Ivyili 22 - IBAYIBOLO 2024

¹ Inkalo inyiza yibuchilite ubukabi ubwinji, chizapo pakuba nu muchizi, ukuchila pakuba nu siliva nu golide.

² Umukabi nu mupina bayanite bulo, pakuti u Mwene weyuyo abapelite bosi babili banaba.

³ Nanti umuntu uwamahala achennya ichintu ichakoghofya akuvwama, loli umupunganu akwiyendela bulo nukunanganika.

⁴ Umuvwalo uwa kwiyisya nukumuchindika u Mwene bo bukabi nu muchizi, sona nubumi ubutali.

⁵ Muzila iya muntu umubibi muli bulo amivwa ni vipingo, loli yuyo akwisungilila akiza akuvileghuka.

⁶ Umumanyisyanje umwana izila iyakuti endayemo, po nanti akula atakwiza pakwepukamo.

⁷ Abantu abakabi bakubalaghila abantu abapina, sona umuntu yuyo akukopa akubanga muzya uwa yuyo akumukopezya.

⁸ Umuntu yuyo akupesa ububibi akwinula intamyo, sona indisa iya bukali bwache yikwiza pakupyoka.

⁹ Umuntu umupi akusayiwanga, pakuti akugabana ivyakulya vyache na bapina.

¹⁰ Nanti wamuchimbizya umuntu uwalobezyo, kokuti wamazya ivyongo, naloli ukudalinkana nu musamu vikumala.

¹¹ Umuntu yuyo ali nu moyo umuzelu, sona yuyo ali ni neno inyiza, akubanga mumanyani uwa mwene.

¹² U Mwene akubenelezya abantu abakwivwisya ivintu, loli akubavulungannya abantu babo te basubiliwa.

¹³ Umukata akutinji, “Kuzi kuli inkalamu, inkalamu iyakoghofya yikubuluma mumisebo.”

¹⁴ Umulomo uwa mukolo umalaya ghuli ngati chiliba ichibizu, umuntu yuyo u Mwene amukalaliye akuwila mulamula.

¹⁵ Ubupunganu bukwikala mumoyo uwa mwana, loli indisa iya mafundwe yikwefya ubupunganu bulabula.

¹⁶ Umuntu yuyo akubayivya abapina ukuti akabilemo, pamo yuyo akubapa abakabi bene ivyabupi, bosi babili banaba bakubanga bapina.

Ivyili ivya bantu abamahala

¹⁷ Tegha amakutu ghako, wivwanje amazyu agha bantu abamahala, bikilako umoyo wako pa vivyo nkukumanyisya.

¹⁸ Pakuti chakuhobosya nkani nanti ukuvisunga, sona nanti we wakwiyannya pakuvinena pakabalilo kache.

¹⁹ Nakumanyisya vinivi ilelo, umwakuti umusubilaye u Mwene.

²⁰ Nakusimbila ivyili 30, ivyakukusoka nukukupa amahala.

²¹ Nakumanyisya amazyu aghanaloli sona na masubiliwa, umwakuti umwamulaye akiza yuyo akutumite.

²² Utakamwibilaye umupina pachifukwa ichakuti muntu umupotwe, sona utakanyongannyanje ubwanaloli pa nongwa iya muntu umupina.

²³ Pakuti u Mwene akwiza pakwivwa inongwa yache, sona akwiza pakubafyula ubumi babo bakamufyulagha ivintu vyache.

²⁴ Utakabanje we mumanyani uwa muntu uwakukalala mwalwemwalwe, utakamanyanaye nu muntu umukali.

²⁵ Lumo ungeghelela inkalo yache nukuwila muchipingo.

²⁶ Utakabanje we kaboni pa nkongole iya muntu, yuyo akwipela pakuba chikole pa nkongole.

²⁷ Nanti wapotwa pakulipila, chope ni chitala chako chikwiza pakufyuliwa.

²⁸ Utakefyanjepo ichimanyilo icha mpaka iyakale, yiyo abanyenya bako bakayibika.

²⁹ Nanti ukubomba imbombo zyako akiza bulo, kokuti ukwiza pakubabombela abamwene, sona utakwiza pakubabombela abantu bulo.