Luka 24 - IBAYIBOLO 2024

Ukuzyuka kubufwe ukwa Yesu

¹ Pandabindabi nkani pisiku ilyakwanda mwa sabata, abakolo bakabuka kwipumpa, bo banyamuye ivyakununkila vivyo bakayannya.

² Bakagha ukuti babunguluzizyepo kale ibwe pamulyango wipumpa.

³ Bakinjila mukasi, loli batakawaghamo umuvimba uwa Mwene u Yesu.

⁴ Bo bakuswigha na zinizi, umwakuchenusya bulo bakennya abantu babili bavwalite amenda aghakunyezimila bimiliye papipi nabo.

⁵ Abakolo bala bakanyila nkani nukwinamila ivyeni vyabo pasi. Po abantu bala bakalalusya bakati, “Nkimba choni chicho mukulonda umuntu umupuma mubantu abafwe?

⁶ Atalimo muno, azyukite kubufwe! Kumbuka zizyo akababuzya bo ali mu Galileya ukuti,

⁷ ‘Umwana uwa Muntu abaghiye pakubikiwa munyobe izya bantu abambibi nukukomeliwa pachipinjika. Po isiku ilyabutatu akwiza pakuzyuka kubufwe.’ ”

⁸ Panapo na panapo abakolo bala bakakumbuka amazyu ghache.

⁹ Bo babwelako kwipumpa bakababuzya vyosi vinivi abamanyili 11 bala na banji bosi.

¹⁰ Mu bakolo balabala mukaba u Maliya Magadalena nu Yohana, sona nu Maliya unyina uwa Yakobo, abene na bakolo abanji babo bakaba nabo bakababuzya zinizi abatumiwa.

¹¹ Loli abatumiwa bakinong'onagha vivyo abakolo bala bakanena ukuti vikaba vyabupunganu, sona batakabasubila.

¹² Loli u Pitala akavundumuka nukuchimbilila kwipumpa, akinamila pasi nukwennya bulo isanda zizyo bakaghunnyembetelela umuvimba uwa Yesu. Po akabwela kunyumba bo akuswigha na zizyo zikabombiwa.

Zizyo zikabombiwa pabulendo ubwa ku Emabusi

¹³ Pisiku linilyo abamanyili aba Yesu bakabukagha kukaya aka Emabusi, ubutali bwache bukaba amamita 11,000 ukufuma mu Yelusalemu,

¹⁴ sona bakanenezannyanga nizya vintu vyosi vivyo vikabombiwa.

¹⁵ Bo bakunenezannya nukulalusannya benebene, u Yesu akapalamila nukwenda poka nabo.

¹⁶ Loli batakamwaghannya pakuti amaso ghabo ghakaba ngati ghighaliliwe.

¹⁷ U Yesu akabalalusya akati, “Nkimba mukunenezannya choni, bo mukwenda?” Abene bakimilila nivyeni vyabo vya chitima.

¹⁸ Umuntu weka uwa babo, yuyo akaba we Kiliyopa akalalusya akati, “Nkimba awe we muyeni mu Yelusalemu umu, yuyo atavimenye vivyo vyabombiwa mulamula amasiku amanandi bulo ghagho ghachila?”

¹⁹ U Yesu akalalusya akati, “Vintu vyoni?” Abene bakamula bakati, “Ivintu vivyo vikabombiwa kwa Yesu uwamu Nazaleti. Umuntu uyu akaba mulaghuzi, yuyo imbombo zyache, sona na mazyu ghache vikamuhobosya u Chala, sona na bantu bosi.

²⁰ Abaputi abasongo na balaghili bitu bakamubika munyobe izya balongi, umwakuti abalongi badumule ukuti aghoghiwe, po akakomeliwa pachipinjika.

²¹ Loli tukasubilagha ukuti weyuyo akwiza pakubasatula aba Izilayeli. Ukonjelezya pavyosi vinivi, ili lisiku lyabutatu ukwandila pisiku lilyo vikabombiwa.

²² Abakolo bamo aba mukabukatila kitu bakatuswighisya nkani. Abene bakabuka kwipumpa pandabindabi,

²³ loli batakawaghamo umuvimba. Bo babwelako bakatubuzya ukuti bakennya ichisetuka icha bantumi aba Chala, babo bakababuzya ukuti u Yesu mumi.

²⁴ Bamo aba mukabukatila kitu bakabuka kwipumpa nukuvyagha vyosi ukuyana namumo abakolo bala bakanenela, loli batakamwennya.”

²⁵ U Yesu akababuzya akati, “Mwe bapunganu mwee! Choni chicho mwe bapalapala nkani pakusubila ivintu vyosi vivyo abalaghuzi bakalaghula!

²⁶ Nkimba zitamubaghiye pakuti u Kilisitu ayimbe ni vintu vyosi vinivi bo atinjiye mubuchindamu bwache?”

²⁷ Sona u Yesu akalingannya kukwabo zizyo zikaneniwa nizya yuyo mu Masimbo ghosi, ukwandila mu mabuku agha Mozesi mupaka na mumasimbo ghosi agha balaghuzi.

²⁸ Bo bapalamila kukaya kako bakabukaghako, u Yesu akaba ngati po akubachila.

²⁹ Loli bakamulambilizya bakati, “Ikala naswe pakuti kwanda kale pakwila, sona ichisi chandako.” Po akinjila nukwikala nabo.

³⁰ Akikala pasi nukulya nabo, sona akasenda ichibama nukupalizya kwa Chala. Po akachimenyannya nukubapa.

³¹ Po amaso ghabo ghakighuka nukumumanya, loli akazyebeluka bulo.

³² Bakanenezannyanga benebene bakati, “Nkimba chitakayana bulo numoto uwakwaka mumoyo ghitu, bo akunena naswe muzila mulamula nukutulingannya Amasimbo?”

³³ Panapo na panapo bakanyamuka nukunyokela ku Yelusalemu, kuko bakabagha abamanyili 11 babunganite poka na banji,

³⁴ nukuti, “Naloli u Mwene azyukite kubufwe! Amubonekela u Simoni!”

³⁵ Po abanavuli babili bala bakalingannya vivyo vikababonekela muzila mulamula, sona namumo bakamumanyila u Mwene, bo amenyannya ichibama.

U Yesu akubabonekela abamanyili bache

³⁶ Bo babili bala bachili bakunena zinizi, u Mwene akimilila pakasi papabo nukuti, “Umutende ghubanje namwe.”

³⁷ Loli abene bakachenuka nukunyila nkani, ukwinong'ona ukuti bakwennya chizyuka.

³⁸ Po u Yesu akababuzya akati, “Choni chicho mukunyila nukwilamwa mumoyo ghinyu?

³⁹ Ennya inyobe zyane, sona ni vinama vyane, ukuti naloli Nene! Mumpalamasye nukwennya pakuti ichizyuka chite ni nyama na mafupa ukuyana namumo mukunyenezya ane indi navyo.”

⁴⁰ Bo anena zinizi, akabalanjizya inyobe ni nyayo zyache.

⁴¹ Pope bulo batakasubila pakuti bakahoboka nkani nukuswigha. Po akabalalusya akati, “Nkimba muli nacho chimo ichakulya?”

⁴² Bakamupa akamenyu akaswi impiye,

⁴³ kako akasenda nukulya pamaso papabo.

⁴⁴ Po akababuzya akati, “Ivi vyo vivyo nkababuzya, bo indi poka namwe. Vyosi vivyo vikasimbiwa nizya ane mu Ndaghilo izya Mozesi, ubusimbe ubwa balaghuzi na mu Masalimo bukwanilisiwe.”

⁴⁵ Po akabighula inyinong'ono zyabo ukuti bivwisye Amasimbo,

⁴⁶ nukubabuzya ukuti, “Ivi vyo vivyo visimbiwe: U Kilisitu abaghiye pakuyimba nukuzyuka kubufwe, bo ghachilapo amasiku matatu,

⁴⁷ sona nukuti mwitabwa lyache amazyu ghalumbililiwe pakasi pabantu aba inko zyosi ukwandila mu Yelusalemu ukuti abantu bapinduke nukuzileka imbibi zyabo, sona nukuti u Chala abahobokele imbibi zyabo.

⁴⁸ Amwe mwe bakaboni aba vintu vyosi vinivi.

⁴⁹ Nkwiza pakubatumila chicho u Tata wane akalayizya. Loli mulindililaye mukaya akakulu nkani mupaka papo mwapokela amaka aghakufuma kumwanya.”

U Yesu akusendiwa ukubuka kumwanya

⁵⁰ Po akabalongolela pakufuma nabo mukaya akakulu nkani kala mupaka mukaya aka Betaniya. Kulakula akimika inyobe zyache nukubasaya.

⁵¹ Bo akubasaya, akatantama panandi nukusendiwa ukubuka kumwanya.

⁵² Bakamwiputa nukunyokela mu Yelusalemu, bo bizuye nu buhobosu ubukulu nkani.

⁵³ Akabalilo kosi bakikalagha mu Nyumba iya Chala pakumupalizya u Chala.