Ivyili 29 - IBAYIBOLO 2024

Ubulaghili ubwa bagholosu

¹ Umuntu yuyo akuba nu moyo umukafu bo achemeliwa akinji bulo, naloli lubilolubilo akunanganika umwakusita kupola.

² Nanti umuntu umugholosu akulaghila, abantu bakuhobokagha, loli nanti abantu ababibi bakulaghila, abantu bakwilumbusyanga.

³ Umwana yuyo aghaghanite amahala akumuhobosya uwise, loli yuyo amanyanite na bamalaya, akubunangannya bulo ubukabi bwache.

⁴ Nanti u mwene akulongela mubwanaloli ichisu chikwikalana, loli yuyo akupokela amabeko akuchinangannya ichisu.

⁵ Umuntu yuyo akumuchevya umupalamani wache, akwitegha mwene muchipingo.

⁶ Umuntu umubibi akwilema muchipingo icha mbibi zyache, loli umugholosu akwimba nukusekela.

⁷ Umuntu umugholosu akubapasikizya abapina, loli umuntu umubibi atakubapasikizyako.

⁸ Abantu aba iyebo bakunyamusya ivyongo mukaya akakulu nkani, loli abamahala bakubumazya ubukali.

⁹ Nanti umuntu uwamahala akumusitaka umupunganu, umupunganu yula akwanda pakumusamula, po patakubapo umutende.

¹⁰ Umughoghi amubengite umuntu yuyo ate ninongwa, loli abantu abagholosu bakubupoka ubumi bwache.

¹¹ Umupunganu akulanjizya pabuzelu ubukali bwache, loli umuntu uwamahala akughulema umoyo wache.

¹² Nanti umulongozi akwivwila ubumyasi, amakambala ghache ghakuba mabibi.

¹³ Umupina poka na yuyo akumuyivya bosi banaba bayanite bulo: Amaso agha Mwene ghakubenelezya bosi babili banaba.

¹⁴ Nanti u mwene akubalongela abantu mubwanaloli, ubumwene bwache bukwikalana akabalilo akatali.

¹⁵ Indisa nu luchemelo vikumupa amahala, loli umwana yuyo akulekeleliwa akumukozya unyina isoni.

¹⁶ Nanti umuntu umubibi akulaghila, imbibi zyope zikubala, loli abagholosu bakwiza pakubennya bo bakunanganika.

¹⁷ Umufundaye umwana wako po ukwiza pakuhoboka mumoyo wako, sona atakwiza pakukukozya isoni.

¹⁸ Kuko kutaliko ubuvumbuli abantu bakuvulungana, loli musayiwa umuntu yuyo akuzikonka indaghilo.

¹⁹ Umubombi atakumanyisiwa amahala na mazyu ghene awe, napapo angaghivwa pope bulo atakubikilako inyinong'ono.

²⁰ Nkimba ukumwennya umuntu yuyo akunena mwalwemwalwe? Umupunganu ali nu lusubilo ukumuchila umuntu yulayula.

²¹ Umuntu yuyo akumunanga uwambombo wache ukwanda ko kubwana bwache, pabumalilo pache akumupelela ichitima.

²² Umuntu umukali akupela bulo ivyongo, sona umuntu yuyo akukalala mwalwemwalwe akunanga akinjikinji bulo.

²³ Ukwituvya ukwa muntu kukumuwisya mwene, loli umuntu uwakwiyisya abantu bakumuchindika.

²⁴ Umuntu yuyo akwenda nu mwiba atakubulonda ubumi bwache, napapo bakumulapizya loli atakwilata nalumo.

²⁵ Ukubanyila abantu kuli ngati cho chipingo, loli yuyo akumusubila u Mwene akuba pabwiza.

²⁶ Abantu abinji bakulonda nkani ukuti umulaghili abapelelaye ichisa, loli ubwanaloli bukufuma kwa Mwene.

²⁷ Abagholosu bababengite nkani abantu ababibi, umwakuyana bulo bope abantu ababibi bababengite nkani abagholosu.