapo utwaya twitu utukulu twananganika, pope bulo tukwiza pakutuzenga sona.” Loli u Mwene Uwamaka Ghosi akuti, “Napapo bangatuzenga sona loli nkwiza pakutunangannya. Tukwiza pakwitiziwa ukuti ichisu ichibibi, tuto abantu bache u Mwene abakalaliye bwila na bwila.

⁵ Na maso aghinyu na ghinyu mukwiza pakuvyennya vinivi, po mukwiza pakunena ukuti, ‘Ubukulu ubwa Mwene bwafika ukuzichila impaka izya chisu icha Izilayeli.’ ”

U Mwene akubachemela abaputi

⁶ U Mwene Uwamaka Ghosi akuti, “Umwana akumuchindika uwise, wepe uwambombo akumuchindika u mwene wache. Nanti ne tata winyu, nkimba umuchizi wane ghugho ghumbaghiye ghuli kwiyi? Nanti ne mwene winyu, nkimba umuchizi ghugho ghumbaghiye ghuli kwiyi? Mwee baputi mwe mukulisamula itabwa lyane. “Loli mukulalusya ukuti, ‘Nkimba tukulisamula bulibuli itabwa lyako?’

⁷ “Mukulinyazya pakubika ichakulya icha mwiko pachighemo chane. “Loli mukulalusya mukuti. ‘Nkimba twakunyazya bulibuli?’ “Pakunena ukuti, ‘Ichighemo icha Mwene chikusamuliwa.’

⁸ Nanti mukwiza ni chinyamana ichifwamaso pakuba chakwiyipa, nkimba kunuko te kunanga? Nanti mukubika ichinyamana chicho chilemaye pamo chibine pakuba chakwiyipa, nkimba bunubu bute bubibi? Yezya bulo pakuvibika kumulaghili winyu! Nkimba angahoboka namwe? Nkimba angachipokela ichakwiyipa chinyu? U Mwene Uwamaka Ghosi anena.

⁹ “Ilelo mwe baputi mumulambilizye u Chala ukuti abapelele ichisa, nanti mukubika ivyakwiyipa vinivi, nkimba angachipokela?

¹⁰ “Nalondagha nkani ukuti ngali weka pakasi papinyu ighaliye inyiyi izya Nyumba iya Chala, umwakuti mutakapembe umoto ghugho ghute ni mbombo pachighemo chane! Ane ntahobokite namwe. Ane ne Mwene Uwamaka Ghosi nanena sona ntakwiza pakuvipokela ivyakwiyipa vyinyu vivyo vili munyobe zyinyu.

¹¹ Ukwanda kubufumilo bwizuba mupaka kubwinjililo bwizuba itabwa lyane likwiza pakuba likulu nkani pakasi pabantu aba inko izinji. Kosi na kosi abantu bakwiza pakufukizya utwakununkila nukubika ivyakwiyipa ivyenecho pachifukwa icha litabwa lyane pakuti itabwa lyane likwiza pakuba likulu nkani pakasi pa inko. Ane ne Mwene Uwamaka Ghosi nanena.”

¹² U Mwene Uwamaka Ghosi akuti, “Loli amwe mukulisamula itabwa lyane bo mukunena ukuti, ‘Ichighemo icha Mwene chinyazu,’ sona chope ‘Ichakwiyipa chache chakusamuliwa.’

¹³ Po mukuti, ‘Twalita navyo vinivi.’ Zyosi zinizi mukwenda nukumpa inkonto. Bo mukwiza pakubika ivyakwiyipa, vivyo vivulaye pamo vilemaye pamo vibinite, nkimba mukwinong'ona ukuti ningavipokela vinivi ukufuma munyobe zyinyu?” U Mwene anena.

¹⁴ “Aghuniwanje umuntu yuyo muzimbuli, ali ni chitekwa ichanavuli ichiza mumudimo wache, akufinga pakubika, loli akwiyipa chicho chili ni chilema kwa Mwene. Pakuti ane ne mwene umukulu nkani.” U Mwene Uwamaka Ghosi anena, “Sona itabwa lyane libaghiye pakuchindikiwa pakasi pa inko.”