Ivyili 30 - IBAYIBOLO 2024

Ivyili ivya Aguli

¹ Agha gho mazyu agha Aguli umwana uwa Yake uwamu Masa:

² Naloliloli, ane ne mupunganu ukubachila abantu bosi, ane ne muntu yuyo atakwivwisya ivintu.

³ Ane intamanyiyepo amahala, sona inte na mahala agha Muzelu yula.

⁴ Nkimba wewenu yuyo akweliteko kumwanya nukwikako sona, sona yuyo ayivumbatiyepo impepo munyobe zyache? Nkimba wewenu yuyo aghanyembeteleyepo amizi mumwenda wache? Fwandi wewenu yuyo akabika impaka pachisu ichapasi, sona itabwa lyache wewenu sona itabwa ilya mwana wache wewenu? Mbuzya nanti uzimenye!

Ivyili ivinji

⁵ Izyu lyosi ilya Chala lyanaloli, u Chala yo ngulu iya bosi babo bakuchimbilila kukwache.

⁶ Utakonjelezyanjeko nakamo akantu ku mazyu ghache, umwakuti atakakususyanje nukukwagha ukuti we mumyasi.

⁷ Wee Chala, tuliko utuntu tubili tuto nkukulaba, utakanyimaye utuntu tunutu bo inchili na pakufwa.

⁸ Akakwanda unyefyezye ubumyasi, akabubili, utakampanje ubukabi pamo ubupina, umpanje ichakulya chicho nkuchilonda.

⁹ Pakuti nanti naba mukabi nkani, nkwiza pakwikuta nukwanda pakukukana, pamo nanti naba mupina nkwiza pakwiba ivya bantu po nkwiza pakulinyazya itabwa ilya Chala wane.

¹⁰ Utakamubuzyanje u mwene ububibi ubwa mubombi wache, lumo angakughuna nukwaghiwa ukuti wewe uli ninongwa.

¹¹ Balipo bamo babo bakubaghuna abawise, sona batakubachindika abanyina.

¹² Balipo bamo babo bakwiyennya bene pakuba bazelu mumoyo, loli batefizyemo imbibi zyabo.

¹³ Balipo bamo babo bakwituvya nkani mukenezye kabo, bo bakubennya abanji batakubinong'onela pakuba bantu napo panandi.

¹⁴ Balipo bamo babo amino ghabo ghapyasiwe ngati chipeni bakulya ivintu ivya bantu abapotwe, sona nivya bapotwe munyumba zyabo, na mutwaya twabo ukuti babazimizyanjemo muchisu.

¹⁵ Inkunkuni yili na bana abalindu babili. Bakulilalila bulo bakuti, “Tupeko, tupeko.” Palipo ivintu vitatu vivyo vitakwikutamo. Pali ivintu folo vivyo vitakunenamo ukuti, “Twikutite.”

¹⁶ Ipumpa nu lwanda ulughumba, ni chisu icha lulanga, numoto ghugho ghutakuzimapo.

¹⁷ Umuntu yuyo akumusamula uwise, sona na yuyo akumuchemela unyina umughosi, abachigobe bakwiza pakuzompola amaso ghache, sona abachipungu bakwiza pakughalya.

¹⁸ Vilipo ivintu vitatu vivyo vikuswighisya nkani, ivintu folo vivyo intakuvyaghannya akiza.

¹⁹ Nkimba izwanga likubuluka bulibuli mumwanya, sona injoka yikwenda bulibuli mumabwe? Nkimba ubwato bukwenda bulibuli panyanja, sona umwanavuli akumusipa bulibuli umulindu?

²⁰ Umu momumo umukolo umalaya akubombela, nanti alya akupuputa pamulomo nukuti, “Ntanangitepo nachimochimo ichibibi.”

²¹ Pali ivintu vitatu, pamo ivintu folo vivyo ichisu ichapasi chikutetema navyo.

²² Ivintu vinivi vyo ivi: Nanti umuzya akwipela mwene pakuba mulaghili, nanti umupunganu akwipela mwene pakuba we mwene,

²³ nanti umukolo yuyo atakughaniwa asendiwa, nanti umulindu umuzya asenda ubuzilo ubwa mwene wache umukolo.

²⁴ Tulipo utuntu folo utunandi nkani pachisu ichipasi, loli twa mahala nkani.

²⁵ Uluswa tuntu utunandi nkani tuto tute na maka naghamoghamo, loli tukubunganizya zila ivyakulya muchisanya.

²⁶ Utwapelemende tuntu tudedebazu nkani, loli tukwikala mumpako izya mabwe.

²⁷ Umakanta ate nu mulongozi, loli pope bulo akwenda poka.

²⁸ Umusyololi angalemiwa ni nyobe, loli akwikala munyumba izya bumwene.

²⁹ Pali ivintu vitatu vivyo vikuhobosya nkani bo vikwenda, pali ivintu folo vivyo vikwiyennya nkani bo vikwenda:

³⁰ Inkalamu yiyo yamaka nkani ukuvichilla ivinyamana vyosi, sona yitakuchinyila nachimochimo ichinyamana.

³¹ Umukolwe yuyo akuhobosya nkani bo akwenda nu sabwe, sona nu mwene yuyo akwenda pantazi pabasilikali bache.

³² Nanti wame we mupunganu sona witutumulagha, pamo nanti wabatikagha pakubomba imbibi leka wighalile umulomo wako.

³³ Pakuti amafuta ghakufuma nanti bakupukusa ulukama nanti ukuyifinya impuno ibanda likufuma, sona nanti wabakalalizya abantu kokuti wanyamusya ivyongo.