Luka 5 - IBAYIBOLO 2024

U Yesu akwitizya abamanyili abakwanda

¹ Isiku limo, u Yesu akimilila mulubazu ulwa nyanja iya Genesaleti, bo abantu bakumufyenya ukuti bateghelezye amazyu agha Chala.

² Akennya amabwato mabili mulubazu ulwa nyanja; abalobaswi bakepamo nukusuka ivilepa vyabo.

³ U Yesu akakwela mubwato bumo, bubo bukaba ubwa Simoni nukumubuzya ukuti asunkile panandi ukufuma pisila. U Yesu akikala mubwato nukubamanyisya abantu.

⁴ Bo amala pakunena, akamubuzya u Simoni ukuti, “Sunkila ubwato pabuzilo bubo bwibilite, awe na bamwinyu musumbile ivilepa vyinyu mumizi ukuti mulobe iswi.”

⁵ U Simoni akamula akati, “Mwene tubombite busiku bosi, loli tutalemitepo nachimochimo. Loli pakuti wewe wanena bunubu, nkwiza pakusumbila ivilepa.”

⁶ Bakasumbila nukuloba iswi inyinji, umwakuti ivilepa vikaba papipi pakuzepuka.

⁷ Po bakabakopezya abamwabo babo bakaba mubwato ubunji ukuti babavwe. Bakiza nukwizuzya iswi mu mabwato ghosi mabili, umwakuti amabwato ghalaghala ghakanda pakudwiba.

⁸ Bo u Simoni Pitala ennya vivyo vikabombiwa, akafughama pamaso pa Yesu nukuti, “Wee Mwene, epako kukwane! Ane ne muntu wambibi!”

⁹ U Pitala poka na bamwabo babo bakaba nawe bakaswigha nkani nu bwinji ubwa iswi zizyo bakaloba.

¹⁰ U Yakobo nu Yohani abana aba Zebediya, abamwabo aba Simoni bope bakaswigha nkani, po u Yesu akamubuzya u Simoni akati, “Utakanyilaye; ukwandila pakabalilo aka ukwiza pakuba we muloba bantu.”

¹¹ Bakawesela ubwato pisila panyanja, po bakavileka vyosi nukumukonka u Yesu.

U Yesu akumupozya umuntu

¹² Bo u Yesu ali mukaya akakulu kukiza umuntu yumo, yuyo akatamiwanga nu bubine ubwa mambombo. Bo amwennya u Yesu akisumba mwene pasi nukumulaba ukuti, “Mwene, nanti ukulonda unganswefya.”

¹³ U Yesu akagholosya inyobe yache, akamulema, nukwamula ukuti, “Nkulonda swepa!” Panapo na panapo amambombo ghala ghakamuleka umuntu yula.

¹⁴ U Yesu akamulamula akati, “Utakamubuzyepo nayumo umuntu. Loli bukagha wilanjizye ku muputi ukuti akupime; ukuti abantu bosi bamanye ukuti wapola, ubike ichabupi chicho u Mozesi akalamula.”

¹⁵ Loli ipangwi ilya Yesu likasata posi na posi, sona ichilundilo icha bantu chikiza pakumuteghelezya nukuti bapole ububine bwabo.

¹⁶ Loli akabuka kubuzilo kuko kutakabako abantu nukwiputa.

U Yesu akumupozya umuntu umulemazu

¹⁷ Isiku limo bo u Yesu akumanyisya, aba Falisayi na bamanyisi aba Ndaghilo bamo bakikala palapala babo bakafuma muvigaba vyosi ivya Galileya nu Yudeya nukufuma sona mu Yelusalemu. Amaka agha Mwene ghakaba nu Yesu ukuti apozye ababine.

¹⁸ Abanavuli bamo bakiza banyamuye umuntu umulemazu pachibonde, bakayezya pakumwinjizya munyumba nukumubika pamaso pa Yesu.

¹⁹ Loli bakati bapotwa apakwinjililapo nawe pachifukwa icha chilundilo icha bantu, bakakwela nawe pachisonje icha nyumba yila. Po bakapela ubwazi nukumwinjizya, bo alambalaye pachibonde pakasi pabantu nukumwisizya pamaso pa Yesu.

²⁰ Bo u Yesu ennya ulwitiko lwabo, akamubuzya umuntu yula akati, “Wee mumanyani, imbibi zyako zyahobokeliwa.”

²¹ Abamanyisi aba Ndaghilo naba Falisayi bakanda pakwilalusya bene mumoyo ghabo ukuti, “Nkimba wewenu umuntu yunuyu, yuyo akumusamula u Chala? Nkimba ate we Chala mwene yuyo angahobokela imbibi?”

²² U Yesu akazimanya inyinong'ono zyabo, po akabalalusya akati, “Nkimba choni chicho mukwinong'ona bunubu mumoyo ghinyu?

²³ Nkimba chili ko kwiyi chicho chipepe pakumubuzya ukuti, ‘Imbibi zyako zyahobokeliwa’, pamo pakumubuzya ukuti, ‘Nyamuka endagha?’

²⁴ Loli nkwiza pakubasimikizizya ukuti u Mwana uwa Muntu ali nu bulaghili pachisu ichapasi pano ubwakuhobokela imbibi.” Po akamubuzya umuntu umulemazu yula akati, “Nkukubuzya, nyamuka, nyamula ichibonde chako bwelagha.”

²⁵ Panapo umubine yula akanyamuka, bo abantu bosi bakumwennya, akanyamula ichibonde chache chicho akalambalalapo nukubwela, bo akumupala u Chala.

²⁶ Bosi bakaswigha nkani! Pachifukwa icha bogha, bakamupala u Chala nukuti, “Ilelo twennya ivyakuswighisya nkani!”

U Yesu akumwitizya u Levi

²⁷ Pisinda pache u Yesu akepapo pabuzilo bula nukumwennya umusonkezya sonko, u Levi, bo ikaye munyumba iyakusonkelamo umusonko. Akamubuzya akati, “Nkonka!”

²⁸ Po u Levi akanyamuka, sona akavileka vyosi nukumukonka u Yesu.

²⁹ Po u Levi akamuyanizizya u Yesu ulusekelo ulukulu munyumba yache. Abasonkezya sonko abinji poka na bantu abanji bakaba nabo palusekelo lulalula.

³⁰ Aba Falisayi na bamanyisi aba Ndaghilo bamo, babo bakaba ba kabukatila kabo bakilumbusya ku bamanyili aba Yesu ukuti, “Nkimba choni chicho ali pakulya nukung'wela poka na basonkezya sonko, sona na bantu abambibi?”

³¹ U Yesu akabamula akati, “Abantu abapuma batakumulonda umughanga, loli bene babo babine.

³² Ntizite pakwitizya abantu abagholosu ukuti bapinduke, loli nizite pakwitizya abantu abambibi.”

Bakumulalusya u Yesu nizya kutuzya pakulya

³³ Abantu bamo bakamubuzya u Yesu bakati, “Abamanyili aba Yohani bakutuzya pakulya kabilikabili nukwiputa, po abamanyili aba ba Falisayi bope bakubomba bunubu. Loli abamanyili bako bakulya nukung'wela bulo.”

³⁴ U Yesu akamula akati, “Nkimba mukwinong'ona ukuti chingabombiwa ukuti abayeni aba pasendwa batuzye pakulya, bo umwenesendwa ali poka nabo? Awe!

³⁵ Loli isiku likwiza, lilyo umwenesendwa bamwefyako kukwabo, po bakwiza ukutuzya pakulya.”

³⁶ U Yesu akababuzya sona ichili akati, “Nayumo umuntu yuyo akuzepula ichigamba pamwenda umupya nukuchigambika pamwenda uwakale. Nanti akubomba bunubu, akwiza pakuzepula umwenda umupya ghula, sona ichigamba ichipya chila chitangayana nu mwenda uwakale ghula.

³⁷ Nayumo umuntu yuyo angapungulila uvinyo umupya mutunyambi utwa makwela utwakale. Nanti angabomba bunubu, uvinyo angazepula utunyambi tula, po vyosi vibili vinivi, uvinyo nu tunyambi vikwiza pakunanganika.

³⁸ Loli uvinyo umupya apunguliliwe mutunyambi utupya.

³⁹ Nayumo umuntu yuyo angalonda uvinyo umupya, bo ang'wela uvinyo uwakale. Pakuti abantu bakuti, ‘Uvinyo uwakale mwizapo.’ ”