Ivyili 5 - IBAYIBOLO 2024

Uchebaye nawe umukolo umalaya

¹ Wee mwana wane, teghelezya amahala ghane, tegha amakutu ghako ku mazyu ghane agha bumanyi,

² umwakuti ubanje ni nkalo inyiza, nukuti amazyu ghako ghabanje ghamahala.

³ Pakuti imilomo iya mukolo umalaya yikutonya ubuchi, sona amazyu ghache matonte nkani ngati mafuta.

⁴ Loli pabumalilo pache akubaba ngati zyo mpilipili, sona ngati wepanga yuyo akwete kosi na kosi.

⁵ Inyayo zyache zikubuka kubufwe, izila yiyo akwendamo yikubuka kuchisu icha bafwe.

⁶ Ate ni mbombo ni zila iya bumi, izila zyache nyonganu, loli atakuzimanyagha.

⁷ Polelo mwana wane, unteghelezye, utakaghasulaye amazyu ghane ghagho nkukubuzya.

⁸ Umuleghukaye umukolo yunuyu, utakapalamilaye na kumulyango uwa nyumba yache.

⁹ Lumo ungisamula nukubachindika abanji, sona nukubalekela abayeni umuchizi wako.

¹⁰ Lumo abayeni bangilagha ubukabi bwako, nukuti umuntu yumo akwiza pakukabilapo ubukabi bwako.

¹¹ Ubumalilo ubwa bumi bwako bukwiza pakuba ko kukoloma, bo umubili wako wasyala mafupa ghene.

¹² Ukwiza pakunena ukuti, “Mwee, nkimba choni chicho nkaghasulannya amafundwe? Nkimba choni chicho intakaba ni mbombo nu luchemelo?

¹³ Intakabivwilagha abamanyisi bane pamo ukubateghezya babo bakampanga amahala.

¹⁴ Nkasyala bulo panandi ngali nananganika, pamaso pachilundilo chosi.”

¹⁵ Ng'welagha amizi aghako na ghako, kokuti amizi aghakufuma pachiziba chako.

¹⁶ Nkimba choni chicho upungulilaye amizi ghako mumisebo, nukuti bendendekaye posi na posi?

¹⁷ Leka amizi ghalaghala ghabanje ghako na ghako, utakagabanaye nalumo na bayeni.

¹⁸ Imbwibwi yako yibanje nsayiwa, sona uhobokaye nu muchi uwa kubulumendo bwako.

¹⁹ Pakuti akuboneka akiza ngati yo mbabala inkolo, sona wakuboneka akiza ngati yo mpombo, ulughano lwache lo lukuhobosyanje akabalilo kosi.

²⁰ Wee mwana wane, nkimba choni chicho ubanje we muzya uwa mukolo umalaya? Nkimba choni chicho umufukatilaye umuchi uwa mwanavuli uyunji?

²¹ Pakuti u Mwene akuzyennya imbombo izya muntu, sona amaso ghache ghakwennya akendele kache kosi.

²² Imbombo imbibi izya muntu umubibi zikuba chipingo chache, inkusa izya mbibi zyache zikumupinya mwene.

²³ Akufwanga pachifukwa ichakusita amafundwe, sona akwiza pakusobela pachifukwa icha bupunganu bwache.