Luka 10 - IBAYIBOLO 2024

U Yesu akubatuma abamanyili 72

¹ Pisinda pache u Mwene akasala abantu abanji 72 nukubatuma babilibabili ukuti balongolele kukaya kosi, sona na kubuzilo bosi bubo umwene akalondagha pakubukako.

² Akati, “Inyinulo nkulu, loli abakwinula banandi. Mumulabe umwenecho uwa nyinulo ukuti atume abambombo pakwinula.

³ Bukagha! Nkubatuma ngati bo bana abang'ozi pakasi pa mpumpi.

⁴ Mutakasende ichikwama pamo inyambi iya pabulendo pamo inkwato, sona mutakimaye muzila pakulamuka abantu.

⁵ Munyumba yosi yiyo mukwinjilamo munenaye tasi ukuti, ‘Umutende ghubanje munyumba iyi.’

⁶ Nanti munyumba yila muli umuntu yuyo akulonda umutende, umutende ghugho mwaghunena ghukwiza pakuba papache. Loli nanti atalimo umuntu yuyo atakughulonda umutende, umutende ghugho mwaghunena ghukwiza pakunyokela kukwinyu.

⁷ Ikala munyumba yilayila. Mulyanje nukung'wela vyosi vivyo bakubapa, pakuti uwambombo abaghiye pakupokela amalipilo ghache. Mutakendakendaye inyumba ni nyumba.

⁸ Nanti mukwinjila mukaya nukupokeliwa, mulyanje vivyo babapa.

⁹ Mubapozye ababine mukaya kalakala, sona mubabuzye abantu ukuti, ‘Ubumwene ubwa Chala bwapalamila.’

¹⁰ Loli nanti abantu batakubapokela mukaya kako mukwinjilamo, bukagha mumisebo nukuti,

¹¹ ‘Nu lufumbi bulo ulwa mukaya kinyu, lulo lukakatiye kunyayo zyitu tukubakung'untila mwebenecho. Loli mukumbukaye ukuti Ubumwene ubwa Chala bwapalamila.’

¹² Naloli nkubabuzya ukuti pisiku lilyo u Chala akwiza pakubalonga abantu, akwiza pakubapelela ichisa nkani abantu aba mu Sodomu ukuchila abantu aba mukaya kala.

Nizya twaya tuto tughuniwe

¹³ “Chighune kukwako Kolazini! Chighune kukwako Betisayida! Nanti ivyika vivyo vibombiwe mumwinyu, vyabombiwe mutwaya utwa Tile nu Sidoni, ngali abantu mulamula bavwalite kale amasaka nukwikupulila itoyi mumubili ukulanjizya ukuti naloli bapinduka nukuzileka imbibi zyabo!

¹⁴ Loli pisiku lilyo u Chala akwiza pakubalonga abantu akwiza pakubapelela ichisa nkani abantu aba mu Tile nu Sidoni ukuchila amwe.

¹⁵ Po nawe Kapelinahumu! Nkimba ukwinong'ona ukuti ukwiza pakukweziwa mupaka kumwanya? Awe, loli ukwiza pakusumbiwa kubuzilo ubwa bantu abafwe.”

¹⁶ U Yesu akababuzya abamanyili bache akati, “Umuntu wesi yuyo akubateghelezya, akunteghelezya nane bulo. Umuntu wesi yuyo akubakana, akunkana nane bulo. Umuntu wesi yuyo akunkana, akumukana wepe yuyo akantuma.”

Nizya kunyokela ukwa bamanyili 72

¹⁷ Abantu 72 bala bakanyokako nu buhobosu ubukulu. Bakanena bakati, “Mwene ni mizimu imibibi yope yikatwivwila bo twayilamula mwitabwa lyako!”

¹⁸ U Yesu akabamula akati, “Nkennya u Satana akuwa ngati ko kamesya ukufuma kumwanya.

¹⁹ Teghelezya, nabapa ubulaghili ubwakuti mungakanya injoka na bankonya nukupota amaka agha mulwani yula, po nachimochimo chicho chikwiza pakubavulazya.

²⁰ Loli mutakahobokaye pachifukwa ichakuti imizimu imibibi yikabivwila, loli muhobokaye nkani ukuti amatabwa ghinyu ghasimbiwe kumwanya.”

U Yesu ahoboka

²¹ Pakabalilo kalakala u Yesu akizula nu buhobosu nu Muzimu Umuzelu nukuti, “Wee Tata, Mwene uwakumwanya na pachisu ichapasi! Nkukupalizya pachifukwa ichakuti wabavumbulila abantu babo batamanyiye ivintu vivyo ukabafisa abantu abamahala na bamanyi. Eee, Tata, umu momumo ukalondela ukuti chibombiwanje.

²² “Utata wane ampiye ubulaghili ubwa vintu vyosi. Nayumo umuntu yuyo amumenye u Mwana, loli Uwise mwene, sona atalipo umuntu yuyo amumenye Uwise, loli u Mwana mwene, sona na bantu babo u Mwana akubasala ukuti abavumbulile Uwise.”

²³ Po u Yesu akaghalabukila ku bamanyili nukunena nabo kulubazu ukuti, “Masayiwa amaso ghagho ghakwennya ivintu vivyo mukuvyennya.

²⁴ Naloli nkubabuzya ukuti abalaghuzi na bamwene abinji bakalondagha nkani pakuzyennya zizyo mukwennya, loli batakazyennya. Bakalondagha nkani pakuzyivwa zizyo mukwivwa, loli batakazyivwa.”

Ichili icha Musamaliya uwachisa

²⁵ Umumanyisi uwa Ndaghilo yumo akiza kwa Yesu nukuyezya pakumutegha. Akalalusya akati, “Wee Mumanyisi, nkimba imbombe ichoni ukuti impokele ubumi ubwa bwila na bwila?”

²⁶ U Yesu akamwamula akati, “Nkimba Amasimbo ghakuti choni? Nkimba ukwivwamo choni?”

²⁷ Umuntu yula akamula akati, “Umughanaye u Mwene u Chala wako nu moyo wako ghosi nu muzimu wako ghosi na maka ghako ghosi ni nyinong'ono zyako zyosi. Umughanaye umupalamani wako ukuyana namumo wiyighaniye wemwenecho.”

²⁸ U Yesu akamula akati, “Wamula akiza, bomba zinizi, po ukwiza pakuba nubumi.”

²⁹ Loli umumanyisi uwa Ndaghilo yula akalondagha pakwinena mwene pakuba mugholosu, po akamulalusya u Yesu akati, “Nkimba umupalamani wane wewenu?”

³⁰ U Yesu akamwamula akati, “Kukabako umuntu yumo, yuyo akikilagha ku Yeliko ukufuma mu Yelusalemu. Bo ali muzila, amavyondongo ghakamulema. Ghakamuvula amenda nukumukoma, ghakamuleka ali papipi pakufwa.

³¹ Kulusako, umuputi akendagha kuzila yilayila, loli bo amwennya umuntu yula akamupambata bulo.

³² Umwakuyana bulo wepe umu Levi akiza pabuzilo bulabula, akamwennya umuntu yula nukumupambata bulo.

³³ Loli umu Samaliya yumo yuyo akaba pabulendo bwache wepe akafika pabuzilo bulabula, sona bo amwennya, akamupelela ichisa.

³⁴ Akiza kukwache, akapungulila amafuta nu vinyo pavilonda vyache nukupinyapo. Po akamukwezya umuntu yula pampunda yache nukubuka nawe kunyumba iya bayeni, kuko akamusungilila akiza.

³⁵ Ilyandabi, akamupa isalabazya izya siliva zibili umwenecho uwa nyumba yula. Akamubuzya umwenecho uwa inyumba yula akati, ‘Umusungilile akiza, po nanti watagha izyakuchilapo pa muntu uyu, nkwiza pakukunyosekezya zyosi bo nabwelako.’ ”

³⁶ U Yesu akalalusya akati, “Munyinong'ono zyako, nkimba wewenu pabantu batatu aba yuyo akaba mumanyani uwa muntu yuyo amavyondongo ghakamulema?”

³⁷ Umumanyisi uwa Ndaghilo akamula akati, “Yuyo akamupelela ichisa.” U Yesu akamula akati, “Nawe bulo bukagha, kabombaye bunubu.”

U Yesu akumwendela u Malita nu Maliya

³⁸ Bo u Yesu na bamanyili bache bakwenda, bakafika mukaya kako umukolo yumo yuyo itabwa lyache akaba we Malita akamupokela munyumba yache.

³⁹ Akaba nu muzuna u Maliya, yuyo akikala pasi papipi nu Mwene nukuteghelezya ivimanyisyo vyache.

⁴⁰ U Malita akilumbusya ni mbombo inkulu yiyo akabombagha. Po akiza kwa Yesu nukuti, “Wee Mwene, nkimba utakumpasikizya ukuti umuzuna wane andekeye nemwene imbombo yosi? Mubuzye ukuti ize pakunyavwa.”

⁴¹ U Mwene akamwamula akati, “Wee Malita, wee Malita! Wilumbusya nukutamiwa ni vintu ivyinji,

⁴² loli ichintu choka chikulondiwa. U Maliya asala ichintu ichiza, sona chitakwiza pakufyuliwapo nalumolumo kukwache.”