Ivyili 3 - IBAYIBOLO 2024

Umuvwalo uwa mahala

¹ Wee mwana wane, utakaluvyanje ivimanyisyo vyane, loli ughasungaye amalamulo ghane mumoyo wako.

² Pakuti vikwiza pakukupa ubumi ubutali, sona ivintu vikwiza pakukwendelagha akiza.

³ Ulughano nu busubiliwa vitakakuchimbilaye, uvipinyilile musingo yako, sona uvisimbaye pamabwe amapapate agha moyo wako.

⁴ Po ukwiza pakuhoboka ni nkalo inyiza pamaso pa Chala, na pabantu bulo.

⁵ Umusubilaye u Mwene nu moyo wako ghosi, sona utakasubilaye ukwivwisya kwako ivintu.

⁶ Pavyosi vivyo ukubomba witikaye ukuti u Mwene aliko, sona akwiza pakuzipela izila zyako pakuba ngolosu.

⁷ Utakipimaye ngati po we wamahala, umuchindikaye u Mwene, nukuvikana ivintu ivibibi.

⁸ Ichi chikwiza pakughupozya umubili wako, sona chikwiza pakuba ngati mulembo uwa mafupa ghako.

⁹ Umuchindikaye u Mwene nu bukabi bwako ni nyinulo yako yosi iyakwanda.

¹⁰ Po intamba zyako zikwiza pakwizula, sona isonta zyako zikwiza pakwizula nu vinyo umupya.

¹¹ Wee mwana wane, utakavwitukaye nanti u Mwene akukupa amafundwe, sona utakakalalaye nanti akukuchemela.

¹² Pakuti u Mwene akubapa amafundwe babo abaghanite ngati mumo uwise akumupela amafundwe umwana umughaniwa.

Ubukabi ubwanaloli

¹³ Musayiwa umuntu yuyo aghaghanite amahala, umuntu yuyo akwaghite ukwivwisya ivintu.

¹⁴ Pakuti amahala ghachilite usiliva, sona ghachilite nu golide.

¹⁵ Amahala chintu ichamutengo nkani ukuchila amambo, sona ghatangayana nachimochimo chicho ungachinyonywa.

¹⁶ Ni nyobe yache indilo akupa ubumi ubutali, ni nyobe yache iyamongo akupa ubukabi nu muchizi.

¹⁷ Izila zyache zyo zikuhobosyanga, sona izila zyache zyamutende.

¹⁸ Amahala lyo likwi ilipela bumi ilya babo bakughafukatila, babo bakughakakatila bakuba basayiwa.

¹⁹ Na mahala u Mwene akala ulwalo ulwa chisu ichapasi, nukwivwisya ivintu akachikazya ichisu icha kumwanya.

²⁰ Nu bumanyi bwache imbwibwi zikapunta pachisu ichapasi, sona amabingu ghakupa ivula.

²¹ Wee mwana wane, sungilila amahala nu bumanyi bubo uli nabo, vitakatyelemukaye munyobe zyako.

²² Po vikwiza pakukupa ubumi, sona vikwiza pakuba mambo aghakuvwala musingo yako.

²³ Ukwiza pakwenda muzila yako umwakufwasa, sona utakwiza pakwipunula.

²⁴ Nanti ukwikala pasi, utakwiza pakuba nubogha, nanti ukughona, utulo twako tukwiza pakunona nkani.

²⁵ Utakanyilaye ivintu vivyo vikwiza umwakuchenusya bulo, pamo ukunanganika kuko kukubawila abantu ababibi.

²⁶ Pakuti u Mwene akwiza pakuba poka nawe, sona atakwiza pakwitikizya ichipingo ukuti chikulemaye.

²⁷ Ubabombelaye ubwiza babo bubabaghiye, nanti uli na maka aghakubombela bunubu.

²⁸ Utakamubuzyanje umupalamani wako ukuti, “Bukagha tasi nkwiza pakukupa indabi,” bo ichintu chilachila uli nacho.

²⁹ Utakabatikaye pakumubombela ichibibi umupalamani wako, yuyo ukwikala nawe papipi nukukusubila.

³⁰ Utakadalinkanaye nu muntu nayumoyumo, bo atakubombeye ichintu nachimochimo ichibibi.

³¹ Utakabunyonywanje ubumi ubwa muntu uwalombwa, pamo ukweghelela inkalo yache.

³² Pakuti u Mwene amubengite umuntu umubibi, loli akusayana nu muntu umugholosu.

³³ U Mwene akuyighuna inyumba iya muntu umubibi, loli akuyisaya inyumba iya muntu umugholosu.

³⁴ U Mwene akumusamula umuntu uwalobezyo, loli akumupelela ichisa umuntu uwakwiyisya.

³⁵ Umuntu uwamahala akupokela umuchizi, loli akumukozya isoni umuntu umupunganu.