Luka 18 - IBAYIBOLO 2024

Ichili icha mukolo umufwilwe nu mulongi

¹ Po u Yesu akababuzya abamanyili bache ichili pakubamanyisya ukuti biputaye akabalilo kosi nukusita ukulita.

² Akati, “Mukaya kamo mukabamo umulongi yumo, yuyo atakamunyilagha u Chala, pamo ukubachindika abantu.

³ Sona mukaya mulamula mukaba umukolo umufwilwe, yuyo akizagha kukwache kabilikabili pakumulambilizya ukuti, ‘Undongeleko inongwa nu mulwani wane!’

⁴ Akabalilo akatali umulongi yula akakanagha pakulonga inongwa yila, loli pisinda pache akanena mumoyo wache akati, ‘Napapo intakumunyila u Chala, pamo ukubachindika abantu,

⁵ loli pachifukwa ichakuti umufwilwe uyu akuntamya, nkwiza pakumulongela inongwa yache, umwakuti atakanditizye nukwiza kwache kabilikabili.’ ”

⁶ Po u Mwene akati, “Teghelezya vivyo umulongi uwamabeko uyu akanena.

⁷ Nkimba u Chala atakwiza pakubalongela akiza abantu bache, babo bakumulilila umusanya nu busiku? Nkimba akwiza pakuzyelazyela pakubavwa?

⁸ Nkubabuzya ukuti akwiza pakubalongela akiza, sona akwiza pakubomba umwalubilolubilo. Loli bo u Mwana uwa Muntu akwiza, nkimba akwiza pakulwagha ulwitiko pachisu ichapasi?”

Ichili icha mu Falisayi nu musonkezya sonko

⁹ U Yesu akababuzya sona ichili ichinji abantu babo bakituvyanga ukuti bagholosu nukubasula abanji.

¹⁰ Akati, “Kukabako abantu bamo babili, babo bakabuka pakwiputa mu Nyumba iya Chala. Weka akaba mu Falisayi, uyunji akaba musonkezya sonko.

¹¹ “Umu Falisayi akimilila pamwene nukwiputa ukuti, ‘Chala, nkukupalizya pakuti inte ne mupafu, sona inte ne mubomba mbibi, pamo mulowe ngati bo bantu bamo. Nkukupalizya pakuti intayanite nu musonkezya sonko yula.

¹² Ane nkutuzya pakulya amasiku mabili mwasabata weka, sona nkubika ichigaba choka pa vigaba 10 ivya vyosi vivyo nkupokela.’

¹³ Loli umusonkezya sonko akimilila pabutalipo, sona atakalonda ukwennya na kumwanya. Loli akikoma pachifuba nukuti, ‘Wee Chala, umpelele ichisa, ane ne wambibi.’ ”

¹⁴ U Yesu akati, “Nkubabuzya ukuti umusonkezya sonko akabwela kunyumba, bo u Chala amunena pakuba mugholosu pamaso papache, umu Falisayi yula, awe. Pakuti umuntu wesi yuyo akwikwezya mwene akwiza pakwisiwa, sona umuntu wesi yuyo akwiyisya mwene akwiza pakukweziwa.”

U Yesu akubasaya abana

¹⁵ Abantu bamo bakiza na bana kwa Yesu ukuti abasaye pakubika inyobe zyache. Loli bo abamanyili bache bennya zinizi, bakabachemela.

¹⁶ Loli u Yesu akabitizya abana bala nukuti, “Baleke abana bize kukwane, mutakabakanizye pakuti Ubumwene ubwa Chala ubwa bantu babo bali ngati bo aba.

¹⁷ Naloli nkubabuzya ukuti umuntu wesi yuyo atakupokela Ubumwene ubwa Chala ngati we mwana, ate akinjilemo nalumo.”

Nizya muntu umukabi

¹⁸ Umulongozi yumo uwa Chiyuda akamulalusya u Yesu akati, “Wee Mumanyisi umwiza, nkimba imbombe ichoni ukuti impokele ubumi ubwa bwila na bwila?”

¹⁹ U Yesu akamula akati, “Nkimba choni chicho ukunyitizya ukuti ne mwiza? Nayumo umuntu yuyo mwiza, loli u Chala mwene.

²⁰ Ughamenye amalamulo aghakuti: Utakalowaye, utakaghoghaye, utakibaye, utakabanje we kaboni umumyasi, sona chindika ughuso nu nyoko.”

²¹ Umuntu yula akamula akati, “Nkonkite amalamulo ghosi ghanagha ukwandila kubwana bwane.”

²² Bo u Yesu ivwa zinizi, akamubuzya akati, “Ukusobelwa ichintu choka bulo: Kaghulizye vyosi vivyo uli navyo nukubapa abapina indalama, po ukwiza pakuba nu bukabi kumwanya, po wize nukunkonka.”

²³ Loli bo umuntu yula ivwa zinizi, akaba ni chitima pachifukwa ichakuti akaba mukabi nkani.

²⁴ U Yesu akennya ukuti umuntu yula akaba ni chitima, po akati, “Chipala nkani ukuti abantu abakabi binjile mu Bumwene ubwa Chala.

²⁵ Chipala nkani ukuti umuntu umukabi injile mu Bumwene ubwa Chala ukuchila ukuti ingamila yinjile mu kabwazi aka sindano.”

²⁶ Po abantu babo bakamwivwa akunena bakalalusya bakati, “Po nkimba wewenu angapokiwa?”

²⁷ U Yesu akamula akati, “Zinizi zitangabombiwa nu muntu, loli nu Chala. Pakuti nu Chala ichintu chosi chipepe bulo.”

²⁸ U Pitala akati, “Ennya, twavileka vyosi nukukukonka awe.”

²⁹ U Yesu akababuzya akati, “Eee, naloli nkubabuzya ukuti umuntu wesi yuyo akalekite akaya, pamo umuchi, pamo abakamu, pamo abapapi, pamo abana pachifukwa icha Bumwene ubwa Chala,

³⁰ akwiza pakupokela ivintu ivyinji ukuchilapo akabalilo aka, sona akwiza pakupokela ubumi ubwa bwila na bwila pakabalilo kako kakwiza.”

U Yesu akunena akabutatu nizya bufwe nukuzyuka kwache

³¹ U Yesu akabasendela abamanyili bache 12 bala palubazu nukubabuzya ukuti, “Ivwa kuno, tukubuka mu Yelusalemu, mumo vyosi vivyo abalaghuzi bakasimba nizya Mwana uwa Muntu vikwiza pakukwanilisiwa.

³² Akwiza pakubikiwa munyobe izya bantu babo bate ba Yuda, babo bakwiza pakumobezya, nukumutuka, sona nukumufwinila amati.

³³ Bakwiza pakumusyempa nukumughogha, loli bo ghachilapo amasiku matatu, akwiza pakuzyuka kubufwe.”

³⁴ Loli abamanyili bache batakivwisya nachimochimo pavyosi vinivi. Iching'anamulo icha mazyu chikafisiwa kukwabo, po batakamanya vivyo u Yesu akanenagha.

U Yesu akumupozya umuntu umufwamaso

³⁵ Bo u Yesu akupalamila ku Yeliko, kukabako umuntu umufwamaso yuyo akikalagha mulubazu ulwa musebo nukulabalaba.

³⁶ Bo ivwa ukuti ichilundilo chikudumusannya, akalalusya akati, “Nkimba cho choni chicho chikubombiwa?”

³⁷ Bakamubuzya bakati, “U Yesu uwamu Nazaleti akudumusannya.”

³⁸ Akakolomoka nkani akati, “Wee Yesu, u Mwana uwa Devedi, umpelele ichisa.”

³⁹ Abantu babo bakaba kuntazi bakamuchemela nukumubuzya ukuti abanje myee. Loli akakolomoka nkani akati, “Mwana uwa Devedi, umpelele ichisa!”

⁴⁰ U Yesu akima nukulamula ukuti bize nawe umufwamaso yula kukwache. Bo biza nawe papipi, u Yesu akamulalusya akati,

⁴¹ “Nkimba ukulonda nkubombele ichoni?” Akamula akati, “Wee Mwene, nkulonda pakwennya sona.”

⁴² U Yesu akamubuzya akati, “Ennya! Ulwitiko lwako lwakupozya.”

⁴³ Panapo na panapo umuntu yula akanda pakwennya nukumukonka u Yesu, bo akumupalizya u Chala. Bo ichilundilo icha bantu chennya zinizi, chosi chikamupalizya u Chala.