Ivyili 8 - IBAYIBOLO 2024

Amahala ghakwitizya

¹ Teghelezya, amahala ghakwitizya, ukwivwisya ivintu kukukolomoka.

² Ghakwimilila pabuzilo ubwapamwanya, mulubazu ulwa zila, ghakwimilila papo imisebo yilekanite.

³ Amahala ghimiliye pamulyango kuntazi ukwa kaya akakulu, pabwinjililo ubwa milyango ghakukolomoka:

⁴ Mwee bantu, mwee nkubalaba mwebosi nkumwitizya umuntu wesi pachisu ichapasi.

⁵ Mwee mute na mahala, manyila pakuba mwe bamahala, sona mwe bapunganu, manyila pakuba bakwivwisya ivintu.

⁶ Ivwa kuno, pakuti indi navyo ivintu ivyiza, ukuti imbabuzye. Nkwighula umulomo wane, ukuti imbabuzye ivintu ivigholosu.

⁷ Pakuti umulomo wane ghukunena ubwanaloli, sona imbubengite ububibi.

⁸ Amazyu ghosi agha mumulomu wane magholosu, sona intakunenapo lumo amazyu aghabumyasi pamo amanyonganu.

⁹ Amazyu ghane ghanaloli ku muntu wesi uwakwivwisya ivintu, sona ghate na kalema nakamokamo ku muntu wesi uwamahala.

¹⁰ Salapo ichimanyisyo chane mubuzilo ubwa siliva, sona salapo amahala mubuzilo ubwa golide umwiza.

¹¹ Pakuti amahala ghapamwanya ukuchila amabwe aghamutengo, sona ghatangayana ni chintu chosi chicho ungachinyonywa.

¹² Amahala ghakuti, “Ane ne mahala, nkwikala poka nu buchevu, sona indi na mahala nukwivwisya ivintu.”

¹³ Ukumunyila u Mwene ko kuzibenga imbibi, loli ukwikwezya na mituvyo ni zila izya bubibi, sona nukunena ubumyasi ivibengite.

¹⁴ Indi nu bulongozi ubwiza na mahala aghakwivwika, sona ukwivwisya ivintu na maka, vyane.

¹⁵ Ane ne nkubavwa abamwene ukuti balayilaye, sona na balongozi ukuti babikaye amalamulo amagholosu.

¹⁶ Ane nkubapela abalaghili ukuti balaghilaye sona na basongosongo bosi ukuti balongozyanje pachisu ichapasi.

¹⁷ Imbaghanite babo banganite, sona babo bakundondelezya nu moyo ghosi bakunyagha.

¹⁸ Ane indi nu bukabi nu muchizi, sona indi nu bukabi bubo butakumala.

¹⁹ Ivikomwa vyane vyiza ukuchila ugolide umwenecho, sona vivyo indi navyo vichilite usiliva umwiza.

²⁰ Ane nkwenda muzila iya bugholosu, sona muzila iya bwanaloli.

²¹ Nkubapa ubukabi babo banganite, sona nkwizuzya intamba zyabo nu bukabi.

²² U Mwene akampela ane pakuba ne wakwanda mumbombo zyache, Mumbombo zyache izyakale uwakwanda nkaba nene.

²³ Nkapeliwa mumasiku aghakwanda nkani, bo ni chisu ichapasi chichili pakupeliwa.

²⁴ Ane nkapeliwa bo ni nyanja zichili pakupeliwa bo ni mbwibwi zichili pakuba na mizi.

²⁵ Nkapeliwa bo na maghamba ghatikaziwe mubuzilo bwache, bo nu tughamba tuchili pakupeliwa.

²⁶ Nkabapo bo ni chisu ichapasi na maghunda vichili vitapeliwe, pamo itope ilya pachisu lichili litapeliwe.

²⁷ Nkabapo bo akupela kumwanya, bo akubika impaka iya nyanja inyibizu.

²⁸ Nkabapo bo akubika amabingu kumwanya, bo akwighula imbwibwi izya nyanja.

²⁹ Nkabapo bo akuyibikila impaka inyanja, umwakuti amizi ghatakadumusannye impaka yilayila, bo akwala ulwalo ulwa chisu ichapasi.

³⁰ Po nkaba nawe papipi ngati ne fundi wache, umwakuti isiku ni siku nkahobokagha nkani, sona akabalilo kosi nkasekelagha nkani pamaso papache.

³¹ Nkahobokagha muchisu chosi nukusekela poka nu muntu uwa muchisu ichapasi.

³² “Polelo mwee bana bane, munteghelezyanje, basayiwa babo bakwivwila zizyo nkubabuzya.

³³ Ivwila ichimanyisyo chane ukuti mubanje na mahala, sona mutakavisulaye.

³⁴ Musayiwa umuntu yuyo akunteghelezya, yuyo akwikala pamulyango wane isiku ni siku, nukundindilila pamulyango wane.

³⁵ Pakuti wesi yuyo akunyagha, kokuti abwagha ubumi sona ane ne Mwene nkuhoboka nawe.

³⁶ Loli yuyo atakunyagha, kokuti akwivulazya mwene, bosi babo bambengite, babughanite ubufwe.”