Luti 1 - IBAYIBOLO 2024

U Elimeleki na bamunyumba yache bakubuka ku Mowabu

¹ Pakabalilo aka balongi, muchisu icha Yuda mukawa izala. Po umuntu yumo wamu Betelehemu muchisu chila, poka nu muchi wache, na bana bache babili bakabuka kuchisu icha Mowabu ukuti bikaleko akabalilo akapimpa bulo.

² Umuntu yunuyu akaba we Elimeleki, sona umuchi wache akaba we Nabomi. Po abana bache abalumendo babili banaba akaba we Maloni nu Kiliyoni. Bosi banaba bakaba baluko ulwa Efulayimu aba mu Betelehemu mu Yuda. Po bakabuka mu Mowabu nukwikala mulamula.

³ U Elimeleki, umulume uwa Nabomi akafwa, po u Nabomi akasyala na bana bache babili bala.

⁴ Abana bache bala bakasenda abakolo aba mu Mowabu mulamula, weka akaba we Olipa, uyunji akaba we Luti. Bo bikala kulakula amaka pipipipi 10,

⁵ u Maloni nu Kiliyoni bakafwa, umwakuti u Nabomi akasyala mwene umusita bana bache babili bala, sona nu mulume wache.

U Nabomi nu Luti bakunyokela ku Betelehemu

⁶ Bo u Nabomi ivwa ukuti u Mwene abavwa abantu bache ni vyakulya, u Nabomi poka na balasagha bache babili bala bakanda ukwiyannya pakwepamo mu Mowabu nukubwela kukwabo.

⁷ Po u Nabomi poka na balasagha bache babili bala bakanyamuka kubuzilo kuko bakikalagha nukwanda ubulendo ubwakunyokela ku Yuda.

⁸ U Nabomi akababuzya abalasagha bache akati, “Bwelagha kukwinyu ukuti umuntu wesi ikalaye nu nyina. U Mwene abapelelaye ichisa ukuyana namumo mwabalanjizizya ichisa abamuyazi bala, sona nane bulo.

⁹ U Mwene abasaye amwe ukuti wesi abanje ni nyumba iyache ni yache, sona nukuti amwaghe umulume uyunji.” Po u Nabomi akalaghana nabo pakubafyofyonta, loli bakanda pakulila nkani.

¹⁰ Bakamubuzya u Nabomi bakati, “Awe, naswe tukwiza pakubuka poka nawe kuko kuli abantu bako.”

¹¹ Loli u Nabomi akati, “Mwee bana bane, bwelagha. Nkimba choni chicho mukulonda pakubuka poka nane? Fwandi mukwinong'ona ukuti ningapapa sona abana abanji, babo bangaba balume binyu?

¹² Mwee bana bane, bwelagha bulo. Ane naghosipa nkani umwakuti ntangasendwa sona nu mwanavuli uyunji. Napapo ningaba nu lusubilo ulwakuti ningasendwa sona pabusiku ubu nukupapa abana abanavuli,

¹³ nkimba mungabandilila abana bala mupaka bakule? Nkimba mungikala ukusita kusendwa pakubalindilila babo? Awe, mwee bana bane. Ichi ngali chambaba nkani ukubachila amwe, pachifukwa ichakuti u Mwene anjivya nkani.”

¹⁴ Po sona bosi bakalila nkani. U Olipa akamufyofyonta unyinavyala pakumulagha, loli u Luti akamukakatila u Nabomi.

¹⁵ U Nabomi akati, “Ennya, uwamwinyu abwela kukwabo, sona na kwa chala wache. Po bwelagha poka nawe.”

¹⁶ Loli u Luti akamwamula akati, “Utakandambilizye ukuti indeke pakukukonka. Kuko ukubuka, ko kuko nane bulo nkwiza pakubuka, sona kuko ukwiza pakwikala, ko kuko nane bulo nkwiza pakwikalagha. Abakamu bako bakwiza pakuba bakamu bane, sona u Chala wako akwiza pakuba we Chala wane.

¹⁷ Kuko ukwiza pakufwila, ko kuko nane bulo nkwiza pakufwilako, sona ko kuko nkwiza pakusyiliwako. U Mwene anfunde nkani, nanti chilipo ichintu chimo chicho chingatulesannya, loli bo bufwe bwene.”

¹⁸ Bo u Nabomi azyaghannya ukuti u Luti adumula umwakufikapo pakubuka nawe, akaleka pakumulambilizya sona.

¹⁹ Po babili bala bakendelela nu bulendo bwabo mupaka bakafika mu Betelehemu. Bo abakolo babili bala bafika mu Betelehemu, akaya kosi kakayingana, sona abakolo mulamula bakalalusya bakati, “Fwandi uyu we Nabomi naloli?”

²⁰ U Nabomi akababuzya akati, “Mutakanyitizyanje ukuti Nabomi, loli mutinji Mala, pakuti Uwamaka Ghosi anjivya nkani.

²¹ Bo nkubuka, nkabuka ni vintu ivyinji nkani, loli ilelo u Mwene ambwezya nyobe zyene. Nkimba choni chicho mukunyitizya ukuti Nabomi? U Mwene anjivya nkani, sona Uwamaka Ghosi angwisizya intamyo inkulu nkani.”

²² Po u Nabomi akanyokako ku Mowabu poka nu Luti, umulasagha wache umu Mowabu yula. Bakafika mu Betelehemu, bo akabalilo akakwinulila amapemba kanda bulo.