Luka 21 - IBAYIBOLO 2024

Ichakusopa icha mukolo umufwilwe

¹ U Yesu akenelezya nukwennya abantu abakabi bakusopa ivyabupi vyabo muchakusopelamo mu Nyumba iya Chala,

² akennya sona umukolo umufwilwe umupina akusopa isalabazya zibili.

³ Akati, “Naloli nkubabuzya ukuti umukolo umufwilwe umupina uyu, asopa indalama inyinji muchakusopelamo ukuchila abantu bosi abanji.

⁴ Pakuti abanji bosi basopa zizyo basabulapo bulo pa vyabupi vyabo; loli umukolo uyu nu bupina bwache, asopa vyosi vivyo akaba navyo ukuti vingamusunga.”

U Yesu akunenela zila nizya kumongoliwa ukwa Nyumba iya Chala

⁵ Abamanyili bamo bakanenagha nizya kabonekele akiza aka Nyumba iya Chala, yiyo yikazengiwa na mabwe amiza, sona ni vyabupi vivyo vikabikiwa kwa Chala. U Yesu akati,

⁶ “Akabalilo kakwiza kako vyosi vivyo mukuvyennya vikwiza pakumongoliwa. Nalimolimo ibwe lilyo likwiza pakusyala pamwanya pa lyamwabo, lyosi likwiza pakugumuliwa.”

U Yesu akunenela zila nizya ntamyo nukuvwimiwa

⁷ Bakamulalusya bakati, “Wee Mumanyisi, nkimba ivintu vinivi vikwiza pakuboneka liyi? Nkimba choni chicho chikwiza pakuboneka ukulanjizya ukuti akabalilo kali papipi ukuti vinivi vibombiwe?”

⁸ U Yesu akamula akati, “Mubanje maso, ukuti patakabepo nayumo umuntu uwakubazimbula. Pakuti abantu abinji bakwiza pakubombezya itabwa lyane nukuti, ‘Ane ne Kilisitu.’ Bakwiza pakunena sona ukuti, ‘Ubumalilo bwafika.’ Loli mutakabakonke.

⁹ Mutakanyilaye bo mukwivwa nizya bwite ni vyongo. Ivintu vinivi vibaghiye vibombiwe tasi, loli kute kokuti ubumalilo bwafika.”

¹⁰ U Yesu akababuzya sona akati, “Ichisu chikwiza pakulwana ni chinji, sona ubumwene bukwiza pakulwana nu bunji.

¹¹ Kukwiza pakuba utusenyenta utwakoghofya, nizala, sona nu bubine posi na posi. Ivintu iviyeni ni vintu ivyakoghofya vikwiza pakuboneka kumwanya.

¹² Loli bo ivintu vinivi vitabombiwe, bakwiza pakubalema nukubavwima. Bakwiza pakubabika pamaso pa balaghili munyumba izyakwiputilamo, po bakwiza pakubighalila mujele. Pachifukwa icha nene bakwiza pakubasitaka pamaso pa balaghili napa bamwene.

¹³ Aka kakwiza pakuba kabalilo kinyu akakubikila ubwakaboni nizya ane.

¹⁴ Mutakapasyanje mumoyo ghinyu namumo mukwiza pakwiyimila mwebene,

¹⁵ pakuti nkwiza pakubapa amazyu na mahala aghakuti nayumo uwa balwani binyu akwiza pakukana pamo ukususya zizyo mukunena.

¹⁶ Abapapi binyu na bawamwinyu na bakamu binyu na bamanyani binyu bakwiza pakubasambukila. Bamo mumwinyu bakwiza pakughoghiwa.

¹⁷ Abantu bosi bakwiza pakubabenga pachifukwa icha nene.

¹⁸ Loli nakamokamo akasisi kumitu yinyu, kako kakwiza pakusobelapo.

¹⁹ Wime nkani, po ukwiza pakupokela ubumi.

Nizya chinyazu chipalapala chicho chikunangannya

²⁰ “Nanti mukwennya u Yelusalemu azyunguliliwe na balwani, muzimanye ukuti ali papipi pakumongoliwa.

²¹ Po abantu babo bali mu Yudeya bachimbililaye mumaghamba, abantu babo bali mukaya akakulu nkani bepemo, sona na bantu bosi babo bali kuzi ukwa kaya batakinjilaye mukaya akakulu nkani.

²² Pakuti amasiku ghalaghala gho ghagho u Chala akwiza pakubafunda abantu ukuti vyosi vivyo Amasimbo ghakanena vikwanilisiwe.

²³ Kukwiza pakuba bupalapala nkani mumasiku ghanagho na bakolo babo bali ni nyanda, sona na ku bamayi babo bakonkezya abana. Ubupalapala ubukulu nkani bukwiza pachisu ichi, ulufundo ulwa Chala lukwiza pabantu banaba.

²⁴ Bamo bakwiza pakughoghiwa kubwite, abanji bakwiza pakusendiwa ngati bo bakayidi pakubuka nabo muvyisu ivinji. Po abantu babo bate ba Yuda bakwiza pakumukanyankila u Yelusalemu mupaka akabalilo akabumalilo bwabo kakwane.

Ukwiza ukwa Mwana uwa Muntu

²⁵ “Kukwiza pakuboneka ivintu iviyeni kwizuba na kumwezi, sona na kuntondwa. Pachisu ichapasi, abantu aba inko zyosi bakwiza pakutetema nukuvulungana, bo bennya ukuyingana ukwa nyanja na mayigha.

²⁶ Abantu bakwiza pakuzilika nubogha, bo bachili bakulindilila, chicho chikwiza pakuboneka pachisu ichapasi pakuti ivintu ivya maka kumwanya vikwiza pakuyingana.

²⁷ Po abantu bakwiza pakumwennya u Mwana uwa Muntu akwiza mumabingu na maka nu buchindamu ubukulu.

²⁸ Bo ivintu vinivi vikwanda pakuboneka, imilila nukwinusya imitu yinyu pakuti ubupoki buli papipi.”

Ichimanyilo icha ikuyu

²⁹ Po u Yesu akababuzya ichili ichi akati, “Ennya ichikuyu na makwi ghosi.

³⁰ Nanti mwennya bulo isamba zyache zyanda pakulemba, mukumanya ukuti ichisiku chili papipi.

³¹ Umwakuyana bulo, nanti mukwennya ivintu vinivi vikuboneka, manya bulo ukuti u Chala ali papipi pakwikazya Ubumwene bwache.

³² Naloli nkubabuzya ukuti ivintu vyosi vikwiza pakuboneka bo abantu abankulilo iyi batafuye bosi.

³³ Kumwanya ni chisu ichapasi vikwiza pakumala, loli amazyu ghane ghakwiza pakuba na maka bwila na bwila.”

U Yesu akubasoka abantu ukuti babanje maso

³⁴ “Muchebaye ukuti amoyo ghinyu ghatakikolezannyanje nukulya nukukolwa, sona nukupasya nizya bumi ubu, pamo isiku lila lingiza kukwinyu umwakubachenusya bulo

³⁵ ngati cho chipingo. Pakuti isiku lilalila likwiza pakubawila abantu bosi babo bakwikala muchisu ichapasi.

³⁶ Mubanje maso nukwiputa akabalilo kosi ukuti mubanje na maka aghakwipokela mwebene muvintu vyosi vivyo vikwiza pakuboneka, sona nukuti mungimilila pamaso pa Mwana uwa Muntu.”

³⁷ Isiku ni siku u Yesu akamanyisyanga mu Nyumba iya Chala, loli pabusiku akafumaghamo nukubuka kwi Ghamba ilya Misyunguti.

³⁸ Indabindabi yosi abantu bosi bakabukagha mu Nyumba iya Chala pakumuteghelezya.