Luka 22 - IBAYIBOLO 2024

Ulubatiko ulwa kumughoghela u Yesu

¹ Akabalilo aka Lusekelo ulwa Chibama chicho chite ni chilungo, lulo bakatinji Ulusekelo ulwa Pasa kakaba papipi.

² Abaputi abasongo na bamanyisi aba Ndaghilo bakalondagha izila iya kubusyefu iyakumughoghela u Yesu pachifukwa ichakuti bakanyilagha abantu.

U Yudasi akumubika u Yesu munyobe izya balwani

³ Po u Satana akinjila mwa Yudasi Sikaliyoti, yumo uwa bamanyili 12 bala.

⁴ Po u Yudasi Sikaliyoti akabuka nukunena na baputi abasongo, sona na basongo aba balindilili aba Nyumba iya Chala nizya mumo angamubikila u Yesu kukwabo.

⁵ Bakahoboka nkani nukwivwana nawe ukuti bakwiza pakumupa indalama

⁶ U Yudasi akitika, sona akanda pakulonda akabalilo akiza akakumubikila u Yesu munyobe zyabo umwakusita abantu ukuzimanya.

U Yesu akubayanizizya abamanyili bache Ulusekelo ulwa Pasa

⁷ Bo isiku lyafika ilya Lusekelo ulwa Chibama chicho chite ni chilungo, isiku lilyo bakaghogha umwana uwa ng'ozi uwa pachakulya icha Pasa.

⁸ U Yesu akatuma u Pitala nu Yohani nukubabuzya ukuti, “Bukagha muyannye Ulusekelo ulwa Pasa ukuti aswe tulye.”

⁹ Bakalalusya bakati, “Nkimba ukulonda ukuti tuluyanizizye kwiyi?”

¹⁰ Akamula akati, “Bo mukwinjila mukaya akakulu nkani mukwiza pakukomana nu mwanavuli anyamuye isonta iya mizi. Mumukonke mupaka munyumba yiyo akwinjilamo,

¹¹ nukunena nu mwenenyumba ukuti, ‘Umumanyisi ukulalusya akuti nkimba ichipinda chili ko kwiyi chicho ane na bamanyili bane tukwiza pakusekelelamo Ulusekelo ulwa Pasa?’

¹² Po akwiza pakubalanjizya ichipinda ichikulu chicho chili pamwanya pachamwabo, chicho chiyaniziwe kale, mulamula muyanizizyemo vyosi.”

¹³ Abamanyili bakabuka nukwagha ivintu vyosi vili bulo mumo u Yesu akababuzizya. Po bakayannya Ulusekelo ulwa Pasa.

Ichakulya icha Mwene

¹⁴ Bo akabalilo kakwana, u Yesu akikala poka na batumiwa bache pabuzilo ubwakulyelapo.

¹⁵ Akababuzya akati, “Nalondagha nkani ukuti indye poka namwe Ulusekelo ulwa Pasa, bo inchili pakuyimba.

¹⁶ Pakuti nkubabuzya ukuti ntakwiza pakulyapo nalumolumo Ulusekelo ulu mupaka papo vyosi vyakwanilisiwa mu Bumwene ubwa Chala.”

¹⁷ Po akasenda ulubako, akamupalizya u Chala nukuti, “Senda ulubako ulu mung'wele mwebosi.

¹⁸ Nkubabuzya ukuti ukwandila pakabalilo aka ntakwiza pakung'wela uvinyo uyu mupaka Ubumwene ubwa Chala bwize.”

¹⁹ Po u Yesu akasenda ichibama, akamupalizya u Chala nukuchimenyannya. Akabapa abamanyili bache nukuti, “Ughu gho mubili wane, ghugho wapeghiwa pachifukwa icha mwemwe. Mubombaye zinizi ukuti munkumbukilayepo.”

²⁰ Umwakuyana bulo, bo bamala pakulya, akabapa ulubako lula nukuti, “Ulubako ulu lyo libanda lyane ilyakusimikizya ulufingo ulwa Chala, lilyo lyatonya pachifukwa icha mwemwe.

²¹ “Loli ennya. Umuntu yuyo akumbika munyobe izya balwani ali pakasi papinyu akulya poka nane.

²² U Mwana uwa Muntu akwiza pakufwa ukuyana namumo u Chala akabatikila. Loli chighune nkani nu muntu yuyo akumubika munyobe izya balwani.”

²³ Po bakanda pakulalusannya benebene ukuti wewenu angabomba zinizi.

Wewenu we songo?

²⁴ Ukudalinkana kukanda pakasi pa bamanyili ukuti wewenu we songo nkani pa bosi.

²⁵ U Yesu akababuzya akati, “Abamwene aba bantu abakuzi bali na maka pabantu babo, sona abalaghili bakulonda ukuti abantu babo babitizyanje, ‘Bamanyani aba bantu.’

²⁶ Loli ichi chite momumo chibeleye pakasi papinyu. Usongo pakasi papinyu abanje munandi, sona umulongozi abanje ngati wambombo.

²⁷ Nkimba wewenu we songo? Umuntu yuyo akwikala pasi nukulya pamo umuntu yuyo akumubombela? Naloli usongo weyuyo ali pakulya. Loli kukwinyu indi ngati ne mubombi.

²⁸ “Mwikala nane mumayimba ghane ghosi,

²⁹ ukuyana namumo Utata wane ampeleye ubulaghili ubwakulaghilila, po nane bulo nkwiza pakubapa ubulaghili bunubu.

³⁰ Mukwiza pakulya nukung'wela poka nane mu Bumwene bwane, sona amwe mukwiza pakwikala pa vitengo ivya bumwene pakulonga inko 12 izya ba Izilayeli.

U Yesu akunenela zila ukuti u Pitala akwiza pakumukana

³¹ “Simoni, Simoni! Teghelezya, u Satana amulaba u Chala ukuti amwitikizye ukuti abayele pakubapeta ngati ngano.

³² Loli nakwiputila Simoni ukuti ulwitiko lwako lutakapotwe. Bo wapindukila sona kukwane, ubaghiye ubakazye abakamu bako.”

³³ U Pitala akamula akati, “Wee Mwene, niyanizye pakubuka nawe kujele nukufwa bulo poka nawe.”

³⁴ U Yesu akati, “Pitala, nkukubuzya ukuti bo ukolwe atakokolikite ubusiku ubu, ukwiza pakunkana katatu ukuti utamenye.”

Nizya kunyamula inyambi nupanga

³⁵ Po u Yesu akalalusya abamanyili bache akati, “Bo nabatuma akabalilo kalakala ukusita inyambi iya ndalama, pamo iya pabulendo, pamo inkwato, nkimba mukasobelwapo chimo?” Bakamula bakati, “Nachimochimo.”

³⁶ U Yesu akati, “Loli ilelo umuntu wesi yuyo ali ni nyambi iya ndalama, pamo inyambi iya pabulendo, ayisende. Umuntu wesi yuyo ate nupanga, ayighulizye inkazo yache nukughula upanga.

³⁷ Pakuti nkukubuzya ukuti zizyo Amasimbo ghakuti, ‘Bakamongannya poka na bambibi’ zibaghiye zikwanilisiwe.”

³⁸ Abamanyili bakanena bakati, “Wee Mwene, ennya, panapa tuli nabo kale abapanga babili.” U Yesu akamula akati, “Mpela!”

U Yesu akwiputa Pighamba ilya Misyunguti

³⁹ U Yesu akafumamo mukaya akakulu nkani kala nukubuka Pighamba ilya Misyunguti ukuyana namumo akizubilila. Po abamanyili bache bakabuka poka nawe.

⁴⁰ Bo afika pabuzilo bula, akababuzya abamanyili bache akati, “Iputagha ukuti mutakawile munjelo.”

⁴¹ Po akabuka pabutalipo papo ibwe lingafika bo akulisumba. Akafughama nukwiputa.

⁴² Akati, “Tata wane, nanti zingabombiwa, efya ulubako ulwa ntamyo ulu kukwane. Chitakabe mumo nkulondela awe, loli mumo ukulondela.”

⁴³ Uwantumi uwakumwanya akamubonekela nukumukazya.

⁴⁴ U Yesu akayimba nkani mumoyo wache nukwiputa umwakufikapo. Amafuku ghache ghakatonyela pasi ngati lyo libanda.

⁴⁵ Bo amala pakwiputa, akimilila nukubuka ku bamanyili bala. Akabagha baghonite utulo pakuti bakaba ni chitima nkani.

⁴⁶ Akababuzya akati, “Nkimba choni chicho mughonite? Nyamuka nukwiputa ukuti mutakawile munjelo.”

Bakumulema u Yesu

⁴⁷ Bo u Yesu achili akunena, ichilundilo icha bantu chikafika, ichakulongoziwa nu Yudasi weka uwa bamanyili 12 bala. Akiza kwa Yesu nukumufyofyonta.

⁴⁸ Loli u Yesu akati, “Yudasi, naloli ukumubika u Mwana uwa Muntu munyobe izya balwani pakumufyofyonta?”

⁴⁹ Bo abamanyili babo bakaba nu Yesu bennya zizyo zikiza pakubombiwa, bakalalusya bakati, “Mwene, tungabombezya abapanga bitu?”

⁵⁰ Weka uwa bamanyili akamubola umuzya uwa muputi usongo nukudumula ikutu lyache ilyandilo.

⁵¹ Loli u Yesu akati, “Mpela, leka.” Akalema ikutu ilya umuntu yula nukumupozya.

⁵² Po u Yesu akababuzya abaputi abasongo na basongo aba balindilili aba Nyumba iya Chala, sona na balongozi aba Chiyuda babo bakiza pakumulema akati, “Nkimba mukwiza na bapanga ni ntughu ukuti mundeme ngati ne livyondongo?

⁵³ Isiku ni siku nabanga namwe mu Nyumba iya Chala, loli mutakandema. Loli akabalilo aka chisi ko kabalilo kinyu akakubombela.”

U Pitala akumukana u Yesu

⁵⁴ Bakamulema u Yesu nukubuka nawe kunyumba iya muputi usongo. U Pitala akamukonkagha pabutalipo.

⁵⁵ Loli bo bapemba umoto mulubinjilo, bakikala pasi nukota, u Pitala wepe akiza nukwikala poka nabo.

⁵⁶ Umulindu yumo uwambombo akamwennya ikaye nabo pamoto pala. Akamwenelezya nukuti, “Wepe bulo umuntu uyu akaba poka nu Yesu.”

⁵⁷ Loli u Pitala akakana akati, “Wee mukolo wee, umuntu uyu intamumenye nukumumanya.”

⁵⁸ Bo pachilapo akabalilo akanandi bulo umwanavuli yumo akamumanya nukuti, “Nawe bulo, we uwa bamo uwa bantu banaba.” Loli u Pitala akamula akati, “Wee mwanavuli, inte nene!”

⁵⁹ Bo pachilapo sona u awala weka umuntu uyunji akiyula nkani nukuti, “Naloli, umuntu uyu akaba poka nu Yesu pakuti wepe muntu uyu wamu Galileya.”

⁶⁰ Loli u Pitala akamula akati, “Wee mwanavuli wee, intazimenye zizyo ukunena.” Bo achili akunena, panapo na panapo ukolwe akakokolika.

⁶¹ U Mwene akaghalabuka nukumwennya u Pitala, po u Pitala akakumbuka zizyo u Mwene akamubuzya ukuti, “Bo ukolwe atakokolikite ukwiza pakunkana katatu ukuti utamenye.”

⁶² U Pitala akafuma kuzi nukulila nkani na masozi.

Bakumobezya nukumukoma u Yesu

⁶³ Abantu babo bakamulindililagha u Yesu bakamobezya nukumukoma.

⁶⁴ Bakamupinya kumaso ni chitambala nukumulalusya ukuti, “Sakizya, nkimba wewenu akukoma?”

⁶⁵ Bakanena ivintu ivyinji ivyakumutuka.

U Yesu pamaso pa balongi

⁶⁶ Bo kwacha, abalongozi aba Chiyuda, na baputi abasongo, sona na bamanyisi aba Ndaghilo bakabungana poka, po bakiza nu Yesu pamaso pa balongi.

⁶⁷ Bakanena bakati, “Tubuzye, nkimba awe we Kilisitu?” Akamula akati, “Napapo ningababuzya mute munsubile;

⁶⁸ sona nanti nabalalusya ilalusyo, mutakwiza pakwamula.

⁶⁹ Loli ukwandila pakabalilo aka u Mwana uwa Muntu akwiza pakwikala kunyobe indilo iya Chala Uwamaka Ghosi.”

⁷⁰ Bosi bakati, “Po, nkimba awe we Mwana uwa Chala?” Akamula akati, “Mwanena mwebene ukuti nene.”

⁷¹ Po bakati, “Tutakulonda sona abakaboni abanji. Twiyivwila twebene zizyo akunena.”