Ivyili 28 - IBAYIBOLO 2024

Nizya muntu umubibi nu mugholosu

¹ Umuntu umubibi akuchimbila mwene bo nayumoyumo akumuchimbizya, loli umugholosu akubanga mujivu ngati nkalamu.

² Nanti ichisu chasambuka, abalongozi bakuba binji, loli umuntu uwakwivwisya ivintu nu wamahala akupela umutende.

³ Umulongozi yuyo akubayivya abapina, ayanite bulo ni vula iya mpepo yiyo yikunangannya imbeyu.

⁴ Abantu babo bakuzisulannya indaghilo bakubapala ababibi, loli babo bakuzikonka indaghilo bakubaleghuka.

⁵ Umuntu umubibi atakwivwisya ukuti ubugholosu cho choni, loli yuyo akubomba ubwighane ubwa Mwene akubwivwisya nkani.

⁶ Chizapo pakuba mupina yuyo ate ni chilema nachimochimo, nukuchila pakuba mukabi yuyo inkalo yache nyonganu.

⁷ Umwana yuyo akuzikonka indaghilo mwana wamahala, loli yuyo amanyanite na bapafu akumukozya uwise isoni.

⁸ Umuntu yuyo akonjelezyapo ubukabi bwache pakupokela ivyakonjelezyapo, akumulundikila umuntu uyunji yuyo akwiza pakubapelela ichisa.

⁹ Nanti umuntu atakuzikonka indaghilo, zyope inyiputo zyache zitakumuhobosyanga u Mwene.

¹⁰ Umuntu yuyo akumulongozezya umuntu umugholosu muzila imbibi akwiza pakuwila muchipingo chache, loli umuntu yuyo ate ni chilema nachimochimo akwiza pakupyana ichilingo.

¹¹ Umukabi angipima mwene pakuba wamahala, loli umupina yuyo ali na mahala akumwaghannya.

¹² Nanti abagholosu bakupota pakuba ukululutila ukukulu nkani, loli nanti ababibi bakwela pachitengo abantu bakuvwama.

¹³ Umuntu yuyo akufisa imbibi zyache ivintu vitakumwendelagha akiza, loli yuyo akwilata imbimbi zyache nukuzileka akupokela ichisa.

¹⁴ Musayiwa umuntu yuyo akumuchindika u Mwene akabalilo kosi, loli yuyo ali nu moyo umukafu akwinjila muntamyo.

¹⁵ U mwene umubibi yuyo akubayivya abapotwe, ayanite bulo ni nkalamu yiyo yikubuluma pamo ngati we labwe umukali.

¹⁶ Umulaghili yuyo akubayivya abantu babo bate na mahala, loli aghabengite amabeko akubanga nubumi ubutali.

¹⁷ Umughoghi yuyo apalaghula inongwa iya bughoghi, akuvwamagha mupaka ubufwe bwache, sona atakabepo nayumoyumo umuntu uwakumwavwa.

¹⁸ Umuntu yuyo ate ni chilema nachimochimo akuba mumutende, loli yuyo imbombo zyache nyonganu akuwila muchiliba.

¹⁹ Umuntu yuyo akulima umughunda wache akuba ni vyakulya ivyinji, loli umuntu yuyo akwilagha bulo nubumi akuba mupina.

²⁰ Umuntu umusubiliwa akusayiwanga, loli yuyo akuchimbilila pakuba mukabi naloli akufundiwanga.

²¹ Ukubomba ivintu umwakwennya icheni te kwiza, loli abalongi bamo bakubunyongannya ubwanaloli pachifukwa icha kamenyu aka chibama.

²² Umumama akubunyonnywa nkani ubukabi, sona atakuzyaghannya ukuti ubupina bukumulindilila.

²³ Umuntu yuyo akumuchemela uwamwabo, pabumalilo pache uwamwabo yula akumughana, nukuchila umuntu yuyo akunena mwalwemwalwe.

²⁴ Umuntu wesi yuyo akumwibila uwise pamo unyina nukuti, “Intakunanga,” umuntu yula we mumanyani uwa mwiba.

²⁵ Umuntu umupafu akupela bulo ivyongo, loli yuyo akumusubila u Mwene ivintu vikumwendelagha akiza.

²⁶ Umuntu yuyo akwisubila mwene we mupunganu, loli umuntu yuyo akughakonka amahala akwikala mumutende.

²⁷ Umuntu yuyo akubavwa abapina atakusobelwapo, loli yuyo atakubavwa abapina aghuniwanje.

²⁸ Nanti abantu ababibi bakulaghila, abantu bakuvwamagha, loli nanti abantu ababibi bananganika, abagholosu bakunyokelamo.