Luka 23 - IBAYIBOLO 2024

U Yesu pamaso pa Pilati

¹ Ichilundilo chosi chikanyamuka nukubuka nu Yesu kwa Pilati,

² kuko bakanda pakumutamantila ukuti, “Tukamwagha umuntu yunuyu akubasovya abantu bitu, akubakanizya pakusonka umusonko kwa Kesale, nukwinena mwene ukuti we Kilisitu, sona we Mwene.”

³ U Pilati akamulalusya akati, “Nkimba awe we Mwene uwa ba Yuda?” U Yesu akamula akati, “Wanena we mwene.”

⁴ Po u Pilati akababuzya abaputi abasongo ni chilundilo icha bantu chila akati, “Intakumwaghapo ninongwa nayimoyimo umuntu uyu.”

⁵ Loli bakiyula nkani pakunena bakati, “Ni vimanyilo vyache akwandizya ivyongo mubantu muchigaba chosi icha Yudeya. Akanda muchigaba icha Galileya, ilelo ali kuno.”

U Yesu pamaso pa Helodi

⁶ Bo u Pilati ivwa zinizi, akalalusya akati, “Nkimba umuntu uyu wamu Galileya?”

⁷ Bo azimanya ukuti u Yesu akafuma muchigaba chicho chikalaghiliwanga nu Helodi, akamutuma kwa Helodi, yuyo akaba mu Yelusalemu akabalilo kalakala.

⁸ U Helodi akahoboka nkani bo amwennya u Yesu pakuti akivwanga bulo nizya yuyo, sona akamulondagha akabalilo akatali pakumwennya. Akalondagha nkani ukuti amwennye u Yesu akubomba ichika chimo.

⁹ Po u Helodi akamulalusya u Yesu amalalusyo aminji, loli u Yesu atakamwamula.

¹⁰ Abaputi abasongo na bamanyisi aba Ndaghilo bakiza pantazi nukumutamantila nkani u Yesu.

¹¹ U Helodi na basilikali bache ababwite bakamobezya u Yesu nukumutuka. Po bakamuvwika inkazo inyiza nukumutuma sona kwa Pilati.

¹² Bo zitabombiwe zinizi, pakasi pa Helodi nu Pilati pakaba ubulwani. Loli ukwandila pisiku lilalila bakaba pabumanyani.

Kwadumuliwa ukuti u Yesu aghoghiwe

¹³ U Pilati akabitizya poka abaputi abasongo, na balongozi, sona na bantu bosi

¹⁴ nukubabuzya ukuti, “Mwizite nu muntu uyu kukwane ukuti akubasovya abantu. Po ilelo namulalusya pamaso papinyu, loli intakuyaghamo nayimoyimo inongwa mumuntu uyu pavintu vivyo mukumutamantila.

¹⁵ Wepe u Helodi atakamwaghapo ninongwa, cho chifukwa akamunyosezya kukwitu. Chitalipo nachimochimo chicho umuntu uyu abombite ichakuti angaghoghiwa nacho.

¹⁶ Po nkwiza pakumusyempa bulo nukumulekezya ukuti abukaye.”

¹⁸ Abantu bosi bala bakakolomoka nkani ukuti, “Mughoghe! Tusatulile u Balabasi!”

¹⁹ (U Balabasi akaba mujele pachifukwa icha kwandizya ivyongo mukaya akakulu nkani, sona nukughogha abantu.)

²⁰ U Pilati akalondagha pakumusatula u Yesu, po akabuka sona pakunenezannya na bantu bala.

²¹ Loli abantu bakakolomoka nkani bakati, “Mukomele pachipinjika! Mukomele pachipinjika!”

²² U Pilati akababuzya akabutatu akati, “Nkimba ananga ichoni? Intakuyaghamo nayimoyimo inongwa iyakuti angaghoghiwa nayo. Nkwiza pakumusyempa bulo nukumulekezya ukuti abukaye.”

²³ Loli bakendelela pakukolomoka na mazyu agha pamwanya ukuti u Yesu akomeliwe pachipinjika. Pabumalilo ukukolomoka kwabo kukapota.

²⁴ Po u Pilati akadumula ukuti chicho abantu bakalondagha cho chicho chibombiwe.

²⁵ Akamusatula umuntu yuyo bakamulondagha, yuyo akaba mujele pachifukwa icha kwandizya ivyongo nukughogha abantu, po akamubika u Yesu munyobe zyabo ukuti babombe nawe ukuyana namumo bakalondelagha.

Bakumukomela u Yesu pachipinjika

²⁶ Abasilikali ababwite bakamusenda u Yesu nukubuka nawe. Muzila bakakomana nu muntu yumo uwamu Kileni, yuyo akaba we Simoni, yuyo akafumagha mutwaya. Bakamunyamulisya ichipinjika ukuti amukonkaye u Yesu mwisinda.

²⁷ Ichilundilo ichikulu icha bantu chikamukonkagha u Yesu. Mumwabo mukaba abakolo bamo babo bakaba ni chitima nu Yesu nukumulilila.

²⁸ U Yesu akaghalabukila kukwabo nukubabuzya ukuti, “Mwe bakolo aba mu Yelusalemu, mutakandililaye. Loli mwililile mwebene na bana binyu.

²⁹ Pakuti amasiku ghakwiza ghagho abantu bakwiza pakunena ukuti, ‘Basayiwa abakolo babo baghumba, babo batapapitepo nalumo, babo batonkezizyepo nalumo.’

³⁰ Kalakala kakwiza pakuba kabalilo kako abantu bakwiza pakughabuzya amaghamba ukuti, ‘Tuwile,’ nukutubuzya utughamba ukuti, ‘Tufise.’

³¹ Pakuti nanti bakubomba zinizi kwikwi ibisi, po zingaba bulibuli kwikwi ilyumizu?”

³² Bakasenda sona na bantu bamo babili, babo bakaba mavyondongo ukuti baghoghiwe poka nu Yesu.

³³ Bo bafika pabuzilo bubo bukwitiziwa ukuti, “Ifupa ilya kumutu.” Bakamukomela u Yesu pachipinjika palapala poka na mavyondongo mabili ghala, lyoka kunyobe indilo, sona ilinji iya kumongo.

³⁴ U Yesu akati, “Wee Tata ubahobokele pakuti batakuzimanya zizyo bakubomba.” Bakagabana amenda ghache pakupanga amayele.

³⁵ Abantu bakimilila palapala pakwennya bo abalongozi aba Chiyuda bakumobezya u Yesu ukuti, “Akabapokagha abantu abanji, muleke wepe ipoke mwene nanti we Kilisitu yuyo u Chala akamusala.”

³⁶ Abasilikali ababwite bope bakamobezya. Bakapalamila papipi nawe nukumupa uvinyo uwakusapa ukuti ang'wele

³⁷ nukuti, “Nanti we Mwene uwa ba Yuda, ipoka wemwene.”

³⁸ Pamwanya pachipinjika chache pakasimbiwapo amazyu aghakuti, “Uyu we Mwene uwa ba Yuda.”

³⁹ Weka uwa mavyondongo yuyo bakamukomela poka nawe akamutuka u Yesu akati, “Nkimba awe ute we Kilisitu? Ipoka wemwene, sona utupoke naswe bulo!”

⁴⁰ Loli ilinji likamuchemela likati, “Nkimba utakumunyila u Chala? Uli pakufundiwa nu lufundo ngati lulo ali pakufundiwa nalo.

⁴¹ Aswe zitubaghiye ukuti tufundiwe ukuyana na zizyo twabombite; loli umwene atabombite nachimochimo ichibibi.”

⁴² Po akati, “Yesu, unkumbuke nanti wafika mu Bumwene bwako!”

⁴³ U Yesu akamubuzya akati, “Naloli nkukubuzya ukuti ilelo ukwiza pakuba nane ku Buzilo ubwa buhobosu kumwanya.”

Ubufwe ubwa Yesu

⁴⁴ Bo izuba lyafika pamutu, likaleka pakulama, sona ichisi chikawa muchisu chosi mupaka fili koloko pachamabwila.

⁴⁵ Umwenda ghugho ghukazighila mu Nyumba iya Chala ghukazepuka pakasi na pakasi.

⁴⁶ U Yesu akalila nizyu ilya pamwanya akati, “Wee Tata nkughubika umuzimu wane munyobe zyako!” Bo anena zinizi, akazililika.

⁴⁷ Usongo uwa basilikali akennya zizyo zikabombiwa nukumuchindika u Chala ukuti, “Naloli uyu akaba muntu mugholosu.”

⁴⁸ Abantu bosi babo bakabungana palapala ukwennya chicho chikabombiwa, bo bennya chicho chikabombiwanga, bakabwela kunyumba zyabo bakwikoma pavifuba vyabo ni chitima.

⁴⁹ Abantu bosi babo bakamanyana nu Yesu, poka na bakolo babo bakamukonkagha ukufuma mu Galileya bakimilila pabutalipo ukwennya zinizi.

U Yesu abikiwa mwipumpa

⁵⁰ Kukabako umuntu yumo yuyo akaba we Yosefu, weka uwakabukatila aka balongozi. Akaba muntu mwiza sona mugholosu.

⁵¹ Atakitinkana ni nyinong'ono, sona ni mbombo zyabo. Akafuma ku Yudeya mukaya aka Alimatiya, po akalindiligha Ubumwene ubwa Chala.

⁵² Akabuka kwa Pilati nukulaba umuvimba uwa Yesu.

⁵³ Po akisya umuvimba ghula nukughunnyembetelela ni sanda nukughubika mwipumpa, lilyo likakumbiwa kwibwe, sona batakabombezyapo nalumo.

⁵⁴ Pakaba po pa Chisano, sona Isiku Ilyakutuzya likaba papipi pakwanda.

⁵⁵ Abakolo babo bakamukonkagha u Yesu ukufuma mu Galileya bakabuka nu Yosefu pakwennya ipumpa, sona namumo bakaghubikila umuvimba uwa Yesu.

⁵⁶ Bakabwela kunyumba nukuyannya amafuta ni vyakununkila. Loli bakatuzya Pisiku Ilyakutuzya ukuyana ni Ndaghilo izya Mozesi.