Ivyili 21 - IBAYIBOLO 2024

¹ Umoyo uwa mwene ghuli munyobe izya Mwene, akughulongozezya kosi kuko ghukulonda ngati mizi agha mulusoko.

² Inkalo iya muntu yikuboneka nyiza kukwache, loli u Mwene weyuyo azimenye inyinong'ono zyache.

³ Ukubomba ingolosu ni nyiza, kukumuhobosya u Mwene ukuchila ichakwiyipa.

⁴ Amaso aghakwikwezya nu moyo uwa mituvyo, vikumulongezezya umuntu pakubomba imbibi.

⁵ Imbatiko izya muntu uwakwiyula zikumwavwa pakuvyagha ivyinji, loli yuyo akubomba umwalubilolubilo akwinjila bulo mubupina.

⁶ Ubukabi ubwakubwaghila mubuzimbuli, buli ngati lyosi, sona chipingo icha bufwe.

⁷ Ivyongo ivya muntu umubibi vikumunangannya, pakuti akukana pakubomba ingolosu.

⁸ Izila iya muntu umubibi nyonganu, loli inkalo iya muntu yuyo ate ninongwa ngolosu.

⁹ Chizapo pakwikala umwakwifyenyelekezya pankuto iya chisonje icha nyumba, ukuchila pakwikala munyumba poka nu mukolo uwakupwata.

¹⁰ Umuntu umubibi chicho akuchinyonywa bo bubibi, atakumupelela ichisa umupalamani wache.

¹¹ Nanti umuntu uwalobezyo akufundiwa, umupunganu akumanyilako amahala. Nanti umuntu uwamahala bakumumanyisya inkalo inyiza, akuba muntu uwakwivwisya ivintu.

¹² U Chala umugholosu avimenye vivyo vikwendelela munyumba iya muntu umubibi, sona akubawisizya pasi abantu ababibi.

¹³ Nanti umuntu akwighalila amakutu ghache bo umupina akulila, wepe akwiza pakulila sona atakwiza pakwamuliwa.

¹⁴ Ichabupi ichakubusyefu chikubwisya ubukali, sona amabeko aghakubusyefu ghakuzimyanga ubukali.

¹⁵ Nanti ubwanaloli bwabombiwa, abagholosu bakuhobokagha, loli abantu ababibi bakubanga nubogha.

¹⁶ Umuntu yuyo akuyisulannya izila iya muntu uwamahala, akwinjila mukabukatila aka bantu abafwe.

¹⁷ Umuntu yuyo akughanite ukwilagha, akubanga mupina, sona yuyo amughanite uvinyo na mafuta, atakwiza pakuba muntu umukabi nalumo.

¹⁸ Umuntu umubibi akwiza pakuba chakumutabulila umuntu umugholosu, sona babo bate basubiliwa bakwiza pakuba chakubatabulila abagholosu.

¹⁹ Chizapo pakwikala munkolongo ukuchila pakwikala nu mukolo uwakupwata nu wakukalala mwalwemwalwe.

²⁰ Munyumba iya muntu uwamahala mukubangamo ubukabi, loli umupunganu akubunangannya bulo.

²¹ Umuntu yuyo akubomba ingolosu nukuba wachisa, akubwagha ubumi ubwenecho nu muchizi, sona ivintu vikumwendelagha akiza.

²² Umuntu uwamahala angakapota akaya akakulu nkani aka bantu abamaka, nukulimongolannya ilinga lilyo bakulisubila.

²³ Umuntu yuyo akulema pamulomo nukucheba pazizyo akunena, atakukomanaghapo nintamyo.

²⁴ Umuntu uwamituvyo nu wakwitutumula itabwa lyache we “Lobezyo,” pachifukwa ichakuti akubombagha ivintu umwakwikwezya.

²⁵ Ikwilu ilya muntu umukata likumughogha mwene, pakuti inyobe zyache zitakulonda pakubomba imbombo.

²⁶ Umuntu umukata akuvinyonnya ivintu musanya ghosi, loli umugholosu akupa umwakusita ukumamamilizya.

²⁷ Ichakwiyipa icha muntu umubibi gho mwiko, nkaninkani nanti achibika ni nyinong'ono imbibi!

²⁸ Ukaboni umumyasi akwiza pakuzimila, loli umuntu wesi yuyo akumuteghelezya akwiza pakunanganika bwila na bwila.

²⁹ Umuntu umubibi akwilanjizya pakuba muntu umujivu, loli umuntu umugholosu akwinong'ona tasi nizya izila yiyo akwendamo.

³⁰ Ghataliko amahala, pamo ukwivwisya ivintu, pamo imbatiko, zizyo zingamuchila u Mwene.

³¹ Ifalasi yikuyaniziwanga pisiku ilya bwite, loli ubupoti buli munyobe izya Mwene.