Ivyili 9 - IBAYIBOLO 2024

Nizya mahala nu bupunganu

¹ Amahala ghakizengela inyumba nukusimika impanda zyache seveni.

² Ghakaghogha ivitekwa vyache, nukuyannya uvinyo wache, sona ghabika ivyakulya pitebulo lyache.

³ Ghakabatuma ababombi bache abalindu, ukuti bafumusye pabuzilo ubwapamwanya ubwa kaya akakulu nkani ukuti,

⁴ “Mwee bapunganu, zagha kuno!” Ghakubabuzya abantu babo batakwinong'ona ukuti,

⁵ “Zagha, mulyeko ichakulya chane nukung'welako uvinyo yuyo injanizye.

⁶ Leka ukusita ukwivwila kwinyu, po mukwiza pakuba nubumi, sona manyila ukwivwisya ivintu.”

⁷ “Umuntu wesi yuyo akumumanyisya amahala umuntu uwalobezyo, akwisamula mwene,” sona wesi yuyo akumuchemela umuntu umubibi akwivulazya mwene.

⁸ Utakamuchemelaye umuntu uwalobezyo, lumo angakubenga, loli umuchemelaye umuntu uwamahala, po akwiza pakukughana.

⁹ Umumanyisyanje amahala umuntu uwamahala, po akwiza pakuba muntu uwamahala naloli. Umumanyisyanje amahala umugholosu, po akwiza pakumanyilapo ivyinji nkani.

¹⁰ Ukumunyila u Mwene bo bwandilo ubwa mahala, sona amahala agha Chala Umuzelu ko kwivwisya ivintu.

¹¹ Pakuti nanti waba nane, amasiku ghako ghakuba minji, sona amasiku agha bumi bwako ghakuba minji.

¹² Nanti we wamahala, amahala ghako ghakwiza pakukupa umuvwalo, nanti we walobezyo, ukwiza pakuba muntamyo.

¹³ Umukolo umupunganu wachongo, atakupasya, sona atakumanya ichintu nachimochimo.

¹⁴ Akwikala pamulyango uwa nyumba yache, pabuzilo ubwakubonekela mukaya akakulu nkani.

¹⁵ Akubitizya abantu babo bakudumusannya, babo bakwiyendela bulo.

¹⁶ “Mwee bapunganu, zagha kuno!” Ghakubabuzya abantu babo batakwinong'ona ukuti,

¹⁷ “Amizi agha bwiba ghakunona, sona ichibama ichakubusyefu chikunona.”

¹⁸ Loli batakumanya nachimochimo ukuti abafwe bali kulakula, ukuti bope abayeni bali mwipumpa.