Luka 19 - IBAYIBOLO 2024

U Yesu nu Zakeyu

¹ U Yesu akinjila mukaya aka Yeliko, sona akadumusannyanga bulo.

² Kukabako usongo yumo umusonkezya sonko, yuyo akaba we Zakeyu, sona akaba mukabi.

³ Akalondagha pakumwennya mumo u Yesu abeleye. Loli pakuti u Zakeyu akaba muntu mupimpa, akapotwa pakumwennya pachifukwa ichakuti abantu bakaba binji.

⁴ Po akachimbilila kuntazi nukukwela mwikwi ilya ikuyu ukuti amwennye u Yesu, pakuti u Yesu akadumusannya muzila yilayila.

⁵ Bo u Yesu afika pabuzilo bula akennya mumwanya nukumubuzya ukuti, “Zakeyu, ika lubilolubilo pakuti ilelo imbaghiye pakwikala munyumba yako.”

⁶ Umwalubilolubilo u Zakeyu akika nukumupokela nu buhobosu nkani.

⁷ Abantu bosi babo bakennya chinichi bakanda pakwilumbusya bakati, “Umuntu yunuyu aba muyeni munyumba iya muntu uwambibi.”

⁸ U Zakeyu akimilila nukumubuzya u Mwene ukuti, “Ivwa kuno, Mwene! Nkwiza pakubapa pakasi na pakasi ivyuma vyane abantu abapina, sona nanti imuzimbuyepo umuntu yumo nkwiza pakumunyosezya ka folo ukuchilapo.”

⁹ U Yesu akamubuzya akati, “Ubupoki bwiza munyumba iyi ilelo, pakuti umuntu uyu wepe waluko ulwa Abulahamu.

¹⁰ Pakuti u Mwana uwa Muntu akiza pakupoka abantu abakusobela.”

Ichili icha salabazya izya golide

¹¹ Bo abantu bakuteghelezya zinizi, u Yesu akendelela pakubabuzya ichili pakuti akaba papipi nu Yelusalemu, sona abantu bakinong'onagha ukuti u Chala ali papipi pakwikazya Ubumwene bwache.

¹² Po akati, “Kukabako umuntu yumo uwapamwanya, yuyo akabukagha kuchisu ichakubutali ukuti imikiwe pakuba we mwene, po akabwela kunyumba bo bamwimika.

¹³ Bo achili pakubuka, akabitizya abambombo bache 10 bala. Akamupa umuntu wesi isalabazya izya golide teni, sona akababuzya akati, ‘Muzibombezye imbombo indalama izi mupaka nize.’

¹⁴ Loli abantu aba mukaya kache bakamubenga, po bakatuma intumi ukuti, ‘Aswe tutakumulonda umuntu uyu pakuba we mwene witu.’

¹⁵ “Loli umuntu yula akimikiwa pakuba we mwene nukubwelako. Panapo na panapo akabitizya abambombo bache, babo akabapa indalama zyache ukuti azimanye zizyo bakabilapo.

¹⁶ Uwambombo uwakwanda akiza nukuti, ‘Wee mwene, ukampa isalabazya yoka, loli ilelo nakabilapo izinji teni.’

¹⁷ Akati, ‘Wabomba akiza, we wambombo umwiza nu musubiliwa! We musubiliwa patuntu utunandi, po ukwiza pakuba we songo uwa twaya utukulu nkani teni.’

¹⁸ Uwambombo uwabubili akiza nukuti, ‘Wee mwene, ukampa isalabazya yoka, loli ilelo nakabilapo izinji fayivi.’

¹⁹ Uwambombo uyu akamubuzya akati, ‘Ukwiza pakuba we songo uwa twaya utukulu nkani fayivi.’

²⁰ Uwambombo uyunji akiza nukuti, ‘Wee mwene, isalabazya yako iya golide iyi, nayifisite mu kamwenda.

²¹ Nkanyilagha pakuti we muntu umukali. Ukusenda na chicho chite chako, sona ukwinula chicho utabyalite.’

²² Akamubuzya akati, ‘We wambombo umubibi! Nkwiza pakubombezya amazyu ghako pakukususya awe. Uzimanye ukuti ane ne muntu umukali, nkusenda na chicho chite chane, sona nkwinula chicho intabyalite.

²³ Po nkimba choni chicho utakabikagha indalama yane kunyumba iyakusungilamo indalama ukuti bo nkubwela impokele poka na yiyo yakabilapo?’

²⁴ Po akababuzya abantu babo bakimilila palapala akati, ‘Mufyule isalabazya yoka nukumupa uwambombo yuyo ali ni salabazya teni.’

²⁵ “Loli abantu bala bakamubuzya bakati, ‘Mwene, ali nazyo kale isalabazya teni.’

²⁶ Akamula akati, ‘Umuntu wesi yuyo ali nako kale kamo, akwiza pakumonjelezyapo ivyinji ukuchila. Loli umuntu wesi yuyo ate nako kamo, akwiza pakufyuliwa na kanandi bulo kako ali nako kale.

²⁷ Loli abalwani bane babo batakandondagha ukuti imbanje ne mwene wabo, mwize nabo kuno nukubaghogha pamaso papane.’ ”

U Yesu akwinjila mu Yelusalemu nu bupoti

²⁸ Bo u Yesu anena amazyu ghanagha, po akalongolela pakubuka mu Yelusalemu.

²⁹ Bo apalamila kutwaya utwa Betifage nu Betaniya papipi ni Ghamba ilya Misyunguti, akabatuma abamanyili bache babili.

³⁰ Akababuzya akati, “Bukagha mukaya kako kali kuntazi kwinyu. Bo mwinjila bulo, mukwiza pakumwagha umwana uwa mpunda bamupinyiliye, yuyo batakwelitepo nalumo. Mumusatule nukwiza nawe kuno.

³¹ Nanti umuntu yumo akubalalusya ukuti, ‘Nkimba choni chicho mukumusatula?’ Mumubuzye ukuti, ‘U Mwene akumulonda.’ ”

³² Bakabuka nukuzyagha zyosi zizyo u Yesu akababuzya.

³³ Bo bali pakumusatula, abenecho bakabalalusya bakati, “Choni chicho muli pakusatula umwana uwa mpunda?”

³⁴ Bakamula bakati, “U Mwene akumulonda.”

³⁵ Po bakabuka nawe kwa Yesu, bakatenga amenda panyuma iya mpunda yila nukumukwezyapo u Yesu.

³⁶ Bo u Yesu akubuka, abantu bakatenga amenda ghabo mumusebo.

³⁷ Bo apalamila ku Yelusalemu, pabuzilo bubo umusebo ghukikilagha kwi Ghamba ilya Misyunguti, abamanyili bache abinji bakanda pakumupalizya u Chala na mazyu agha pamwanya pachifukwa icha vintu ivikulu vivyo bakavyennya ukuti,

³⁸ “U Chala amusaye u mwene yuyo akwiza mwitabwa ilya Mwene. Umutende kumwanya nkani, sona ubuchindamu kwa Chala.”

³⁹ Po aba Falisayi bamo muchilundilo chila bakanena kwa Yesu bakati, “Wee Mumanyisi, babuzye abamanyili bako ukuti babanje myee.”

⁴⁰ U Yesu akamula akati, “Nkubabuzya ukuti nanti baba myee, amabwe gho ghagho ghakwiza pakukolomoka.”

U Yesu akulila pachifukwa icha Yelusalemu

⁴¹ U Yesu akapalamila kukaya akakulu kalakala, po akakalilila, bo akennya,

⁴² nukuti, “Wee, nanti bulo ilelo wachimenye chicho chikwiza nu mutende. Loli, awe, ilelo amaso ghako ghatangachennya.

⁴³ Akabalilo kakwiza bo abalwani bako bakwiza pakukuzyungulila kosi na kosi. Bakwiza pakubakanizya abantu bako pakufuma kuzi nukwinjila mukasi.

⁴⁴ Bakwiza pakukuzimizya poka na bantu bako bosi. Bakwiza pakumongolannya ivibumba vyosi, sona batakwiza pakulileka nalimolimo ibwe palyamwabo, pakuti utakakaghannya akabalilo kako u Chala akalondagha pakukupoka.”

U Yesu mu Nyumba iya Chala

⁴⁵ U Yesu akinjila mu Nyumba iya Chala nukwanda pakubachimbizya babo bakaghulagha nukughulizya.

⁴⁶ Akababuzya akati, “Amasimbo ghakuti, ‘Inyumba yane yikwiza pakwitiziwa nyumba iyakwiputilamo.’ Loli amwe mwayipela pakuba nyumba iyakuvwamilamo amavyondongo!”

⁴⁷ Isiku ni siku u Yesu akamanyisyanga mu Nyumba iya Chala. Abaputi abasongo na bamanyisi aba Ndaghilo na balongozi aba Chiyuda bakalondagha pakumughogha,

⁴⁸ loli batakayaghagha izila iya kumughoghela pakuti abantu bosi bakendelela pakumuteghelezya, sona batakalondagha ukuti babwinde izyu nalimolimo.