Ivyili 24 - IBAYIBOLO 2024

¹ Utakamunyonywanje umuntu umubibi, utakakanyonywanje akabukatila kabo.

² Pakuti amoyo ghabo ghakubatika pakubomba ivyongo, sona amazyu ghabo ghakupela bulo intamyo.

³ Inyumba yikuzengiwanga nu muntu uwamahala, sona nukwivwisya kwache ivintu inyumba yilayila yikwikalana.

⁴ Na mahala ivipinda vyosi vikwizula, ni vintu ivyiza, sona ni vyamutengo.

⁵ Umuntu uwamahala akuba na maka nkani, sona umuntu uwakwivwisya ivintu, amaka ghache ghakonjelelakonjelela.

⁶ Pakuti nanti umuntu akulwa ubwite pakulondiwa amahala, sona ubupoti pabwite bwaghona pa bakukumanyisya amahala abinji.

⁷ Umupunganu atangaghafikila amahala, atakuba ni chakunena palukomano ulwa bulongi.

⁸ Umuntu yuyo akubatika ububibi, akwitiziwanga mupela vyongo.

⁹ Imbatiko izya mupunganu zyo mbibi, po abantu batakuhobokagha nawe.

¹⁰ Nanti ukuwa amaka pakabalilo akantamyo, kokuti amaka ghako mapepe.

¹¹ Ubapokaye babo bakubuka nabo pakughoghiwa, utakabennyanje bulo ukuti baghoghiwanje.

¹² Nanti ukuti, “Intakazimanya,” yuyo akughupima umoyo nkimba atakuzyennya zinizi? Nkimba atakumupa umuvwalo umuntu wesi ukuyana ni mbombo zyache?

¹³ Wee mwana wane, lyanga ubuchi, pakuti bwiza, sona ubuchi ubwa muchitenga bukunona nkani.

¹⁴ Umanye sona ukuti amahala manoni ku bumi bwako, nanti waghagha, ubumi bwako bukuba nu lusubilo, sona ulusubilo lulalula lutakumala nalumo.

¹⁵ Utakavwamililaye kuzi ukwa nyumba iya muntu umugholosu ngati po we livyondongo, sona utakabombaye ichibibi pakaya kache.

¹⁶ Napapo umuntu umugholosu angawa akaseveni, akunyamuka sona, loli intamyo zikumuwisya umuntu umubibi.

¹⁷ Utakasekelaye nanti umulwani wako awa, sona utakahobokaye nanti ipunula.

¹⁸ Lumo u Mwene angachennya nukusita ukuhoboka, sona nukunyosyako ubukali pa mulwani yula.

¹⁹ Utakapasyanje nu muntu umubibi, pamo ukumunyonnya umuntu umubibi.

²⁰ Pakuti umuntu umubibi ate nu lusubilo, sona inyale iya muntu umubibi yikuzimagha.

²¹ Wee mwana wane, umuchindikaye u Mwene sona nu mulaghili, utakabanje we mumanyani uwa bantu abakusambuka.

²² Pakuti abantu banaba bakwisendela bene intamyo umwalubilolubilo, nkimba wewenu yuyo azimenye intamyo zizyo zingabawila bosi babili banaba?

Ivyili ivinji ivya mahala

²³ Ivi sona vyo vyili ivya mahala: Te chiza pakulonga inongwa umwakwennya icheni.

²⁴ Umuntu yuyo akumubuzya yuyo anangite akuti, “Ute ninongwa,” abantu bakwiza pakumughuna, sona inko izya bantu zikwiza pakumubenga.

²⁵ Loli umulongi yuyo akumufunda umuntu umubibi ivintu vyache vikumwendelagha akiza, sona akupokela ulusayo nkani.

²⁶ Umuntu yuyo akwamula ubwanaloli weyuyo akulanjizya ubumanyani ubwanaloli.

²⁷ Bombela zila imbombo zyako nkaninkani izya kumaghunda, po pisinda pache uzengaye inyumba.

²⁸ Utakamubikilaye ubwakaboni ubwabumyasi umupalamani wako, pamo ukumuzimbula.

²⁹ Utakatinji, “Nkwiza pakumubombela ukuyana namumo akambombela, pamo pakumutanizya pachicho akambombela.”

³⁰ Nkadumusannya papipi nu mughunda uwa muntu umukata, papipi nu mughunda uwa mampesya uwa muntu umupunganu.

³¹ Nkennya amivwa ghene, isote likaba posi na posi, sona ulupaso ulwa mabwe lukamongoka.

³² Po nkanda pakwinong'ona pazizyo nkazyennya, sona nkamanyilapo chimo:

³³ Ingonepo panandi, insyupilayepo panandi bulo, nighololepo inyobe panandi bulo ukuti intuzyepo

³⁴ po ubupina bukwiza pakukwizila ngati livyondongo, sona ubupina ngati mwiba.