Ivyili 27 - IBAYIBOLO 2024

¹ Utakituvyanje nizya ndabi, pakuti utachimenye chicho chikwiza indabi.

² Utakipalaye wemwene, loli abanji bo babo bakupalaye, umuntu uyunji yuyo utamanyanite nawe, weyuyo akupalaye.

³ Ibwe ling'wamite, sona umusesenga gho ghung'wamite nkani, loli amadali agha mupunganu, gho ghang'wamite nkani ukuchila vyosi vibili.

⁴ Ubukali bukupela umoyo pakuba mupalapala, loli akabini ko kako kachilitepo.

⁵ Chiza pakumususya umuntu pamaso na pamaso nukuchila ukufisa ulughano.

⁶ Chiza pakuvulaziwa nu mumanyani wako, nukuchila pakufyofyontiwa nu mulwani wako.

⁷ Umuntu yuyo ikutite atakubunyonywa sona ubuchi, loli yuyo ali nizala ichintu chosi chikunona kukwache napapo chikubaba.

⁸ Umuntu yuyo akwendakwenda ukuyileka inyumba yache, ayanite bulo ni chiyuni chicho chikuchileka ichivulumbo chache.

⁹ Amafuta nu twakununkila tukughuhobosya umoyo, loli ubwiza ubwa mumanyani bughonite pazizyo akukubuzya.

¹⁰ Utakamusulaye umumanyani wako pamo umumanyani uwa ghuso, sona utakabukaye kunyumba iya wamwinyu nanti intamyo zyakuwila. Chizapo ukubuka ku mupalamani wako, nukuchila nu wamwinyu yuyo ali kubutali.

¹¹ Wee mwana wane, banga we wamahala, sona ughuhobosye umoyo wane, po ningamwamula umuntu wesi yuyo akunsamula.

¹² Nanti umuntu uwamahala achennya ichintu ichakoghofya akuvwama, loli umupunganu akwiyendela bulo nukunanganika.

¹³ Senda umwenda uwa muntu yuyo akumubikila ubwakaboni umuyeni pa nkongole, uchisendaye pakuba chikole icha muyeni yula.

¹⁴ Umuntu yuyo akumulamuka umupalamani wache umwakukolomoka pandabindabi nkani, chikwiza pakuboneka ngati akumughuna.

¹⁵ Umukolo uwakupwata ayanite bulo ni chisonje chicho chikutonyagha.

¹⁶ Pakumupumizya umukolo yunuyu, chiyanite bulo nukupumizya impepo, pamo ukughabika amafuta muchikufi.

¹⁷ Ichela chikupyasiwa ni chela ichamwabo, wepe umuntu akupyasiwa nu muntu uwamwabo.

¹⁸ Umuntu yuyo akulisungilila ikwi ilya ikuyu akulyanga ivikomwa vyache, wepe yuyo akumusungilila u mwene wache akuchindikiwanga.

¹⁹ Ngati mumo icheni chikubonekela mumizi, chiyanite bulo ni nkalo iya muntu yiyo yikulanjizizya umoyo wache.

²⁰ Ubufwe ni pumpa vitakwikutisiwa, umwakuyana bulo ghope amaso ghatakwikutisiwamo.

²¹ Usiliva nu golide vikusungunuliwa mumuvuno uwa moto, loli umuntu akupimiwa na mapalo ghagho akupokela.

²² Napapo umupunganu ungamupulila mwituli poka ni vilombe, utangabwefya ubupunganu bwache.

²³ Wenelezyanje ukuti wazimanya ing'ozi zyako, sona uvisungililaye akiza ivitekwa vyako.

²⁴ Pakuti ubukabi butakubangako bwila na bwila, sona impumpu yitakwikalaghako mupaka inkulilo zyosi?

²⁵ Nanti isote lyapupiwa, ipya likumela, po isote ilya mumaghamba likumela.

²⁶ Utwana utwa ng'ozi tukwiza pakukupa amenda, sona nanti waghulizya imbuzi ukwiza pakughula umughunda.

²⁷ Ukuba nu lukama ulwa mbuzi, pakuba chakulya chako, poka na bamunyumba yako, sona na bambombo bako abalindu.