Luka 14 - IBAYIBOLO 2024

U Yesu akumupozya umubine

¹ Pisiku limo Ilyakutuzya u Yesu akabuka pakulya munyumba iya mulongozi yumo uwa ba Falisayi. Po abantu bakamwenelezyanga nkani.

² Umuntu yuyo ivinama ni nyobe vikizula, akiza kwa Yesu,

³ po u Yesu akabalalusya abamanyisi aba Ndaghilo naba Falisayi akati, “Nkimba Indaghilo zyitu zikutwitikizya pakupozya Pisiku Ilyakutuzya pamo, awe?”

⁴ Loli batakanena nachimochimo. U Yesu akamupalamasya umuntu yula nukumupozya, po akamubuzya ukuti abwelaye.

⁵ Po u Yesu akabalalusya akati, “Nkimba wewenu umuntu yuyo impunda pamo ing'ombe yiwiliye muchiliba Pisiku Ilyakutuzya, atakuyefyamo umwalubilolubilo?”

⁶ Loli bakapotwa pakwamula pazinizi.

Nizya kwiyisya nukupokela akiza abayeni

⁷ Bo u Yesu ennya mumo abayeni bakasalilagha ubuzilo ubwamuchizi, akababuzya abantu bosi ichili akati,

⁸ “Nanti yumo akubitizya ku lusekelo ulwa sendwa, mutakikalaye pabuzilo ubwamuchizi, pakuti chingabombiwa ukuti umuntu yumo uwapamwanya ukukuchila, wepe bamwitizya,

⁹ po yuyo akabitizya mwebosi babili angiza nukubabuzya ukuti, ‘Mupe uyu ubuzilo ubu.’ Po awe ukwiza pakukoziwa isoni pakwikala pabuzilo ubwapasi.

¹⁰ Loli nanti witiziwa, bukagha nukwikala pabuzilo ubwapasi, po umuntu yuyo akakwitizya akwiza pakubabuzya ukuti, ‘Mumanyani wane, zagha wikale pabuzilo ubwiza ubu.’ Po chinichi chikwiza pakukupa umuchizi pamaso pa bayeni bosi.

¹¹ Pakuti umuntu wesi yuyo akwikwezya mwene akwiza pakwisiwa, sona umuntu wesi yuyo akwiyisya mwene akwiza pakukweziwa.”

¹² U Yesu akamubuzya umuntu yuyo akamwitizya pakulya nawe yula akati, “Nanti ukuyannya ichakulya icha pamusanya pamo icha pachamabwila, utakabitizye abamanyani bako, pamo abawamwinyu, pamo abakamu bako, pamo abapalamani bako abakabi, pakuti bope bakwiza pakukwitizya, po bunubu bakwiza pakukunyosezya chicho ukababombela.

¹³ Loli nanti ukuyannya ulusekelo, witizye abantu abapina, na bantu abalemazu, sona na bafwamaso.

¹⁴ Po ukwiza pakusayiwa pachifukwa ichakuti bate nacho nachimo ichakukunyosezya papo. U Chala akwiza pakukunyosezya pisiku lilyo abantu abagholosu bakwiza pakuzyuka kubufwe.”

Ichili icha lusekelo ulukulu nkani

¹⁵ Bo umuntu weka uwa babo akalyanga poka nabo ivwa zinizi, akamubuzya u Yesu akati, “Basayiwa babo bakwiza pakubapo palusekelo ulukulu nkani mu Bumwene ubwa Chala.”

¹⁶ U Yesu akamubuzya akati, “Kukabako umuntu yumo, yuyo akayannya ulusekelo ulukulu nukwitizya abantu abinji.

¹⁷ Bo akabalilo aka lusekelo kakwana, akabatuma abambombo bache pakubabuzya abantu babo bakitiziwa ku lusekelo ukuti, ‘Zagha, ivintu vyosi vyayaniziwa kale.’

¹⁸ Loli bosi bakanda pakulingannya ivifukwa wekaweka. Uwakwanda akamubuzya uwambombo yula akati, ‘Naghula bulo umughunda, po imbaghiye pakubuka nukwennya. Uhobokele, ntakwizako.’

¹⁹ Yumo akati, ‘Naghula bulo abakambaku 10 aba ngolo, po losi ulu nkubuka pakubayezya. Uhobokele, ntakwizako.’

²⁰ Uyunji akati, ‘Nasenda umukolo lunulu bulo, po pachifukwa chinichi ntakwizako.’

²¹ Uwambombo yula akanyokela nukumubuzya vyosi u mwene wache. U mwene yula akakalala nkani nukumubuzya uwambombo yula ukuti, ‘Bukagha losi ulu mumisebo imikulu ni minandi nukwiza na bapina, na babo bafuye ivinama na bafwamaso, sona na balemazu.’

²² Bo uwambombo yula abwelako akati, ‘Wee Mwene, nabomba vyosi vivyo ukandamula, loli ubuzilo buchili bulipo.’

²³ Po u mwene wache akamubuzya uwambombo yula akati, ‘Bukagha mumisebo na kuzila izya kaya aka wize na bantu pamaka, ukuti inyumba yane yizule.

²⁴ Nkukubuzya ukuti nayumo umuntu uwa bantu babo nkabitizya yuyo akwiza pakughonja ivya palusekelo lwane.’ ”

Nizya kumukonka u Yesu

²⁵ Akabalilo kamo bo ichilundilo icha bantu chikwenda nu Yesu, u Yesu akaghalabuka nukubabuzya ukuti,

²⁶ “Umuntu wesi yuyo akwiza kukwane atangaba mumanyili wane, pene papo nanti anganite nkani ukuchila uwise nu nyina, umuchi na bana bache, abawamwabo na bayemba bache, sona na yuyo mwene.

²⁷ Umuntu wesi yuyo atiyanizye pakuyimba mupaka nukufwa nukunkonka, atangaba mumanyili wane.

²⁸ “Nanti umuntu yumo mumwinyu akulonda pakuzenga inyumba, akwanda tasi ukwikala pasi nukubelengela indalama zizyo zikulondiwa ukuti ennye nanti ali ni ndalama izyakukwana pakumalizya imbombo yache yila.

²⁹ Nanti atakubomba bunubu, lumo angazenga ulwalo lwene, nukupotwa pakumalizya inyumba yosi. Po bosi babo bachennya chicho chikabombiwa bakwiza pakumuseka.

³⁰ Bakwiza pakunena ukuti, ‘Umuntu uyu akanda pakuzenga inyumba, loli apotwa pakuyimalizya.’

³¹ “Nanti u mwene yuyo ali na basilikali 10,000 akulonda pakulwa nu mwene uwamwabo, yuyo ali na abasilikali 20,000 ukwikala tasi pasi nukwinong'ona nanti ali na maka aghakulwila nu mwene uwamwabo yula.

³² Nanti ate nagho amaka akwiza pakutuma intumi pakukomana nu mwene uwamwabo yula pakulaba umutende, bo ali kubutali.

³³ “Umwakuyana bulo, nayumo umuntu yuyo angaba mumanyili wane, pene papo nanti avileka vyosi vivyo ali navyo.”

Nizya mbeya yiyo yite ni mbombo

³⁴ “Imbeya nyiza, loli nanti yasupa, nkimba mungayipela bulibuli ukuti yibanje mbeya sona?

³⁵ Yite sona ni mbombo manyi mo mwitope manyi mo mumuvundo. Yikutaghiwa bulo pachintundululu. Yuyo ali na makutu aghakwivwila, ivwe!”