Luka 16 - IBAYIBOLO 2024

Ichili icha kapitawa umuchevu

¹ U Yesu akababuzya abamanyili bache akati, “Kukabako umuntu yumo umukabi yuyo akaba nu kapitawa uwakwenelezya ichuma chache. Umuntu umukabi yula akabuziwa ukuti ukapitawa wache akunangannya ichuma chache.

² Po akamwitizya nukumulalusya ukuti, ‘Nkimba choni chicho nkwivwa nizya awe? Zagha nu kalata uwakulingannya namumo wabombela, pachifukwa ichakuti utangaba we kapitawa sona.’

³ Uwambombo yula akanena mumoyo wache akati, ‘Nkimba imbombe choni? Umwene wane anyefya pambombo. Inte na maka nkani aghakulimila, sona indi ni soni pakulabalaba.

⁴ Ilelo namanya chicho nkwiza pakubomba, umwakuti abantu bize bampokele munyumba zyabo, bo imbombo yamalila.’

⁵ Po akamwitizya wekaweka uwa bantu babo bakaba ni nkongole kwa mwene wache. Akamulalusya uwakwanda akati, ‘Nkimba awe ukakopa vilinga kwa mwene wane?’

⁶ Akamwamula akati, ‘Indobo izya mafuta agha misyunguti 100.’ Ukapitawa yula akamubuzya akati, ‘Ukalata wako uwa nkongole uyu. Ikala pasi nukusimbapo indobo 50.’

⁷ Po akamulalusya uyunji akati, ‘Nkimba awe ukakopa vilinga?’ Akamwamula akati, ‘Amasaka agha ngano 1,000.’ Ukapitawa yula akamubuzya akati, ‘Ukalata wako uwa nkongole uyu, simbapo amasaka 800.’

⁸ Polelo u mwene uwa kapitawa yula akamupalizya uwambombo umusitakusubiliwa yula, pachifukwa icha busitakusubiliwa kwache. Pakuti abantu aba muchisu ichapasi bachevu pakwendezya ivintu vyabo ukuchila abantu babo bali mu lukozyo.”

⁹ Po u Yesu akendelela pakunena ukuti, “Nkubabuzya ukuti mwiyaghile mwebene abamanyani pakubombezya ivintu ivya muchisu ichapasi, umwakuti bo chamala, mukwiza pakupokeliwa munyumba iya bwila na bwila.

¹⁰ Umuntu wesi yuyo musubiliwa muvintu ivinandi, akwiza pakuba musubiliwa muvintu ivikulu, sona umuntu wesi yuyo mumyasi muvintu ivinandi, akwiza pakuba sona mumyasi muvintu ivikulu.

¹¹ Po nanti ute we musubiliwa ni vyuma ivya muchisu ichapasi, po nkimba ungaba bulibuli musubiliwa ni vyuma ivyanaloli?

¹² Nanti ute we musubiliwa pavintu vivyo vya muntu uyunji, nkimba wewenu angakupa vivyo vyako?

¹³ “Atalipo uwambombo yuyo angababombela imbombo abamwene babili pakabalilo koka. Pakuti angamughana weka nukumubenga uyunji, pamo angamwivwila weka nukumusula uyunji. Utangabombela vyosi vibili akabalilo koka, u Chala ni ndalama.”

Amazyu ghamo agha Yesu

¹⁴ Bo aba Falisayi bivwa zyosi zinizi, bakamobezya u Yesu pakuti bakazighana nkani indalama.

¹⁵ U Yesu akanena nabo akati, “Mwighanite pakwinena mwebene ukuti mwe bagholosu pamaso pabantu, loli u Chala aghamenye amoyo ghinyu. Pakuti chicho abantu bakuti chapamwanya nkani, pamaso pa Chala chite ni mbombo nayimoyimo.

¹⁶ “Indaghilo izya Mozesi na masimbo agha balaghuzi vikabako mupaka pakabalilo aka Yohani Uwalozyo. Ukwandila pakabalilo kalakala Amazyu Amiza agha Bumwene ubwa Chala ghalumbililiwe, sona umuntu wesi akwifinyilizya ukuti injilemo.

¹⁷ Loli chipepe ukuti kumwanya ni chisu ichapasi vimale ukuchila ukuti akasimbo akanandi aka Ndaghilo kamale amaka.

¹⁸ “Umuntu wesi yuyo akumusosya umuchi nukusenda uyunji, kokuti akulowa. Umwanavuli yuyo akusenda umukolo yuyo asokite, kokuti wepe akulowa.

Nizya muntu umukabi nu Lazalo

¹⁹ “Kukabako umuntu yumo yuyo akavwalagha amenda agha pamwanya nukwikala mubumi ubwakwihobosya amasiku ghosi.

²⁰ Kukabako sona nu muntu umupina yuyo akaba we Lazalo, yuyo bakamubikagha pamulyango uwa muntu umukabi yula, sona akaba ni vilonda mumubili ghosi.

²¹ Akanyonywanga pakulya utubululusya, tuto tukawanga pasi pitebulo ilya muntu umukabi yula. Nimbwa bulo zikizagha nukumyanta ivilonda vyache.

²² “Akabalilo kakakwana, umuntu umupina akafwa. Abantumi aba kumwanya bakamunyamula nukumubika kulubazu ulwa Abulahamu palusekelo ulwa kumwanya. Umuntu umukabi wepe akafwa nukusyiliwa.

²³ Bo akuyimba nkani muchisu icha bantu abafwe, akamwennya u Abulahamu pabutalipo poka nu Lazalo kulubazu lwache.

²⁴ Po akakolomoka nkani akati, ‘Tata Abulahamu, umpelele ichisa ane. Mutume u Lazalo ukuti adwibike akasonga aka kafingwi kache mumizi ukuti akatazye ululimi lwane, pachifukwa ichakuti indi muntamyo nkani pamoto ughu!’

²⁵ Loli u Abulahamu akati, ‘Mwana wane, kumbuka ukuti pakabalilo aka bumi bwako ukapeghiwa ivintu ivyiza vyosi, bo u Lazalo akutamiwa. Loli ilelo akusekela mwene, po awe uli pakutamiwa nkani.

²⁶ Ukonjelezya pavyosi vinivi, pakasi papitu pali ichibanka ichibizu nkani, umwakuti babo bakulonda pakulobokela kuno batangaloboka, sona nayumo umuntu yuyo angalobokela kukwinyu.’

²⁷ “Umuntu umukabi yula akati, ‘Po tata Abulahamu, nkukulaba ukuti umutume u Lazalo kunyumba iya tata wane,

²⁸ kuko indi na bakamu fayivi. Abuke nukubasoka ukuti baleke ukwiza kubuzilo ubwa ntamyo ubu.’

²⁹ Po u Abulahamu akati, ‘Abakamu bako bali na mabuku agha Mozesi na balaghuzi; baleke bateghelezye zizyo ghakunena.’

³⁰ Umuntu umukabi yula akamula akati, ‘Awe, tata Abulahamu! Vinivyo vitakukwana, loli nanti umuntu yumo azyuka kubufwe nukubuka kukwabo, bakwiza pakupinduka nukuzileka imbibi zyabo.’

³¹ Loli u Abulahamu akati, ‘Nanti batakuteghelezya kwa Mozesi na balaghuzi chitalipo nachimochimo chicho chingabombiwa napapo yumo angazyuka kubufwe.’ ”