Luka 11 - IBAYIBOLO 2024

U Yesu akumanyisya nizya kwiputa

¹ Isiku limo u Yesu akiputagha pabuzilo bumo. Bo amala, umumanyili yumo akamubuzya akati, “Mwene, utumanyisye pakwiputa ukuyana namumo u Yohani akamanyizizya abamanyili bache.”

² U Yesu akababuzya akati, “Bo mukwiputa mutinji, ‘Tata, itabwa lyako lichindikiwanje, Ubumwene bwako bwizaghe,

³ utupe ichakulya icha isiku ni siku.

⁴ Utuhobokele imbibi zyitu, ukuyana namumo naswe bulo tukubahobokela abantu babo bakutunangila. Utakitikizyanje ukuti tuwile munjelo.’ ”

⁵ U Yesu akababuzya abamanyili bache akati, “Buli nanti weka mumwinyu abuka kunyumba iya mumanyani wache pakasi pabusiku nukumubuzya ukuti, ‘Wee mumanyani, unkopeleko ivibama vitatu.

⁶ Umumanyani wane afika kunyumba yane, po inte ni chakuti angalya.’

⁷ Loli nanti uwa munyumba yula amula ukuti, ‘Utakantamyanje! Nighaliye kale pamulyango, sona ane na bana bane tughonite. Po intanganyamuka ukuti nkupe ivibama vila.’

⁸ Momumo, nkubabuzya ukuti napapo atakwiza pakunyamuka nukumupa ichibama pachifukwa ichakuti we mumanyani wache, loli akwiza pakunyamuka nukumupa chosi chicho akulonda pachifukwa icha lweke lwache ulwa kulaba.

⁹ “Po nkubabuzya ukuti, Mulabaye, po mukwiza pakupokela. Mulondaye, po mukwiza pakuvyagha, sona mukong'osyanje, po ulwiyi lukwiza pakubighukila.

¹⁰ Pakuti umuntu wesi yuyo akulaba akwiza pakupokela, sona umuntu wesi yuyo akulonda akwiza pakuvyagha, sona umuntu wesi yuyo akukong'osya, ulwiyi lukwiza pakumwighukila.

¹¹ Nkimba alipo umuntu yuyo, nanti umwana wache akumulaba iswi, akumupa injoka?

¹² Pamo akumulaba ifumbi, akumupa unkonya?

¹³ Nanti mwe bantu mwe babibi mumenye pakubapa ivintu ivyiza abana binyu, zili bulibuli nu Ghuso uwakumwanya? Nkimba angapotwa pakubapa u Muzimu Umuzelu abantu babo bakumulaba?”

U Yesu nu Belezebuli

¹⁴ Isiku limo u Yesu akefyanga imizimu imibibi yiyo yikamupelagha umuntu pakuba we chinunu. Bo imizimu imibibi yila yepamo, umuntu yula akanda pakunena. Po abantu bosi bala bakaswigha nkani,

¹⁵ loli abantu bamo bakati, “We Belezebuli, usongo uwa mizimu imibibi, yuyo akumupa amaka aghakwefesezya imizimu imibibi.”

¹⁶ Abanji bakalondagha pakumutegha u Yesu mukanenele, po bakamulaba ukuti ababombele ichiswigho ichakulanjizya ukuti akaba na maka agha Chala.

¹⁷ Loli u Yesu akazimanya inyinong'ono zyabo, po akababuzya akati, “Nanti ubumwene bwasambukilana bwenebwene, ubumwene bula butangendelela, sona nanti abantu abamunyumba yoka basambukilana, inyumba yila yitangendelela.

¹⁸ Nanti ubumwene ubwa Satana bwasambukilana nukugabinkana, ubumwene bula butangendelela. Pakuti mukunena ukuti nkwefya imizimu imibibi na maka agha Belezebuli.

¹⁹ Nanti ane nkwefya imizimu imibibi na maka agha Belezebuli, po nkimba wewenu akubapa abamanyili binyu amaka aghakwefesezya nagho imizimu imibibi? Polelo imbombo izya bamanyili binyu zyo zikulanjizya pabuzelu ukuti amwe mwananga.

²⁰ Loli nanti ane nkwefya imizimu imibibi na maka agha Chala, kokuti chikulanjizya ukuti u Chala ikazizye kale Ubumwene bwache pakasi papinyu.

²¹ “Bo umuntu wamaka akulindilila inyumba yache ni vilwilo, ukatundu wache akusungiwa akiza.

²² Loli nanti umuntu uwamaka ukumuchila iza nukumupota, akusenda ivilwilo vyosi vivyo umwenecho avisubilagha nukuvigaba vivyo akiba.

²³ “Umuntu wesi yuyo akudalinkana nane, kokuti mulwani wane, sona umuntu wesi yuyo atakunyavwa pakubungannya, kokuti akunyampannya.

Nizya kunyokela ukwa muzimu umubibi

²⁴ “Bo umuzimu umubibi ghukwepamo mumuntu, ghukwendakwenda muchisu ichumizu pakulonda ubuzilo ubwakutuzyapo. Nanti ghutakubwagha bumo, ghukunena ukuti, ‘Nkunyokela sona kunyumba yane.’

²⁵ Po ghukunyokela nukuyagha inyumba yila yite nako kamo mukasi, sona yiswepite nukuyaniziwa akiza.

²⁶ Po ghukubuka kuzi nukusenda iyinji seveni yiyo mibibi nkani ukughuchila uwene, po yikwiza nukwikala mulamula. Pabumalilo akabele aka muntu yula kakuba kabibi ukuchila mumo akabela pakwanda.”

Ubuhobosu ubwenecho

²⁷ Bo u Yesu akunena zinizi, umukolo yumo akanena muchilundilo icha bantu akati, “Musayiwa umukolo, yuyo akakupapa nukukonkezya!”

²⁸ Loli u Yesu akamula akati, “Awe, basayiwa babo bakwivwa amazyu agha Chala nukughivwila.”

Bakumulaba u Yesu ukuti abombe ichika

²⁹ Bo abantu bakubalilabalila, u Yesu akati, “Abantu abankulilo iyi bambibi, bakulonda ichiswigho. Awe, loli ichiswigho chene chicho bakwiza pakuchennya, cho chiswigho icha mulaghuzi u Yona.

³⁰ Pakuti u Yona akaba chimanyilo icha bantu aba mu Ninive, umwakuyana bulo, wepe u Mwana uwa Muntu akwiza pakuba chimanyilo icha bantu abankulilo iyi.

³¹ Pisiku lilyo u Chala akwiza pakubalonga abantu abankulilo iyi, u mwene umukolo uwa muchisu icha Sheba akwiza pakuzyuka kubufwe nukubasusya amwe, pakuti akenda ukufuma muchisu icha kukwabo pakwivwa ubumanyisi ubwa mahala ubwa Mwene u Solomoni. Ilelo nkubabuzya ukuti pano pali ichintu chimo ichikulu ukuchila u Solomoni.

³² Pisiku lilyo u Chala akwiza pakubalonga abantu abankulilo iyi, abantu aba mu Ninive bakwiza pakuzyuka kubufwe nukubasusya amwe, pachifukwa ichakuti bakapinduka nukuzileka imbibi zyabo, bo bivwa u Yona akulumbilila. Ilelo nkubabuzya ukuti pano pali ichintu chimo ichikulu ukuchila u Yona.

Ulukozyo ulwa mubili

³³ “Nayumo umuntu yuyo akukozya inyale nukuyikupikila ni sonta; Loli akuyibika pabuzelu, umwakuti yibalamilaye abantu bosi munyumba mula.

³⁴ Amaso ghako yo nyale iya mubili wako. Nanti amaso ghako miza, kokuti nu mubili wako ghope ghukwiza pakuba mulukozyo. Loli nanti amaso ghako mabibi, kokuti nu mubili wako ghope ghukuba muchisi.

³⁵ Polelo muchebaye ukuti ulukozyo lulo luli mumwinyu lutakipelaye pakuba chisi.

³⁶ Nanti umubili wako ghosi wizuye nulukozyo ukusita pakuba ni chigaba chimo muchisi, ghukwiza pakuba buzelu bwene posi na posi ukuyana namumo inyale yikulamila papinyu nu buzelu bwache.”

U Yesu akubasoka abantu nizya bamanyisi aba Ndaghilo naba Falisayi

³⁷ Bo u Yesu amala pakunena, umu Falisayi yumo akamwitizya pakulya kunyumba, po akinjila nukwikala pasi nukwanda pakulya.

³⁸ Umu Falisayi akaswigha, bo amwennya u Yesu akulya pakusita ukusukusula munyobe.

³⁹ Po u Mwene akamubuzya akati, “Amwe mwe ba Falisayi pakuti mukusuka kuzi ukwa lubako ni mbale zyinyu, loli mukasi mwizuye nu bupafu nu buvyondongo.

⁴⁰ Mwe bapunganu mwee! U Chala akapela kuzi, nkimba ate weyuyo akapela na mukasi bulo?

⁴¹ Loli mubapanje abapina vivyo vili mukasi mumbako ni mbale, po vyosi vikwiza pakubaswepela.

⁴² “Chighune nkani kukwinyu, amwe mwe ba Falisayi pakuti mukubika kwa Chala ichigaba choka pa vigaba 10 ivya vilungo vyinyu ngati bo busambya nu kale, sona nu kanyezi. Loli mukukana pakubomba ubwanaloli nukumughana u Chala. Ivi vyo vintu vivyo mubaghiye mubombaye ukusita ukulekapo vimo.

⁴³ “Chighune nkani kukwinyu, mwe ba Falisayi pakuti muvighanite ivitengo ivyapamwanya munyumba izyakwiputilamo, sona nukuti abantu babalamukaye nu muchizi muminalo.

⁴⁴ Chighune nkani kukwinyu, amwe mwe ba Falisayi pakuti muyanite bulo na mapumpa ghagho ghatakuboneka, sona abantu bakwenda pamwanya ukusita ukughamanya.”

⁴⁵ Umumanyisi uwa Ndaghilo yumo akati, “Mumanyisi, bo ukunena zinizi, ukututuka naswe bulo.”

⁴⁶ U Yesu akamula akati, “Chighune kukwinyu, mwe bamanyisi aba Ndaghilo pakuti mukubanyamulisya abantu ukatundu umung'wamu, loli mutakulonda pakubombezya akafingwi ukubavwa pakunyamula ukatundu yula.

⁴⁷ Chighune nkani kukwinyu pakuti mukuzenga amapumpa amiza agha balaghuzi babo abanyenya binyu bakabaghogha.

⁴⁸ Amwe mwebene mukwitika, sona mukusimikizya zizyo abanyenya binyu bakabomba. Abene bakaghogha abalaghuzi, po amwe mukazenga amapumpa.

⁴⁹ Pachifukwa ichi amahala agha Chala ghakanena ukuti, ‘Nkwiza pakubatumila abalaghuzi na batumiwa, loli bakwiza pakubaghogha bamo, sona abanji bakwiza pakubavwima.’

⁵⁰ Po abantu abankulilo iyi bakwiza pakufundiwa, pachifukwa icha kughoghiwa ukwa balaghuzi bosi, babo bakaghoghiwa ukwandila pakabalilo kako ichisu ichapasi chikapeliwa,

⁵¹ ukwandila pakughoghiwa ukwa Abeli mupaka pakughoghiwa ukwa Zekaliya, yuyo akaghoghiwa pakasi pachighemo Mubuzilo Ubuzelu. Momumo, nkubabuzya ukuti abantu aba masiku agha bakwiza pakufundiwa bosi pachifukwa icha kughoghiwa ukwa bantu bala.

⁵² “Chighune nkani kukwinyu, amwe mwe bamanyisi aba Ndaghilo pakuti mwafyula inyighulilo yiyo yikwighula kunyumba uwa mulyango iya mahala, yiyo amwe mute mukinjilemo, sona mukubakanizya babo bakuyezya pakwinjilamo.”

⁵³ Bo u Yesu epapo pabuzilo bula, abamanyisi aba Ndaghilo naba Falisayi bakanda pakumususya umwakoghofya nkani nukumulalusya amalalusyo aminji,

⁵⁴ ukuyezya pakumutegha mukanenele.