Luti 2 - IBAYIBOLO 2024

U Luti akusalala mughunda uwa Bowazi

¹ U Nabomi akaba nu mukamu wache uwa kuchanavuli uwa luko ulwa Elimeleki. Umuntu yunuyu akaba we Bowazi, sona akaba muntu umukabi nkani.

² Po isiku limo u Luti umu Mowabu yula akamubuzya u Nabomi akati, “Leka imbuke kumaghunda pakusalala amapemba mwisinda mu binuli nanti bangampelela ichisa.” U Nabomi akamwamula akati, “Wee mwana wane, bukagha.”

³ Po u Luti akabuka nukwanda pakusalala mwisinda mu binuli bala. Zikabombiwa ukuti akafika mumughunda uwa Bowazi, yuyo akaba waluko ulwa Elimeleki.

⁴ Panapo na panapo u Bowazi akafuma mu Betelehemu, po akafika kumughunda wache nukubalamuka abinuli bala ukuti, “U Mwene abanje namwe.” Bakamwamula bakati, “U Mwene akusaye.”

⁵ Po u Bowazi akamulalusya ukapitawa uwa binuli bala akati, “Nkimba umulindu yula mwana wawenu?”

⁶ Ukapitawa yula akamwamula akati, “Wee mu Mowabu, yuyo akiza nu Nabomi.

⁷ Akandaba akati, ‘Nalamba, unyitikizye ukuti insalaleko amapemba mwisinda mu binuli.’ Bo injila mumughunda asalalagha ukwandila pandabindabi, loli atuzyapo panandi bulo mukazundila.”

⁸ Po u Bowazi akamubuzya u Luti akati, “Wee mwana wane, ivwa kuno. Utakasalalaye mumughunda ughunji, sona utakepemo mumughunda muno. Loli ikala muno na bambombo bane abachilindu banaba.

⁹ Wenelezyanje umughunda ghugho abantu bali pakwinula, sona ubakonkaye abalindu bala. Nababuzya abalumendo bala ukuti batakakutamyanje. Po nanti uli ni nyota, ubukaye bulo pakung'wela amizi musonta zyabo.”

¹⁰ Po u Luti akafughama, bo icheni chache chikotamiye pasi, nukumubuzya u Bowazi ukuti, “Nkimba choni chicho wampelela ichisa, umwakuti waba nane ni chitima ne muyeni?”

¹¹ Loli u Bowazi akamwamula akati, “Abantu bampangiye akiza nkani vyosi vivyo wamubombeye unyokovyala ukwandila pakabalilo kako umulume wako akafwila, sona namumo ukamulekela ughuso nu nyoko, poka ni chisu chako nukwiza pakwikala na bantu babo utabamenyepo nalumo.

¹² U Mwene u Chala uwa ba Izilayeli, yuyo ukuponelamo muvipapande vyache, akupe umuvwalo umukulu nkani, pachifukwa icha vyiza vyosi vivyo wabomba.”

¹³ U Luti akamula akati, “Wee mwene wane, naloli wampelela ichisa, sona wansangalusya nkani, napapo inte ne yumo uwa bambombo bako.”

¹⁴ Pakabalilo aka chakulya u Bowazi akamwitizya u Luti akati, “Zagha kuno, sendapo ichibama chimo, nukuchisazila muvinyo.” Po akikala pasi papipi na binuli bala, sona u Bowazi akamupa amapemba aghakukazinga. U Luti akalya nukwikuta, sona akaghalekapo ghamo.

¹⁵ Bo u Luti anyamuka pakusalala, u Bowazi akabalamula abinuli bala akati, “Napapo umulindu uyu asalala muvinkose, mutakamukozyanje isoni.

¹⁶ Loli mumuwesele ghamo amapelele muvikose ukuti wepe asalaleko, sona mutakamuchemelaye.”

¹⁷ Po u Luti akendelela pakusalala mumughunda mula mupaka pachamabwila. Akakoma amapemba ghagho akasalalagha, nukukwana pipipipi amakilogalamu 10.

¹⁸ Akaghasenda amapemba ghala nukubwela nagho pakumulanjizya unyinavyala. Akamupayila unyinavyala ichakulya chicho chikasyalako, bo ikuta.

¹⁹ U Nabomi akamulalusya umulasagha wache yula akati, “Nkimba wasalalagha kwiyi ilelo? Nkimba wabombagha mumughunda wawenu? Musayiwa nkani umuntu yuyo akupeleye ichisa bunubu.” Po u Luti akamupangila unyinavyala nizya mwenecho uwa mughunda ghugho akabombaghamo imbombo akati, “Umwenecho uwa mughunda ghugho nabombaghamo imbombo ilelo we Bowazi.”

²⁰ Po u Nabomi akamubuzya umulasagha wache yula akati, “U Mwene amusaye umuntu yunuyu, yuyo abalanjizya ichisa abantu abumi, na bafwe bulo.” Akanena sona akati, “Umuntu yunuyu we mukamu witu naloli, yuyo ali ni mbombo iyakutusungilila aswe.”

²¹ Po u Luti umu Mowabu yula akati, “Ukonjelezyapo umuntu yula akambuzya sona akati, ‘Wikalaye papipi na bambombo bane mupaka bamale pakwinula.’ ”

²² U Nabomi akamubuzya umulasagha wache yula akati, “Wee mwana wane, chingaba chizapo ukuti ubanje papipi na bambombo bache abachilindu, pachifukwa ichakuti nanti wabuka mumughunda uwa muntu uyunji, lumo bangakutamya.”

²³ Po u Luti akaba papipi nkani na bambombo abachilindu aba Bowazi bala mupaka abinuli bakamala pakwinula ingano na mapemba mumughunda ghula. Akabalilo kosi kanaka u Luti akikalagha nu nyinavyala.