Luti 4 - IBAYIBOLO 2024

U Bowazi akumusenda u Luti pakuba muchi wache

¹ Pakabalilo kalakala u Bowazi akabuka kumulyango uwa lupaso lwakaya akakulu kala nukwikala pasi. Bo amwennya umukamu wache, yuyo akaba ni mbombo iyakumusungilila u Luti akwiza akati, “Wee mumanyani wane, zagha wikale pasi pano.” Umuntu yula akabuka palapala nukwikala pasi.

² Po u Bowazi akabitizya abasongo 10 aba mukaya akakulu kala nukubabuzya ukuti, “Ikala pasi.” Po bakikala pasi.

³ Akamubuzya umukamu wache yula akati, “U Nabomi yuyo afumite ku Mowabu akughulizya umughunda ghugho ghukaba wa mukamu witu u Elimeleki.

⁴ Bunubu ninong'onagha ukuti nkubuzye pamaso pa basongo bitu, babo bikaye pano ukuti ughule umughunda ghula. Nanti ukulonda pakughughula, ghulagho. Loli nanti utakulonda, umbuzye ukuti imanye. Pakuti atalipo nayumoyumo yuyo ali nu bulaghili ubwakughughula, loli wewe, sona ane nkwiza pisinda papako.” Po akati, “Nkwiza pakughughula.”

⁵ Po u Bowazi akamubuzya akati, “Pisiku lilyo ukwiza pakughughula umughunda uwa Nabomi nuwa Luti umu Mowabu yula, ukwiza pakumughula nu Luti bulo, umufwilwe yula uwa muyazi yula, umwakuti itabwa lyache lyendelele pachilingo chache.”

⁶ Umukamu yula akamula akati, “Awe, intangakwanisya pakughughula umughunda ghula, pakuti pakubomba bunubu lumo ninganangannya ichilingo chane. Ughughule wewe, ane intangakwanisya.”

⁷ Mumasiku ghalaghala mu Izilayeli mukaba lwiho ulwakutabulila nu lwakughulizannya ukatundu ulwakuti: Umuntu akavulagha inkwato yache nukumupa uyunji yula. Iyi yikaba zila yakwitikiziwa pakuba bwakaboni muchisu icha Izilayeli.

⁸ Po umukamu yula akamubuzya u Bowazi akati, “Ughughule wewe umughunda ghula.” Po akavula inkwato yache nukumupa u Bowazi.

⁹ U Bowazi akababuzya abasongo bala, sona na bantu bosi akati, “Ilelo mwe bakaboni bane ukuti ane naghula kwa Nabomi ukatundu wesi uwa Elimeleki, sona nuwa mwana wache u Kiliyoni nu Maloni.

¹⁰ Ukonjelezyapo nu Luti wepe umu Mowabu, umufwilwe uwa muyazi u Maloni yula, aba muchi wane, umwakuti itabwa ilya muyazi yula lyendelelaye pachilingo chache. Bunubu itabwa lyache litangazimila pakasi pa bakamu bache, sona na mukaya akakulu aka. Ilelo mwebosi mwe bakaboni.”

¹¹ Po abasongo na bantu bosi babo bakaba pamulyango pala bakati, “Naloli twe bakaboni. U Mwene amusaye umukolo yuyo akwiza munyumba yako abe ngati we Lakelo nu Leya, abakolo babo bakamupapila u Yakobo abana abinji. Umuntu umusita kusobelwa ichintu nachimochimo mu Efulati, sona ubanje muntu umumanyikwe nkani mu Betelehemu.

¹² Ukwendela mu bana bako babo u Mwene akwiza pakukupa mumulindu uyu, inyumba yako yiyane bulo ni nyumba iya Pelezi, umwana yuyo u Yuda akapapa mwa Tamala.”

Abaluko ulwa Bowazi

¹³ Po u Bowazi akamusenda u Luti pakuba muchi wache. U Mwene akamusaya u Luti, umwakuti akamela ulwanda nukupapa umwana umulumendo.

¹⁴ Abakolo bakamubuzya u Nabomi bakati, “U Mwene apaliwanje, yuyo atakulekite wemwene umusita mukamu. Umwana uyu abanje mumanyikwe nkani mu Izilayeli.

¹⁵ Umulasagha wako akughanite nkani, sona akubombela ichintu ichikulu nkani ukubachila abana abalumendo seveni. Losi ulu akupiye umwizukulu, yuyo akwiza pakukupa ubumi ubupya, sona akwiza pakukusangalusya mubughosi bwako.”

¹⁶ U Nabomi akamunyamula umwana yula, nukumupakata, po akamulela.

¹⁷ Abakolo abapalamani bakati, “U Nabomi ali nu mwana umulumendo.” Po bakamwita umwana yula ukuti we Obedi. U Obedi akaba we wise uwa Yese, sona u Yese akaba we wise uwa Devedi.

¹⁸ Abaluko ulwa Pelezi bo aba: U Pelezi akapapa u Heziloni

¹⁹ u Heziloni akapapa u Lamu sona u Lamu akapapa u Aminadabu.

²⁰ U Aminadabu akapapa u Nashoni sona u Nashoni akapapa u Salimoni.

²¹ U Salimoni akapapa u Bowazi, u Bowazi akapapa u Obedi.

²² U Obedi akapapa u Yese sona u Yese akapapa u Devedi.