Ivyili 7 - IBAYIBOLO 2024

Nizya mukolo umalaya

¹ Wee mwana wane, sunga amazyu ghane, sona ughasungaye amalamulo ghane mumoyo wako.

² Sunga amalamulo ghane, po ukwiza pakuba nubumi, sungilila ivimanyisyo vyane ngati we mboniboni iya mulyiso lyako.

³ Uvivwalaye mutufingwi twako ngati zyo mpete, sona uvisimbaye mumoyo wako.

⁴ Ughabuzye amahala uti, “Awe we muyemba wane,” sona ukwivwisya ivintu kubanje ngati po mukamu wako.

⁵ Vikwiza pakukwefya munyobe izya mukolo umalaya, sona na munyobe izya mukolo uwa mazyu amanonu nkani.

⁶ Isiku limo bo indi pibwindo ilya nyumba yane, nkananamizya kuzi pavidobozwi.

⁷ Po pakasi pabantu abapunganu, pakasi pa balumendo, nkamwennyapo umulumendo yuyo ate na mahala.

⁸ Akendagha papipi ni nyumba iya mukolo yulayula, akabukagha kunyumba iya mukolo yula,

⁹ pachamabwila nkani bo kwanda pakwila, bo ichisi chandako.

¹⁰ Po umukolo yula akafuma kuzi pakukomana nawe, bo avwalite amenda ngati mukolo umalaya, uwa moyo umuzimbuli.

¹¹ Umukolo yula atakwikalana, sona ate ni soni atakwikalagha na panyumba.

¹² Ilelo ali mumusebo, lumo bulo ali kumunalo akwima nukulindilila posi papo imisebo yikukomana.

¹³ Akumulema umulumendo yula nukumufyofyonta, sona umusita isoni akumubuzya akuti:

¹⁴ “Ilelo nabika ichakwiyipa kunyumba yane, sona nakwanilisya ichilapo chane.

¹⁵ Po nizite pakukomana nawe, nakulondagha nkani, ilelo nakwagha!

¹⁶ Natenga ichitala chane na menda amatonte agha mu Ijiputi.

¹⁷ Nachipakazya ichitala chane na mafuta agha mule, nu twakufukizya utwakununkila utwa aloyi, nutwa kinamoni.

¹⁸ Ilelo zagha twangalaye mupaka pandabindabi, zagha twilaghaye ulughano lwitu.

¹⁹ Umulume wane ataliko kunyumba, pakuti achulitepo.

²⁰ Asendite inyambi inyizule ni ndalama, sona akwiza pakumalako umwezi.”

²¹ Na mazyu amazimbuli akamudeba umulumendo yula na mazyu ghache amanonu nkani akadebuka.

²² Lubilolubilo umulumendo yula akamukonka, ngati nkambaku yiyo yikubuka pakughoghiwa, pamo ngati mumo imbabala yikuwilila muchipingo,

²³ mupaka akalasilo kalase mulwanda lwache. Ali ngati chiyuni chicho chafyuntumuka muchipingo, po atakumanya ukuti akubunangannya ubumi bwache.

²⁴ Wee mwana wane, ivwa kuno, unteghelezyanje bo nkukubuzya.

²⁵ Umoyo wako ghutakamudebukilaye umukolo yunuyu, pamo ukuzikonka izila zyache.

²⁶ Umukolo yunuyu abawisya abanavuli abinji nkani, sona abaghogha abanavuli abamaka abasita ukubelengiwa.

²⁷ Inyumba yache yo zila iyakubukila kumapumpa, yiyo yikubinjizya kuchisu icha bafwe.