Ivyili 4 - IBAYIBOLO 2024

Umuvwalo uwa mahala

¹ Mwee bana bane, ivwila zizyo ughuso akubamanyisya. Teghelezya ukuti mubanje mwe bakwivwisya ivintu.

² Amalamulo ghagho nkubamanyisya miza bulo, po mutakaghasulaye.

³ Bo inchili ne mulumendo munyumba iya tata, bo inchili ne bonda, sona mughaniwa uwa mayi wane,

⁴ utata akamanyisya akati, “Ughakakatilaye nkani amazyu ghane mumoyo wako. Sunga amalamulo ghane po ukwiza pakuba nubumi.

⁵ Pokela amahala, pokela ubumanyi, utakaluvyanje zizyo nkukubuzya, pamo ukughaluvya amazyu agha mumulomo wane.

⁶ Utakaghasulaye amahala ghane, po ghakwiza pakukuzighilila, ughaghanaye, po ghakwiza pakukusungilila.

⁷ Amahala cho chintu ichapamwanya nkani, pokela amahala. Napapo ungatagha vyosi vivyo uli navyo, loli pokela ukwivwisya ivintu.

⁸ Bika umoyo wako pa mahala, po ghakwiza pakukukwezya. Ughafukatilaye, po ghakwiza pakukuchindika.

⁹ Ghakwiza pakukuvwika impumpu iya chisa, nukukuvwika impumpu iya buchindamu.”

¹⁰ Wee mwana wane, pokela amazyu ghane, po ukwiza pakuba nubumi ubutali.

¹¹ Nkukumanyisya amahala, nkukulongozezya muzila ingolosu.

¹² Nanti ukwenda, nachimochimo chicho chikwiza pakukuzighila, nanti ukuchimbila, utakwiza pakwipunulapo.

¹³ Uvilemezyanje ivimanyisyo vyane, sona utakavilekaye. Uvisungililaye akiza, pakuti bo bumi bwako.

¹⁴ Utakakanyayemo muzila izya bantu ababibi, pamo ukwenda muzila izya babomba mbibi.

¹⁵ Uzileghukaye, leka nu kwendamo; epukako nukwenda muzila yako.

¹⁶ Batangaghona utulo nanti batabombitepo chimo ichibibi; sona batakughona utulo mupaka bamupunuzye umuntu yumo.

¹⁷ Pakuti ichibama chabo ko ukubomba imbibi sona ivyongo we vinyo wabo.

¹⁸ Izila iya bagholosu yili ngati ko kubuche, kuko kukulama nkani mupaka izuba lyafika pamutu.

¹⁹ Loli izila iya bantu ababibi yili ngati chisi ichakoghofya, batakuchimanya na chicho chibapunuzizye.

²⁰ Wee mwana wane, ivwa amazyu ghane, tegha amakutu ghako ku zizyo nkukubuzya.

²¹ Utakitikizyanje ukuti zyepepo pamaso papako uzisungaye mumoyo wako.

²² Pakuti ghakubapa ubumi abantu babo bakughagha, sona gho mulembo uwakughapozya amabili ghabo.

²³ Pamwanya pavyosi: Uwenelezye umoyo wako, pakuti yo mbwibwi iya bumi bwako.

²⁴ Umulomo wako ghutakanenaye ivya mwalwemwalwe, sona utakanenaye amazyu amababe.

²⁵ Amaso ghako ghennyanje kuntazi, sona wenelezyanje kuntazi kuko ukubuka.

²⁶ Uchebaye nkani ni zila yiyo ukwendemo sona wendaye bulo muzila zizyo ngolosu.

²⁷ Utakapaghukilaye kundilo pamo kumongo, utakendayemo muzila inyonganu.