Ivyili 6 - IBAYIBOLO 2024

Umukata nu mumyasi bakusokiwa

¹ Wee mwana wane, utakabanje we kaboni pa nkongole iya mupalamani wako, pamo ukumubikila ichikole umuntu yumo.

² Nanti walemiwa na mazyu ghagho ukanena, wilema muchipingo icha mazyu ghako;

³ po mwana wane, ubombaye ichi ukuti wipoke wemwene, pakuti wawila munyobe izya mupalamani wako: Buka lubilolubilo umulambilizye ukuti akusatule.

⁴ Utakaghonaye utulo, sona utakasipulaye.

⁵ Wipoke wemwene ngati yo mbabala yiyo yapona munyobe izya mubingi, ngati chiyuni chicho chafyuntumuka muchipingo.

⁶ Wee mukata, manyilako ku luswa, inong'ona namumo chikubombela nukumanyilako amahala.

⁷ Chite nu mwene pamo umulongozi pamo umulaghili nayumoyumo,

⁸ loli chikuyanizya zila ichakulya chabo pachisanya, nukubika ichakulya chabo muntamba bo abantu bali pakwinula.

⁹ Wee mukata, nkimba ukwiza pakulambalala mupaka liyi? Nkimba ukwiza pakulamusya pakabalilo koni?

¹⁰ Awe ukuti, “Ingonepo panandi, insyupilayepo panandi bulo, nighololepo inyobe panandi bulo ukuti intuzyepo.”

¹¹ Po ubupina bukumwizila ngati livyondongo, sona bukumwizila ngati mwiba.

¹² Umuntu uwa mwalwemwalwe, sona umuntu umubibi akwendakwenda bulo nukunena ubumyasi.

¹³ Akusinizya amaso, akupalasila ni nyayo, sona akusontasonta bulo nu tufingwi.

¹⁴ Akubatika pakubomba ububibi mumoyo wache, sona imbombo yache yo yakubalumannya abantu.

¹⁵ Ukunanganika kukumwizila umwalubilolubilo, naloli lubilolubilo akunanganika umwakusita kupola.

¹⁶ Vilipo ivintu vimo sikisi vivyo u Mwene avibengite, ivintu seveni vivyo vyamwiko kukwache.

¹⁷ Ivintu vinivi vyo ivi: Amaso agha mituvyo nu lulimi ulwakutamanta, inyobe zizyo zikumughogha umuntu yuyo ate ninongwa nayimoyimo,

¹⁸ umoyo ghugho ghukubatika imbatiko imbibi, ivinama vivyo vikuchimbilila pakubomba ububibi,

¹⁹ ukaboni yuyo akutamanta, sona nu muntu yuyo akubalumannya abakamu bache.

²⁰ Wee mwana wane, sunga amalamulo agha ghuso, sona utakachisulannye ichimanyisyo icha nyoko.

²¹ Uvisungaye mumoyo wako bwila na bwila, uvipinyililaye musingo yako.

²² Bo ukwenda, vikwiza pakukulongolela, bo ukughona vikwiza pakukusungilila, bo ukulamusya, vikwiza pakunena nawe.

²³ Pakuti amalamulo ghanagha ghali ngati yo nyale, sona ichimanyisyo ichi chili ngati lo lukozyo. Amafundwe ghanagha ghali ngati yo zila iya bumi.

²⁴ Ghakukwefya munyobe izya mukolo umalaya, sona na kululimi ulwa mukolo umuzimbuli.

²⁵ Umoyo wako ghutakanyonywanje akabonekele kache akiza, pamo ukukutegha na kasinikizye aka maso ghache.

²⁶ Pakuti ungamughula umukolo umalaya ni chibama chene, sona nanti ukughona nu mukolo yuyo asendiwe, unganangannya nubumi bwako.

²⁷ Nkimba umuntu angapala umoto nukughufukatila muchikufi chache nukusita ukocha amenda ghache?

²⁸ Nkimba umuntu angakanya amazimwa agha moto ukusita inyayo zyache ukupya?

²⁹ Po momumo zibeleye nu muntu yuyo akughonana nu muchi uwa yunji, atalipo nayumoyumo yuyo akumupalamasya umukolo yula angapona ku lufundo.

³⁰ Abantu batakumusamula umwiba, yuyo akwiba pachifukwa icha zala.

³¹ Pope bulo nanti alemiwa, akunyosezyapo akaseveni; napapo angatagha ukatundu wesi uwa munyumba yache.

³² Loli yuyo akulowa mupunganu, pakuti pakubomba bunubu akwinangannya mwene.

³³ Akuvulaziwanga nukusamuliwa, sona akukoziwanga isoni bwila na bwila.

³⁴ Pakuti ubuzuba bukumupa ubukali umulume wache, po atakuba ni chisa nanti akutanizya.

³⁵ Atakupokelapo ichipepesyo nalumolumo, sona atakupokela amabeko napapo ghangaba minji nkani.