Ivyili 23 - IBAYIBOLO 2024

¹ Nanti wikala pakulya poka nu mulongozi, wenelezye nkani chicho chili pantazi papako.

² Nanti we mupafu, wilemaye nkani bo uli pakulya.

³ Utakanyonywanje ichakulya chache ichinonu, pakuti ichakulya chilachila chabuzimbuli.

⁴ Utakitamyanje wemwene ukuti ubanje we mukabi, loli ubanje muntu uwamahala nu wakwilema.

⁵ Nanti wabwagha ubukabi, ukwennya ukuti bwabuka kale, pakuti naloli bukwiza pakumela ivipapande nukubulukila kumwanya ngati lyo lizwanga.

⁶ Utakalyanje ichakulya poka nu muntu umumama, utakanyonywanje ichakulya chache ichinonu.

⁷ Pakuti akwinong'ona bulo nizya mutengo uwa chakulya chilachila. Akuti, “Lyanga, ng'welagha,” loli umoyo wache ghute nawe poka.

⁸ Ukwiza pakutapika vyosi vivyo waliye, sona amazyu ghako aghakumupala nagho ghakwiza pakuba mpepo bulo.

⁹ Utakanenaye nu muntu umupunganu, pakuti akwiza pakughasulannya amazyu ghako aghamahala.

¹⁰ Utakakefyanje ichimanyilo icha mpaka iyakale, pamo ukwinjila mumughunda uwa bana abalanda.

¹¹ Pakuti umuvighilili wabo wamaka nkani, akwiza pakubimila pa nongwa yabo.

¹² Ubikayepo umoyo wako pazizyo bakukubuzya, sona amakutu ghako ghateghelezyanje amazyu aghamahala.

¹³ Utakalekaye pakumupa amafundwe umwana nanti wamusyempa atangafwa.

¹⁴ Nanti ukumusyempa, kokuti ukubupoka ubumi bwache kubufwe.

¹⁵ Wee mwana wane, nanti we muntu uwamahala, po nane nkwiza pakuhoboka.

¹⁶ Umuzimu wane ghukusekela, nanti nkwivwa ukuti ukunena ingolosu.

¹⁷ Utakanyonywanje zizyo abantu ababibi bakubomba, loli akabalilo kosi ubanje we walweke pakumunyila u Mwene.

¹⁸ Naloli intazi yiliko, sona ulusubilo lwako lutakwiza pakupotwa nalumo.

¹⁹ Wee mwana wane, ivwa kuno, sona ubanje we wamahala, uzibike inyinong'ono zyako muzila ingolosu.

²⁰ Utakangalilanaye na baching'wela, pamo na babo bakulya inyama umwabupafu.

²¹ Pakuti abaching'wela na bapafu bakwiza pakwinjila mubupina sona umukata akwiza pakuba muntu uwakuvwala ivisepe.

²² Umwivwilaye ughuso yuyo akakupapa, sona utakamusamulaye unyoko bo aghosipa.

²³ Ghulagha ubwanaloli, sona utakabughulizyanje, banga na mahala, na mafundwe, sona nukwivwisya ivintu.

²⁴ Uwise uwa mwana umugholosu akuhoboka nkani, umuntu yuyo apapite umwana uwamahala akuhoboka nawe.

²⁵ Ughuso nu nyoko bahobokaye, unyoko yuyo akakupapa ahobokaye.

²⁶ Wee mwana wane, umoyo wako ghunsubilaye, amaso ghako ghenelezyanje izila zyane.

²⁷ Umukolo umalaya ali ngati chiliba ichibizu, sona umukolo umalaya ayanite bulo ni chiziba ichifinye.

²⁸ Akuvwamililagha ngati livyondongo, sona abanavuli abinji batakuba basubiliwa pachifukwa icha yuyo.

²⁹ Nkimba wewenu yuyo aghuniwe, fwandi alipo yumo yuyo ali ni chitima? Nkimba wewenu yuyo ali pavyongo, sona wewenu yuyo ali pakwilumbusya? Nkimba wewenu yuyo ali ni vilonda, vivyo vitakumanyikwa ubwandilo bwache, sona alipo yumo yuyo amaso ghache ghali bulo chee?

³⁰ Yunuyu we muntu yuyo akulindagha muvinyo, yuyo akung'welagha uvinyo umongannye.

³¹ Utakadebukilaye uvinyo yuyo achesamite, bo akufuluka mulubako nukusengama panandipanandi.

³² Pabumalilo pache akuluma ngati njoka, sona akughogha ngati nsalile izya chipili.

³³ Amaso ghako ghakwiza pakuvyennya ivintu iviyeni, sona ukwiza pakunena ivyamwalwemwalwe.

³⁴ Ukwiza pakuba ngati muntu yuyo aghonite pakasi panyanja, pamo ngati yuyo aghonite kusonga iya bwato.

³⁵ Po ukwiza ukunena ukuti, “Bakankoma, loli intakavulala, bakansyempa, loli intakivwapo nachimochimo. Nkimba nkwiza pakulamusya liyi nukuchagha ichakung'wela ichinji?”