Luka 12 - IBAYIBOLO 2024U Yesu akubasoka nizya buzimbuli ( Mat. 10.26-27 ) 1 Mukabalilo kalakala bo abantu amasabuzani na masabuzani bakabungana poka, umwakuti bakakanyanagha, u Yesu akanena tasi na bamanyili bache akati, “Muchebaye ni chilungo icha ba Falisayi, chicho chikung'anamula ubuzimbuli bwabo. 2 Ichintu chosi chicho chivwinkiwe chikwiza pakuvwinkuliwa, sona ichintu chosi chicho chakubusyefu chikwiza pakuboneka pabuzelu. 3 Zyosi zizyo mwanena kubusyefu zikwiza pakwivwika pabuzelu, sona zyosi zizyo mwateketa mukasi muvipinda zikwiza pakufumusiwa pachisonje. Wewenu yuyo tumunyilaye ( Mat. 10.28-31 ) 4 “Bamanyani bane, nkubabuzya, mutakabanyilaye abantu babo bangaghogha umubili, loli pisinda pache batangabomba nachimochimo ichinji. 5 Leka imbalanjizye yuyo mubaghiye pakumunyila. Mumunyilaye u Chala, yuyo nanti amufyula umuntu ubumi, ali nu bulaghili ubwakumusumbila mu Gehena. Naloli weyuyo mubaghiye pakumunyila! 6 “Nkimba utwatiti fayivi tutangaghuliziwa ni salabazya zibili? Loli nakamo akatiti kako u Chala akaluvizye. 7 Zyope ni sisi izya kumitu yinyu zibelengiwe. Po mutakanyilaye pakuti amwe mwe bapamwanya nkani ukuchila utwatiti utwinji! Nizya kumwitika nukumukana u Kilisitu ( Mat. 10.32-33 , 12.32 , 10.19-20 ) 8 “Naloli nkubabuzya ukuti umuntu wesi yuyo akunyitika pamaso pabantu, u Mwana uwa Muntu wepe akwiza pakumwitika pamaso pa bantumi aba Chala. 9 Loli umuntu wesi yuyo akunkana pamaso pabantu, u Mwana uwa Muntu wepe akwiza pakumukana pamaso pa bantumi aba Chala. 10 “Umuntu wesi yuyo akumunenela u Mwana uwa Muntu ivintu ivibibi, akwiza pakuhobokeliwa. Loli umuntu wesi yuyo akumusamula u Muzimu Umuzelu atakwiza pakuhobokeliwa nalumolumo. 11 “Bo babasitaka munyumba izyakwiputilamo, pamo pa basongo, pamo pa balaghili, mutakapasyanje ukuti, ‘Nkimba tukwiza pakunena ichoni? Nkimba tukwiza pakwiyimila bulibuli?’ 12 Pakuti u Muzimu Umuzelu akwiza pakubamanyisya ichakunena pakabalilo kalakala.” Ichili icha mukabi umupunganu 13 Umuntu yumo mukasi muchilundilo icha bantu akamulaba u Yesu akati, “Wee Mumanyisi, umubuzye uwamwitu ukuti agabe ivyuma vivyo utata umuyazi akatulekela.” 14 Loli u Yesu akamwamula akati, “Mumanyani, nkimba wewenu akampa imbombo iyakulonga, pamo iyakubagabannya ivyuma ivya muyazi yula?” 15 Po akendelela pakubabuzya abantu bosi akati, “Muchebaye, sona mutakabanje nu bupafu ubwa luko losi. Napapo umuntu angaba ni vyuma ivyinji, ivyuma vila vitangabupoka ubumi bwache.” 16 Po u Yesu akababuzya ichili akati, “Kukabako umuntu yumo umukabi, yuyo akaba nu mughunda ghugho ghukelagha ivyakulya ivyiza. 17 Po akanda pakwinong'ona mwene akati, ‘Inte nu buzilo nabumo ubwakusungilapo ivyakulya vyane vyosi. Nkimba ningabomba choni?’ 18 Po akanena mwene akati, ‘Ichi, cho chicho nkwiza pakubomba. Nkwiza pakumongolannya intamba zyane nukuzenga inkulupo, mumo nkwiza pakusungamo ivyakulya vyane nu katundu wane wesi uyunji. 19 Po nkwiza pakughubuzya umoyo wane ukuti we walusako. Uli ni vyuma ivyinji vivyo vikwiza pakukusunga amaka aminji. Bupepule bulo, lyanga, sona ung'welaye nukuhoboka wemwene!’ 20 Loli u Chala akati, ‘Wee mupunganu awe! Ubusiku bunubu ubumi bwako bukwiza pakufyuliwa, po wewenu akwiza pakusunga ivintu vyako vyosi vinivi?’ ” 21 Pabumalilo u Yesu akati, “Momumo zibeleye na bantu babo bakwilundikila bene ivyuma, loli bate bakabi pamaso pa Chala.” Nizya kumusubila u Chala ( Mat. 6.25-34 ) 22 Po u Yesu akababuzya abamanyili bache akati, “Nkubabuzya ukuti mutakapasyanje nizya bumi bwinyu ukuti mukwiza pakulya ichoni, pamo mukwiza pakuvwala ichoni. 23 Pakuti ubumi bwapamwanya ukuchila ichakulya, sona umubili wapamwanya ukuchila amenda. 24 Ennya, abachigobe batakupesa imbeyu pamo ukwinula, sona bate ni nyumba, pamo intamba izya kusungilamo ivyakulya, loli u Chala akubalyesya! Amwe mwe bapamwanya nkani ukuchila iviyuni! 25 Nkimba alipo umuntu pakasi papinyu yuyo angonjelezya isiku lyoka ilya bumi bwache pakupasya? 26 Nanti mutangabomba na kantu akanandi bulo ngati ko aka, choni chicho mukupasya ni vintu ivinji? 27 Ennya ubwezya ubwa muzi mumo bukukulila. Butakubomba imbombo, pamo ukwipangila amenda. Loli nkubabuzya ukuti u Mwene u Solomoni nu bukabi bwache bosi, atakaba na menda amiza ghagho ghayanite bulo nubwezya bumo ubu. 28 Nanti u Chala angaghavwika amasote, ghagho ghaliko ilelo nukughasumbila pamoto indabi, nkimba atangabavwika amwe. Mwe bantu aba lwitiko ulunandi amwe? 29 Polelo mutakapasyanje ukuti tukwiza pakulya ichoni, pamo tukwiza pakung'wela ichoni. 30 Pakuti abantu abakuzi aba muchisu ichapasi bo babo bakuvilonda ivintu vinivi. Ughuso avimenye ivintu vyosi vivyo mukuvilonda. 31 Loli amwe, mulondaye tasi Ubumwene ubwa Chala, po akwiza pakubapa ivintu vyosi vinivi. Nizya bukabi ubwa kumwanya ( Mat. 6.19-21 ) 32 “Amwe mwe kamudimo akanandi aka ng'ozi, mutakanyilaye pakuti chikamuhobosya Ughuso pakubapa Ubumwene bwache. 33 Ghulizya vyosi vivyo muli navyo nukubapa abapina indalama. Mubanje ni vikwama ivya ndalama vivyo vitakuzepuka nukwilundikila ubukabi kumwanya, bubo bute bukamale nalumo, pakuti abiba batangapankula nukwiba, sona impezu zitangabunangannya. 34 Pakuti kuko kuli ubukabi bwako, ko kuko kuli nu moyo wako. Abambombo babo bali maso 35 “Mubanje bakwiyannya pachosi chicho chikwiza, sona mukozye inyale zyinyu ukuti zilamaye. 36 Muyane bulo na bambombo babo bakulindilila u mwene wabo ukuti abwele ku lusekelo ulwa sendwa, umwakuti bo akwiza nukukong'osya pamulyango bakumwighulila umwalubilolubilo. 37 Basayiwa abambombo babo u mwene wabo akubagha bali maso bo abwelako! Naloli nkubabuzya ukuti akwiza pakwiyanizizya mwene, akwiza pakubabuzya ukuti bikale pasi nukwanda pakubabombela. 38 Basayiwa abambombo bala nanti akubagha biyanizye, bo abwelako, napapo angiza pakasi pabusiku pamo pandabindabi nkani! 39 “Loli mumanye ukuti nanti umwenecho uwa nyumba akamenye akabalilo kako umwiba akwizila ngali atitikizizye ukuti apankule inyumba yache. 40 Po namwe bulo mubaghiye pakuba bakwiyannya pachifukwa ichakuti u Mwana uwa Muntu akwiza pakabalilo kako mwiyekeye.” Uwambombo umusubiliwa nu musita ukusubiliwa ( Mat. 24.45-51 ) 41 U Pitala akati, “Wee Mwene, nkimba ichili chinichi ukutunenela twebene, pamo na bantu bosi?” 42 U Mwene akamula akati, “Nkimba wewenu wambombo umusubiliwa nu wamahala? Weyuyo u mwene wache akumubika pakuba we songo uwa vintu vyache vyosi nukubapa abambombo abanji ichakulya pakabalilo akiza. 43 Musayiwa nkani uwambombo yula nanti u mwene wache abwelako, akumwagha akubomba zinizi. 44 Naloli nkubabuzya ukuti u mwene wache akwiza pakumubika uwambombo yula pakuba we songo uwa vintu vyache vyosi. 45 “Loli nanti uwambombo yula mubibi, akunena mwene ukuti, ‘U mwene wane akukaba nkani pakubwela.’ Po akwanda pakubakoma abambombo abanji, bosi abanavuli na bakolo bulo, sona akulya, akung'wela nukukolwa. 46 U mwene uwa bambombo yula akwiza pisiku lilyo bo uwambombo yula iyekeye na pakabalilo kako atakamenye. U mwene yula akwiza pakumudumulannya nukumusumbila mubuzilo ubwa bantu abasita ukwivwila. 47 “Uwambombo yuyo achimenye chicho u mwene wache akulonda ukuti abombe, loli atakwiyannya mwene nukuchibomba akwiza pakufundiwa pakusyempiwa nkani. 48 Loli uwambombo yuyo atachimenye chicho u mwene wache akuchilonda nukubomba ichinji bulo chicho abaghiye pakufundiwa nacho, akwiza pakufundiwa pakusyempiwa panandi bulo. Umuntu yuyo akapokela ivyinji abikaye ivyinji. Sona umuntu yuyo akapokela ivyinjipo abikaye ivyinjipo nkani. Abantu bakwiza pakugabinkana pachifukwa icha Yesu ( Mat. 10.34-36 ) 49 “Nkiza pakukozya umoto pachisu ichapasi, sona nalondagha ukuti ngali wakite kale! 50 Loli imbaghiye pakoziwa mumayimba aminji, sona umoyo wane ghutakutuzyapo nalumolumo mupaka izi zibombiwe! 51 Nkimba mukwinong'ona ukuti niza pakubika umutende pachisu ichapasi? Awe, umutende awe, loli ukugabinkana. 52 Ukwandila pakabalilo aka inyumba iya bantu fayivi yikwiza pakugabinkana; abantu batatu bakwiza pakubasambukila abantu babili, sona abantu babili bakwiza pakubasambukila abantu batatu. 53 Utata akwiza pakulwana nu mwana wache umulumendo, sona wepe umwana umulumendo akwiza pakulwana nu wise. Unyina akwiza pakulwana nu mwana wache umulindu, sona wepe umwana umulindu akwiza pakulwana nu nyina. Unyinavyala akwiza pakulwana nu mulasagha, sona wepe umulasagha akwiza pakulwana nu nyinavyala.” Ukwivwisya akabalilo ( Mat. 16.2-3 ) 54 U Yesu akababuzya abantu akati, “Nanti mukwennya amabingu ghakukwela kubwinjililo bwizuba, umwalubilolubilo nukuti, ‘Ivula yikwiza pakutima,’ po naloli yikutima. 55 Po sona nanti impepo iyakuntende yikukuka mukuti, ‘Kukwiza pakupya,’ po naloli kukupya. 56 Mwe bazimbuli mwee! Nanti mumenye pakusakizya akabonekele aka vintu ivya muchisu ichapasi na kumwanya, po nkimba choni chicho mutakusakizya vivyo vikuboneka akabalilo aka? Wivwane nu wanongwa yako ( Mat. 5.25-26 ) 57 “Choni chicho mutakulonga mwebene pakubomba ichintu chicho chibaghiye pakubombiwa? 58 Nanti umuntu akusitaka, chizapo pakwivwana nawe umwalubilolubilo bo muli muzila. Pakuti nanti mutakwivwana, akwiza pakukubika munyobe izya balongi. Sona umulongi akwiza pakukubika munyobe izya musilikali, yuyo akwiza pakukwighalila mujele. 59 Nkukubuzya ukuti ukwiza pakwikala mumo mupaka ulipile indalama iyabumalilo iya nongwa yako.” |
Lambya Bible © Bible Society of Malawi, 2024.
Bible Society of Malawi