Ivyili 26 - IBAYIBOLO 2024

Nizya muntu umupunganu

¹ Umuchizi ghutakumuyana umupunganu momumo zibeleye nu kabefu muchisanya pamo ivula pakabalilo akakwinula.

² Ichighune pa muntu yuyo ate ninongwa chitangamuvulazya, viyanite bulo ni viyuni vivyo vikubuluka mumwanya loli vitamenye nukuwa pasi.

³ Indisa yo yakukomela ifalasi ichela cho chakubika kumulomo uwa mpunda, sona indisa yo yikulinda panyuma iya mupunganu.

⁴ Utakamwamulaye umupunganu ukuyana nu bupunganu bwache, lumo ungayana nawe.

⁵ Umwamulaye umupunganu ukuyana nu bupunganu bwache, lumo angipima mwene pakuba wamahala.

⁶ Umuntu yuyo akumutuma umupunganu, ayanite bulo nu muntu yuyo akudumula inyayo zyache nukwilondela mwene intamyo.

⁷ Ivyili ivya mumulomo uwa mupunganu, vili bulo ngati vinama ivya muntu vivyo vilemaye, sona vivyo vite ni mbombo.

⁸ Ukumupa umuchizi umupunganu, chiyanite bulo nu muntu yuyo apinyiliye ibwe kufyata.

⁹ Ivyili mumulomo uwa mupunganu viyanite bulo nu mwivwa muchikufi icha ching'wela.

¹⁰ Umuntu yuyo akumusimba imbombo umupunganu pamo umwendazila ayanite bulo nu muntu yuyo akusumba utulasilo mwalwemwalwe.

¹¹ Umupunganu yuyo akunyokezya ubupunganu bwache, ayanite bulo nimbwa yiyo yikunyokela ku matapisi ghache.

¹² Umupunganu yuyo abantu bakuti mupunganu uwakufikapo, ali nu lusubilo ukumuchila umuntu yuyo akwipima mwene pakuba wamahala bo ate na mahala.

¹³ Umukata akutinji, “Kuzi kuli inkalamu, inkalamu iyakoghofya yikubuluma mumisebo.”

¹⁴ Ngati mumo lukughalabukila ulwiyi mumapeti ghache, momumo wepe umukata akubombela pachitala chache.

¹⁵ Nanti umukata injizya inyobe mumbale, akupotwa na pakuyifisya kumulomu wache.

¹⁶ Umukata akwiyennya mwene pakuba wamahala ukubachila abantu fayivi, babo bakwamula izya mahala.

¹⁷ Umwendazila yuyo akwinjililapo pavya bantu abanji, ayanite bulo nu muntu yuyo akuyilema imbwa amakutu.

¹⁸ Ngati we chipena yuyo akusumba mwalwemwalwe ivizinka ivya moto, pamo utulasilo utwakoghofya.

¹⁹ Ayanite bulo nu muntu yuyo akumuzimbula uwamwabo ukuti, “Awe, nasekagha bulo!”

²⁰ Nanti inkwi nazimo kokuti umoto ghukuzima, nanti ukuyebana nakumo kokuti vyope ivyongo navimo.

²¹ Ngati mazimwa agha moto uwakwaka, sona ngati nkwi pamoto, chiyanite bulo nu muntu yuyo akupela ivyongo.

²² Amazyu agha muntu uwa iyebo ghali ngati chakulya ichinonu, ghagho ghakwinjila mukasi mulwanda.

²³ Amazyu ghabuzimbuli ghagho ghakufisa chicho umuntu akwinong'ona, ghayanite bulo nitope lilyo bakumatila isonta.

²⁴ Umuntu uwa lubengo akufumya amazyu amiza pamulomo wache, bo mukasi mumoyo wache mwizuye ulubengo.

²⁵ Napapo amazyu ghache ghangaba miza, utakamusubilaye, pakuti mumoyo wache mwizuye ivintu ivinyazu.

²⁶ Napapo angafisa ulubengo umwabuchevu. Loli ububibi bwache bukubonekela pabuzelu pakasi pabantu.

²⁷ Nanti umuntu akukumba ichiliba akwiza pakuwilamo mwene, nanti umuntu akulighalabula ibwe, likwiza pakumughalabukila.

²⁸ Umuntu umumyasi akubabenga babo bakamuvulazya, sona amazyu ghabuzimbuli ghakunangannya.